2004

La llingua asturiana ve pasar otru tren p’hacia la reconocencia n’Europa. El presidente’l Gobiernu central, José Luis Rodríguez Zapatero, confirmó qu’entregará personalmente a les autoridaes comunitaries les tornes de la Constitución Europea -firmada güei en Roma- a los idiomes catalán, vascu y gallegu. Los testos yá tán redactaos y llistos pal so unvíu.

Momentos depués d’estampar la so firma na primer Carta Magna d’ámbitu européu xunta la d’otros 24 xefes de Gobiernu d’otros tantos países de la Unión, Zapatero precisó que les traducciones del testu a los idiomes cooficiales del Estáu tán yá ellaboraes, y espresó la so intención d’entrega-yles formalmente a la secretaría xeneral del Conseyu Européu, na prósima xuntanza d’esi muérganu.

Con esi xestu, polémicu nel ámbitu’l catalán pola ausencia d’una torna estremada en valencianu, la llingua asturiana pierde una gran oportunidá p’algamar una reconocencia al más altu nivel por parte de les instituciones comunitaries, yá que cualquier torna al asturianu que se faiga de la nueva Constitución nun tendrá valor oficial.

Esti estremu yá lu avanzara, hai agora un mes, el secretariu d’Estáu pa la Unión Europea, Alberto Navarro, secretariu d’Estáu pa la Unión Europea, Alberto Navarro, que nuna carta empobinada al conseyeru de Xusticia, Seguridá Pública y Relaciones Esteriores del Principáu, Francisco García Valledor, afitaba’l deséu del ministeriu d’Esteriores de que l’asturianu seya oxetu d’una atención “especial” na UE pero negaba la posibilidá de consideralu como llingua oficial n’Europa.

Valledor reclamara previamente, nuna misiva empobinada al titular d’Esteriores, Miguel Ángel Moratinos, la validez oficial del asturianu na Unión Europea, validez qu’agora va quedar condicionada a una espresión xenérica na parte final de la Constitución que compromete “especial procuru” con toles llingües europees.

Moratinos defende que l’asturianu va ser oxetu d’especial atención nes instituciones comunitaries

La Conseyería de Xusticia, Seguridá Pública y Relaciones Esteriores del Principáu busca’l conseyu directu de l’Academia de la Llingua en duldes sobro l’usu del asturianu y los nomes tradicionales de llugar. El departamentu que dirixe Francisco Javier García Valledor prepara un conveniu cola entidá académica pa entamar cursos d’asturianu empobinaos a emigrantes.

El documentu, que según les previsiones del Gobiernu autonómicu firmaráse’l prósimu martes y compromete l’asesoramientu de l’Academia, invita a esa entidá a designar los profesores de los cursos previstos nel Plan d’Emigración pa espardir la cultura asturiana ente los emigraos, tanto nos monográficos presenciales como nos que van impartise on-line.

En términos asemeyaos al conveniu rubricáu en setiembre pasáu ente la institución académica y l’Ayuntamientu de Xixón, el testu del alcuerdu ente l’Academia y la Conseyería de Xusticia -pendiente inda d’igües y precisiones d’última hora- alita a la entidá presidida por Ana Cano a difundir los sos fondos editoriales al traviés de la Conseyería, y afita una duración d’un añu pal conveniu, prorrogable automáticamente.

Asinamesmo, la Conseyería de Xusticia -una de les dos qu’ostenten Izquierda Xunida-Bloque por Asturies- aprovecha la firma del alcuerdu cola Academia de la Llingua pa facer una declaración d’intenciones: L’organismu tuteláu por García Valledor comprométese a siguir retulando y editando testos institucionales en llingua asturiana.

Los cursos d’asturianu pa emigrantes son una de les iniciatives previstes nel Plan Integral d’Emigración 2004-2007 que’l Gobiernu autonómicu aprobó el pasáu mes d’agostu, con una inversión global de más de 14 millones d’euros d’equí a 2007 p’actuar en cinco estayes: atención sanitaria a emigrantes, promoción social de los asturianos retornaos, acciones pa la mocedá emigrao, ayudes a les comunidaes asturianes y promoción d’Asturies nel esterior.

El nuevu Plan d’Emigración prevé cursos d’asturianu ‘on line’ ya un estudiu sobro l’éxodu de la mocedá

Les XXIII Xornaes Internacionales d’Estudiu de l’Academia la Llingua peslláronse ayer con una conferencia de la profesora de la City University of New York (CUNY) y escritora asturiana Paquita Suárez Coalla alrodiu de la relación ente la lliteratura entamada n’idiomes minorizaos y la concencia llingüísitica y de clas. Na so esposición comparó la situación del asturianu nel movimientu emerxente del Surdimientu col desenvolvimientu nos Estaos Uníos de la lliteratura n’español y en spanglish.

Embaxo’títulu de ‘La escritura dende llingües amestaes: oralidá, lliteratura y clase social’, la profesora Suárez Coalla ufiertó na última sesión de les Xornaes d’Estudiu un esclarecedora esposición de les causes que lleven a dellos escritores a crear la so obra lliteraria n’idiomes minorizaos, ente les que resaltó la so toma de concencia llingüística, de clas o política. La ponente recurrió a la so propia esperiencia como autora n’asturianu y al casu de los escritores latinos de los Estaos Uníos n’español y en spanglish, pa desplicar como esa escoyeta personal d’idioma d’espresión ye una decisión consciente y deliberada de los propios autores col procuru de reafirmar la so identidá d’orixe énte la cultura dominante (l’anglosaxona nos Estaos Uníos, la española n’Asturies).

Paquita Suárez Coalla estremó al empar la situación del español y la del spanglish, el primeru inda minorizáu y consideráu pola sociedá norteamerica patrimoniu de clases inferiores, cuenta col respaldu esterior del español nel mundu como idioma de prestixu y importante tradición cultural. El spanglish, un amestáu que cada vez s’empieza a considerar un nuevu idioma en formación, atópase nuna situación de doble rechazu: por parte de la cultura n’inglés y tamién polos intelectuales de la cultura oficial en castellano (tanto n’América, como sobremanera n’España. Esti amestáu ye una forma d’espresión fundamentalmente oral, cada vez más estendida ente la xente hispano, inda cuenta con una nónima resaltable d’escritores y artistes que se valen del spanglish pa desenvolver los sos trabayos, énte la marxinación y el silenciamientu oficiales. La profesora Suárez Coalla remembró l’asemeyanza d’esta situación y la vivida hasta feches bien recientes pola lliteratura n’asturianu y evocó la so propia esperiencia cuando decidió escribir en llingua asturiana depués de conocer la postura qu’adoptaben los escritores hispanos que refugaben espresase n’inglés y a toles ventayes arreyaes a esta llingua, pa facelo na llingua de la so comunidá identitaria, asumiendo voluntariamente les consecuencies negatives que pudiera acostinar la decisión pal espardimientu de la so obra.

Paquita Suárez Coalla, natural de Grullos de Candamo, ye autora de dos obres de narrativa real n’asturianu: “La mio vida ye una novela”(Trabe, 2001) y “Pa nun escaeceme”(Trabe, 2003), nes que recueye testimonios orales de la vida de muyeres campesines del so llugar. Entrambos llibros escribiéronse en Nueva York, onde la so autora, confesó disponer del distanciamientu necesariu y tamién de la señaldá y el sentimientu de cercanía dica los sos oríxenes pa entamar estes obres, poco frecuentes na lliteratura asturiana actual y avezaes n’otres lliteratures minorizaes como la escrita n’español y spanglish nos Estaos Uníos.

Enantes de Suárez Coalla, intervinieron na última sesión de les Xornaes, l’antropólogu y académicu de la Llingua Roberto González-Quevedo, cola conferencia “Símbolos de sangre” y nel apartáu de les comunicaciones, el director d’ASTURNEWS Próspero Morán que faló de les posibilidaes del periodismu alternativu del weblog nes llingües minorizaes dientro’l contestu de la llamada economía de l’atención. Otres comunicaciones presentaes foron les de Rafael Rodríguez Valdés: ‘Llingua asturiana y movimientu obreru’; Xosé Lluis Campal, Xuan Porta y los arqueólogos Aníbal González, Hermenegildo Bardio y Javier Fernández.

La presidenta de l’Academia de la Llingua Ana Cano peslló les Xornaes congrutulándose del nivel y la calidá de los trabayos espuestos y aprovechando’l tema de la conferencia de Paquita Suárez Coalla fizo un brinde a los escritores n’asturianu pa que siguieran desenvolviendo la so obra na nuestra llingua ensin dexase estelar pola tentación d’abandonala pol castellao: “que ya tien abondos escritores -ironizó Cano- y nós pocos, toos necesarios pal desenvolvimientu de la llingua asturiana”.