Música La Sociedá d’Autores y Esbardu negocien un alcuerdu qu’asegure la continuidá del Intercélticu d’Avilés by asturnet 3 de payares, 2004 L’asociación Esbardu y la Sociedá Xeneral d’Autores y Editores (SXAE) negocien un alcuerdu que nun estrangule’l crecimientu del Festival Intercélticu d’Avilés, consideráu el principal nel so xéneru n’Asturies. Los abogaos de dambes partes esperen algamar un pactu de forma “inminente” pa formalizar el pagu por drechos d’autor, cola cantidá final como principal motivu de disensión. Según precisó el presidente d’Esbardu, Juan Casas, les negociaciones tán na so fase final y pesllaránse en cuestión de díes, darréu se pacte la cantidá que los organizadores del festival han pagar en conceptu de drechos d’autor polos conciertos cellebraos na última edición del festival, en xunetu pasáu. Hores depués del alcuerdu ‘in extremis’ que dambes partes aceptaron entós a la puerta’l xulgáu na viéspora l’empiezu del festival, Casas amosó la voluntá d’Esbardu de nun pagar en nengún casu una cantidá superior al 10 por cientu de los beneficios totales del festival, asuntu que centra agora les negociaciones. Magar d’asumir qu’habrá un pagu pa evitar les acciones xudiciales entamaes -y llueu paralizaes- pola Sociedá d’Autores, Casas aseguró qu’esi desembolsu supondrá un esfuerzu importante pa les arques del festival, y alertó de que l’acción de la SXAE pon en peligru o liquida la cellebración d’otros eventos asemeyaos, ente los que citó la Xuntanza Astur de Santu Adrianu y la Nueite Celta de Xedré. Pal presidente d’Esbardu, la presión de la Sociedá Xeneral d’Autores ye “inxusta” enforma pa un collectivu como’l qu’entama el Festival Intercélticu d’Avilés, “que lleva munchu tiempu trabayando na estaya de la música tradicional, modalidá pola que nun se debieren pagar drechos d’autor”. La octava edición del Intercélticu d’Avilés y Comarca aconceyó ente’l 16 y el 27 de xunetu a unos 20.000 asistentes, según el balance de los organizadores, nun añu que supuso un importante saltu cualitativu pal eventu, qu’axuntó a 850 participantes y aumentó la so duración respecto a 2003. Archivu. La Sociedá d’Autores retira la demanda contra l’Intercélticu y negociará un cobru a la baxa 3 de payares, 2004 0 FacebookTwitterPinterestEmail
Música Los nuevos soníos norteamericanos aporten a Uviéu y Xixón de la mano de Paybacks y Dayna Kurtz by asturnet 3 de payares, 2004 Banda sonora pa una xornada decisiva n’Estaos Xuníos. Nel día posterior a les elecciones de les que saldrá’l nome’l presidente d’esi país, la banda de rock The Paybacks, procedente de Detroit, y la solista Dayna Kurtz, afincada nel estáu de Jersey, presenten esta nueche n’Asturies dos concepciones estremaes de la nueva música fabricada en Norteamérica. La primera en salir a escena sedrá la vocalista y guitarrista Dayna Kurtz, que pesie a tener nel mercáu un únicu discu editáu -Postcards From Downtown (2003)- acumula un trabayu de carretera que la mantién actuando en sales d’Estaos Xuníos dende mediaos de los años noventa y llevóla a ser reconocida, en 1997, como meyor compositora del añu. A partir de les 20 hores, nel Centru Cultural de Caxastur n’Uviéu, la intérprete norteamericana espardirá los sos sones con toque personal, eloxaos pola so casa discográfica como un amiestu de la guapura nos testos de Suzanne Vega, la intensidá de Van Morrison y l’inxeniu poéticu de Leonard Cohen, de cuyos temes l’artista fai varies versiones. Dos hores y media depués, nun horariu más propiciu pal rock and roll, The Paybacks arrancarán na Sala Albéniz de Xixón un conciertu col que van abrir una xira por nueve ciudaes del Estáu. Pal recital n’Asturies, el grupu de Detroit promete una mecigaya de “riffs palpitantes, pop brillante y poderosu punk de tres acordes”. Con Wendy Case al frente, la formación norteamericana presentará en directu los temes del so últimu trabayu, ‘Harder and harder’, nel qu’intervinieron el cofundador de la banda Marco Delicato y el guitarrista Calvin Cooke. Web oficial de Paybacks 3 de payares, 2004 0 FacebookTwitterPinterestEmail
Educación Mieres busca más protagonismu na enseñanza musical cola inaguración d’una escuela pa más de 300 alumnos by asturnet 3 de payares, 2004 Mieres quier sonar más. La nueva Casa de la Música del municipiu mineru, habilitada nes dependencies del vieyu economatu d’Hunosa ya inagurada esti mediudía pol presidente autonómicu, Vicente Álvarez Areces, quier afitar la villa como un centru de referencia nes enseñances musicales impartíes nel Principáu. L’inmueble acueye clases pa más de 300 alumnos. Depués d’unes obres de remocicamientu que requirieron una inversión d’un millón d’euros y qu’hubieron superar importantes resquiebres na estructura del edificiu, utilizáu nos últimos años como sé de la Escuela d’Inxeniería, la villa minera agospia agora nun flamante espaciu de tres plantes a los estudiantes del Conservatoriu y de la escuela de música, qu’imparte enseñances de música tradicional. Amás d’ello, la reforma del vieyu economatu d’Hunosa habilitó espacios d’ensayu pa la banda y l’orfeón municipales, y permitió instalar un nuevu auditoriu espresamente concebíu pa la interpretación de música en directu. Nun futuru prósimu, a eses dotaciones habrá que-yos añadir una sala con equipos de grabación. La nueva Casa de la Música de Mieres, que güei foi inagurada de forma oficial por Álvarez Areces, pon fin a la ‘diáspora’ d’alumnos por estremaos centros educativos de la villa y acaba coles severes llimitaciones d’espaciu que-yos imponía la Casa de Cultura a los estudiantes de música del conceyu. Discursu del alcalde de Mieres na inaguración 3 de payares, 2004 0 FacebookTwitterPinterestEmail
Patrimoniu Cultura impulsa’l Muséu de la Llechería, en Morcín, con una ayuda de 3.600 euros by asturnet 2 de payares, 2004 Un total de 3.600 euros pa da-y puxu al Muséu Etnográficu de la Llechería, allugáu en La Foz de Morcín. La Conseyería de Cultura, Comunicación Social y Turismu destina esa cantidá a sufragar los seguros, suministros, comunicaciones y gastos d’alquiler del equipamientu, y subvenciona con otros 2.200 euros infraestructures del Muséu Vaqueiru de Naraval, en Tinéu. Dientro de la convocatoria d’ayudes económiques a museos y colecciones museográfiques de titularidá privada, Cultura reparte el total de les subvenciones ente cuatro museos: El de la Llechería, el de Naraval, el Muséu Tixeleiro -pa cuyu inventariu s’empobinen 4.100 euros- y l’equipamientu xixonés ‘Evaristo Valle’. Ye esti centru cultural el que lleva la mayor parte de les perres concedíes pola Conseyería: 9.000 euros pa sufragar los costos de la esposición ‘Evaristo Valle, el paisaje religioso’, y otros 2.700 pal caltenimientu de talleres educativos entamaos pol muséu. Según publicó’l Boletín Oficial del Principáu d’Asturies (BOPA) na so edición del sábadu pasáu, la inversión pública nel Muséu de la Llechería destinaráse al pagu de seguros, alquiler y factures d’agua, lluz y teléfonu del centru, mientres que nel casu’l Muséu Vaqueiru de Naraval l’ayuda de Cultura sufraga l’alquisisicón d’una alarma y un sistema d’estintores; el pagu del suministru elléctricu, y la edición de cartafueyos promocionales del centru. 2 de payares, 2004 0 FacebookTwitterPinterestEmail
Emigración Setenta alumnos estrenen en Madrid y Chile los cursos d’asturianu empobinaos a emigrantes by asturnet 2 de payares, 2004 Setenta persones deprenden asturianu a partir de güei en Madrid, Alcobendas y Valparaíso. La Conseyería de Xusticia, Seguridá Pública y Relaciones Esteriores y l’Academia de la Llingua espresaron esta mañana n’Uviéu la so previsión de qu’alumnos de Suiza, Uruguay, Bélxica, Canarias y Alicante se sumen nuna segunda fase al programa formativu, recoyíu nel Plan Integral d’Emigración del Principáu pa 2004-2007. La capital del Estáu y el municipiu tamién madrilanu d’Alcobendas, onde güei empezarán les clases, axuntarán a 50 alumnos -25 en cada llocalidá-, mientres que’l cursu de Valparaíso (Chile) contará con venti escolinos y echará a andar el prósimu llunes. El Gobiernu autonómicu afitara un númberu mínimu de 15 alumnos por centru asturianu pa entamar un cursu de Llingua, cifra que nun s’algamó en delles de les solicitúes recibíes na Conseyería que dirixe Francisco Javier García Valledor. Los monográficos formativos, que se desendolcarán hasta fin d’añu hasta completar les 90 hores llectives, atrayerán tanto a estudiantes universitarios como a persones d’edá avanzada con conocimientos fondos de la realidá cultural asturiana, según precisó esta mañana n’Uviéu Pablo Xuan Manzano, representante de l’Academia de la Llingua, na presentación pública de los cursos. Nesa mesma comparecencia, García Valledor defendió la iniciativa como una rempuesta a la demanda de los emigrantes asturianos por caltener vives la so llingua y cultura, y eloxó a les comunidaes d’emigraos fuera’l Principáu como un “exemplu d’asturianismu y d’asturianía”. Los cursos de llingua y cultura asturianes pa emigrantes qu’agora empiecen cuenten con precedentes en Montevideo y Gran Canaria, pero reactívense, según Manzano, “d’una manera más reglada y organizada”. Noticia d’archivu: El nuevu Plan d’Emigración prevé cursos d’asturianu ‘on line’ ya un estudiu sobro l’éxodu de la mocedá 2 de payares, 2004 0 FacebookTwitterPinterestEmail
Lliteratura Sepúlveda regresa a les novedaes de les llibreríes con un relatu ‘a cuatro manes’ sobro Sudamérica by asturnet 2 de payares, 2004 Luis Sepúlveda vuelve con obra nueva a les llibreríes. L’escritor chilenu, afincáu en Xixón y director del Salón del Llibru Iberoamericanu d’esta ciudá, enfótase nos caberos preparativos promocionales pa sacar mañana a la venta ‘Los peores cuentos de los Hermanos Grim’, una novela escrita en comuña col autor uruguayu Mario González Aparaín que recrea, dende l’humor, la vida de dos recitadores d’hestories n’Arxentina ya Uruguay. Nun exerciciu lliterariu qu’evoca les condiciones de vida nesi llugar del planeta hai más d’ocho décades, Sepúlveda y González Aparaín empleguen como filu conductor de la narración les figures de dos hermanos, Caín y Abel Grimm, qu’algamen el so sustentu recitando hestories a pie de cai. Les andances de dambos personaxes, denominaos ‘payadores’ -contadores d’hestories en versu- na tradición de la Pampa y la Patagonia, asoleyaránse primero en castellán, la llingua orixinal na que foi concebíu el relatu, y tornaránse depués a otros idiomes, ente ellos el francés, el portugués y el italianu. Exiliáu de la dictadura chilena depués del güelpe militar d’Augusto Pinochet en 1973 y creador tamién nel ámbitu del cine, Luis Sepúlveda (Ovalle, 1949) ye ún de los autores en castellán más lleíos y tornaos d’Europa. Ente los sos títulos más destacaos figuren ‘Un viejo que leía novelas de amor’ (1992), ‘Mundo del fin del mundo’ (1994), ‘Patagonia Express’ (1995), ‘Historia de una gaviota y del gato que le enseñó a volar’ (1996), ‘Historias marginales’ (2000), y ‘Hot Line’ (2002). El pasáu 4 d’agostu, Sepúlveda presentó en Xixón la qu’hasta agora ye la so última obra publicada, ‘Moleskine’, resultáu de trescribir tres cuadernos de notes sucesivos nos que l’autor d’orixe chilenu axuntó testos mui diversos baxo’l denominador común de caltener viva la capacidá de plasmu. 2 de payares, 2004 0 FacebookTwitterPinterestEmail
Sociedá L’interés por crear oficines llocales de normalización espárdese pel occidente y la cuenca’l Nalón by asturnet 2 de payares, 2004 Cuideiru, Muros, Pravia, Salas, Sotu’l Barcu y Samartín del Rei Aurelio. El director de la Oficina de Política Llingüística del Principáu, Ramón D’Andrés, mantién contactos con representantes d’esos seis ayuntamientos -los cinco primeros axuntaos na Mancomunidá de les Cinco Villes- pa estudiar la creación de nuevos departamentos llocales de promoción del asturianu. Según confirmó D’Andrés, tanto los conceyos del llitoral occidental como’l municipiu de la cuenca’l Nalón amosaron el so interés pola posibilidá d’echar a andar sendos servicios de normalización, una iniciativa na que yá trabayen -nos sos respectivos ámbitos- los ayuntamientos de Llanes, Mieres, Avilés y Cangas de Narcea. Talu interés cuadra col plantegamientu del director de la Oficina de Política Llingüística pal presente cursu políticu, nel qu’esi departamentu contará con un aumentu presupuestariu d’un 20 por cientu que D’Andrés quier empobinar básicamente a sufragar la normalización del asturianu nos conceyos: Esa ye la “prioridá absoluta”, en pallabres del titular de la Oficina Política Llinguística. Ramón D’Andrés asistió esta mañana n’Uviéu a la presentación de los cursos d’asturianu que’l Gobiernu autonómicu imparte a partir de güei, en comuña cola Academia de la Llingua, en centros d’emigrantes allugaos en Madrid y Chile. 2 de payares, 2004 0 FacebookTwitterPinterestEmail
Plástiques Ibarrola perfila les idees coles que va entamar la segunda fase de los sos Cubos de la Memoria by asturnet 1 de payares, 2004 L’escultor vascu Agustín Ibarrola afirmó na so visita a Llanes tener “un puertu enteru de cubos” na cabeza y que’l so deséu a propósitu de la obra entamada nes escolleres del rompefoles de la villa oriental asturiana yera la de ponese al llabor de facer medrar la so creación en cuantes llegara la ocasión. Ibarrola visitó la capital del conceyu llaniscu invitáu nel marcu de la celebración de la “folixa del tardíu” que lleva’l nome de la obra del artista guipuzcuanu. Los vecinos de la villa corita recibieron en plenu festeyu de la IV edición de ‘Llanes al cubo’ una bona noticia de llabios d’Agustín Ibarrola, la de que piensa ampliar la so obra nel puertu col fin de dar calce sueltu a bien d’idees creatives que foi concibiendo pa plasmar nesta escultura al aire llibre entamada nos cubos d’hormigón de la escollera. Dende l’iniciu de la obra en 2000 los cubos d’Ibarrola conviertiéronse nun de los mayores atractivos del conceyu p’atraer la llegada de visitantes turísticos, una de les principales fontes d’ingresu nesta zona de la costa oriental. Agora l’ampliación de la obra abierta va suponer un incentivu inda más grande pal interés que vien suscitando la escultura d’Agustín Ibarrola. El so calter d’obra abierta non namás ye un propósitu del artista vascu sinón dalgo inxerío al propiu calter del so trabayu, espuestu a los emburriones del mar bravu de Llanes, que faen necesariu el caltenimientu constante de les pintures estampaes nos cubos. Los motivos pintaos na escollera aluden a la hestoria y cultura del conceyu: el so pasáu marineru, la emigración a América, el so patrtimoniu hestóricu y arqueolóxicu, etc. Ibarrola acudió de nuevu al llugar d’una de les sos obres más emblemátiques pa participar na inauguración de l’amuesa: ‘Memoria de los artistas.Ibarrola/Marinero’ que’l diseñador de moda Miguel Marinero espón na Casa de Cultura de Llanes con creaciones suyes inspiraes nos cubos del escultor. 1 de payares, 2004 0 FacebookTwitterPinterestEmail
Sociedá L’Axencia de Cooperación al Desarrollu publica el so Plan Cuatriañal by asturnet 30 d'ochobre, 2004 L’Axencia Asturiana de Cooperación al Desarrollu, dependiente de la Conseyería de Xusticia y Esteriores, acaba d’imprentar el so Plan Cuatriañal col envís de remitilu a les organizaciones y colectivos que collaboren coles actuaciones d’esti departamentu autonómicu. Les acciones encarrilaes pola Axencia tienen el doble fin d’ufiertar ayuda humanitaria a les poblaciones víctimes de catástrofes naturales o provocaes por gobiernos y al empar a favorecer el desenvolvimientu económicu y social de países con crisis estructurales. El Plan Cuatriañal qu’agora se publica aprobóse nel Conseyu Gobiernu del Principáu el 15 d’abril de 2004 y supón el marcu de referencia global enriba de cuyos principios oriéntase la política de cooperación de l’Administración Asturiana colos pueblos más desfavorecíos del mundu. Les modalidaes d’actuaciones nes que s’articula el Plan son tres: un programa de proyectos de desarrollu, otru empobináu a l’ayuda humanitaria y un tercer plan destináu a llabores d’educación y sensibilización. Ente les prioridaes qu’establez l’Axencia de Cooperación pa orientar los proyectos patrocinaos tán les de considera preferente l’atención a les poblaciones con menos nivel de desenvolvimientu y a aquelles que caltienen cola nuestra comunidá vínculos hestóricos, culturales o d’amistá. En cuantes a los conteníos de los proyectos valoraránse aquellos que contribuyan non namás a les atenciones primaries de les poblaciones afectaes sinón los qu’amás incidan na igua de les situaciones de desigualdá social o econónica, asina como les actuaciones encarrilaes a educar y atender a la población en materia de salú y midíes sanitaries preventives. Los dos exes pelos que se desenvuelven les actuaciones propuestes pola Axencia son la cooperación institucional con entidaes públiques territoriales y organismos internacionales, y per otru llau la cooperación de convocatories públiques. El Plan Cuatriañal contempla actuaciones temporalizaes dica 2007. 30 d'ochobre, 2004 0 FacebookTwitterPinterestEmail
Hestoria Un trabayu analiza les relaciones ente’l movimientu obreru y la llingua asturiana by asturnet 30 d'ochobre, 2004 El movimientu obreru asturianu nun foi ayenu a la realidá llingüística y cultural del país onde desenvolvía la so llucha pola emancipación de los trabayadores. Esta ye la principal conclusión a la que llega l’hestoriador Rafael Rodríguez Valdés nun trabayu nel qu’analiza la presencia de la llingua asturiana nes publicaciones y actos de les organizaciones d’izquierdes y el mesmu usu oral que se facía de la llingua nun contestu social predominantemente asturfalante. L’estudiu publicáu dientro la colección ‘Folletos de Historia’ del Atenéu Obreru de Xixón lleva’l títulu de ‘Llingua asturiana y movimientu obreru’. Nél investígase la presencia del asturianu nun periodu clave pa la formación y espardimientu de les organizaciones d’izquierdes, el comprendíu ente 1899, tres la perda de les colonies españoles n’Ultramar, y 1937, fecha de la caída del frente republicanu n’Asturies.La intención al entamar esti estudiu -declaró’l so autor na presentación de la obra esti viernes 29 en Xixón- foi la de “desmontar dellos mitos que veníen circulando alrodiu de la escasa, cuando non nula, vinculación de la izquierda hestórica d’Asturies cola llingua y la realidá cultural del país”. N’opinión de Rodriguez Valdes a estos prexuicios tienen contribuío sobremanera “tanto los propios hestoriadores como alcuando posiciones ideolóxiques interesaes” de l’Asturies actual. Del resultáu d’esta busca l’hestoriador xixonés atopó una resaltable presencia de la llingua tanto en publicaciones y panfletos de les organizaciones d’izquierdes, como sobremanera na prensa de la dómina que “cuasi siempre espeya a los dirixentes y militantes obreros falando n’asturianu”, l’idioma que según l’autor d’esti trabayu “emplegaben esos homes na so vida cotidiana y por supuesto al dirixise públicamente a una xente predominantemente asturfalante”. Ente los afayos resaltables d’esta investigación Rafael Rodríguez Valdés fizo mención de les versiones alcontraes de La Internacional y otros himnos revolucionarios n’asturianu. El folletu “Llingua asturiana y movimientu obreru” forma parte d’un trabayu d’investigación en marcha del hestoriador xixonés y presentóse nos locales de la entidá editora del mesmu, l’Atenéu Obreru de Xixón esti viernes 29. Unos díes enantes Rodríguez Valdés ufiertara un adelantru del conteníu del so trabayu nel marcu de les Xornaes Internacionales d’Estudiu de l’Academia de la Llingua Asturiana celebraes na facultá de Filoloxía d’Uviéu. 30 d'ochobre, 2004 0 FacebookTwitterPinterestEmail