Setenta alumnos estrenen en Madrid y Chile los cursos d’asturianu empobinaos a emigrantes

Setenta persones deprenden asturianu a partir de güei en Madrid, Alcobendas y Valparaíso. La Conseyería de Xusticia, Seguridá Pública y Relaciones Esteriores y l’Academia de la Llingua espresaron esta mañana n’Uviéu la so previsión de qu’alumnos de Suiza, Uruguay, Bélxica, Canarias y Alicante se sumen nuna segunda fase al programa formativu, recoyíu nel Plan Integral d’Emigración del Principáu pa 2004-2007.

La capital del Estáu y el municipiu tamién madrilanu d’Alcobendas, onde güei empezarán les clases, axuntarán a 50 alumnos -25 en cada llocalidá-, mientres que’l cursu de Valparaíso (Chile) contará con venti escolinos y echará a andar el prósimu llunes. El Gobiernu autonómicu afitara un númberu mínimu de 15 alumnos por centru asturianu pa entamar un cursu de Llingua, cifra que nun s’algamó en delles de les solicitúes recibíes na Conseyería que dirixe Francisco Javier García Valledor.

Los monográficos formativos, que se desendolcarán hasta fin d’añu hasta completar les 90 hores llectives, atrayerán tanto a estudiantes universitarios como a persones d’edá avanzada con conocimientos fondos de la realidá cultural asturiana, según precisó esta mañana n’Uviéu Pablo Xuan Manzano, representante de l’Academia de la Llingua, na presentación pública de los cursos.

Nesa mesma comparecencia, García Valledor defendió la iniciativa como una rempuesta a la demanda de los emigrantes asturianos por caltener vives la so llingua y cultura, y eloxó a les comunidaes d’emigraos fuera’l Principáu como un “exemplu d’asturianismu y d’asturianía”.

Los cursos de llingua y cultura asturianes pa emigrantes qu’agora empiecen cuenten con precedentes en Montevideo y Gran Canaria, pero reactívense, según Manzano, “d’una manera más reglada y organizada”.

Noticia d’archivu: El nuevu Plan d’Emigración prevé cursos d’asturianu ‘on line’ ya un estudiu sobro l’éxodu de la mocedá