Patrimoniu Los estudiosos aconceyaos n’Uviéu reclamen un inventariu y más promoción pa los horros by asturnet 30 de payares, 2004 Un inventariu precisu, midíes afayadices de recuperación y más promoción. Los espertos aconceyaos nel primer congresu monográficu sobro l’horru asturianu, que se pieslla güei, reclamen una intervención más activa de les autoridaes públiques pa conservar, recuperar y da-y puxu al singular graneru eleváu como elementu cultural asociáu a la identidá d’Asturies. Amás de proponer la ellaboración d’un catálogu d’horros, participantes na xuntanza debatieron esta mañana la diferencia ente la simple igua o restauración de los graneros autóctonos y la recuperación global d’eses construcciones acordies con planes precisos pa reforzar tanto la presencia d’horros nel Principáu, como el respetu d’estos graneros a los cánones tradicionales de construcción. Nel congresu, que tuvo la so sé de sesiones nel Auditoriu ‘Príncipe Felipe’, n’Uviéu, asoleyóse amás l’empeoramientu de la calidá de la maera de castañal, ún de los materiales emplegaos pa edificar los horros y qu’anguaño sufre estremaes enfermedaes qu’obliguen a marafundiar gran parte de la maera valtiada en monte, que tien un preciu n’orixen d’hasta 90 euros por tonelada. Nes dos xornaes de comunicaciones y alderiques, los participantes na xuntanza monográfica llanzaron, ente otres propuestes, la promoción del horru como elementu identitariu del Camín de Santiago pel norte, la recuperación combinada cola innovación y, mui especialmente, l’exame con criterios comunes de los alredor de 15.000 horros qu’hai n’Asturies pa plantegar midíes d’impulsu. Protexíu de forma especial na Llei de Patrimoniu, singular na so estructura de maera, orixinariu del sieglu XV y símbolu antañu de la prosperidá agrícola d’Asturies, l’horru ye la construcción tradicional ‘viva’ más presente nos pueblos y aldegues del Principáu, escluyendo les propies viviendes. 30 de payares, 2004 0 FacebookTwitterPinterestEmail
Patrimoniu El Parlamentu pide-y a Madrid que respete les sos prioridaes nos proyectos del 1 por cientu cultural by asturnet 30 de payares, 2004 El Principáu quier que se respeten les sos prioridaes nos proyectos financiaos col denomináu 1 por cientu cultural, obligación de cada ministeriu de reservar esi porcentaxe p’acciones culturales nes inversiones propies de más de 100 millones de les vieyes pesetes. Nuna proposición non de llei consensuada ente los dos partíos nel Gobiernu, PSOE ya Izquierda Xunida-Bloque por Asturies -con mayoría na Xunta Xeneral-, socilítase-y a la Conferencia sectorial de Cultura que prevalezan les prioridaes de toles comunidaes autónomes. Nel documentu, fecháu como proposición el pasáu 17 de payares, reclámase-y a l’Alministración central que, ente tolos proyectos del 1 por cientu cultural, s’executen con prioridá los que reúnan cuatro condiciones básiques: que se cumpla’l fin previstu pa esi tipu d’actuaciones con financiación ministerial, que s’actúe sobro edificios o elementos catalogaos como Bienes d’Interés Cultural, que’l proyectu tea sufragáu por varies Alministraciones y que se trate d’obres públiques. Esos criterios, precisen les dos fuercies polítiques que redacten la proposición non de llei, coinciden no esencial coles directrices trazaes n’ochobre pasáu pol Plenu’l Conseyu de Patrimoniu Nacional na so última xuntanza, cellebrada en Palma de Mallorca. La controversia sobre los proyectos con cargu al 1 por cientu cultural n’Asturies remóntase a la xestión de Francisco Álvarez-Cascos nel Ministeriu de Fomentu, departamentu que, por acometer grandes inversiones, tien un papel principal na reserva de fondos públicos pa proyectos culturales. Pesie a los sucesivos compromisos del ex ministru cuando taba nel Executivu, nos ocho años de gobiernu’l Partíu Popular, n’Asturies namás s’invirtieron 7 millones d’euros con cargu al 1 por cientu cultural, una cifra enforma menor a la comprometida y qu’amás repartióse acordies col collor políticu de los ayuntamientos: Tres cuartas partes del dineru recibiéronlu iniciatives allugaes en territoriu de corporaciones llocales gobernaes pol PP. Sólo siete de los 17 proyectos comprometíos pol PP p’Asturies siguen en pie: los remocicamientos de les cubiertes de la Catedral, el claustru’l monasteriu de San Pelayu, la Torre’l Reló de Castropol y el monasteriu de Corniana; la preservación del cascu hestóricu de Llastres; les obres na Casa Hevia, en Villaviciosa; y la fechura’l proyectu de recuperación del entornu de la ilesia de Santuyano, n’Uviéu. 30 de payares, 2004 0 FacebookTwitterPinterestEmail
Tecnoloxía L’Alministración autonómica remocica la so páxina web con cambios pa facilitar el so usu by asturnet 30 de payares, 2004 L’Alministración autonómica camuda’l so rostru n’internet. El Principáu activó güei la nueva versión de la so páxina web oficial, que pretende facilita-yos la navegación a los ya incorpora na portada, con una estética remocicada, accesos directos a l’axenda del Gobiernu, el Boletín Oficial del día y los sitios web más visitaos nel ámbitu de l’Alministración asturiana. D’esti mou, los usuarios qu’acceden dende esta mañana a la web, agospiada nel dominiu www.princast.es, siguen disponiendo d’un menú principal na manzorga de la páxina nel que se centraliza l’accesu a la información, pero la portada -a diferencia de lo qu’ocurría na anterior versión de la web- incorpora dellos accesos directos a información ciudadana útil, como la que s’ufre nel portal d’emplegu ‘Trabajastur’, na páxina turística ‘Infoasturias’ y nel sitiu educativu ‘Educastur’. Asinamesmo, la nueva distribución de conteníos de la web del Principáu apuesta por destacar dos apartaos: ún destináu a información d’actualidá y otru pensáu pa facilita-y a los asturianos les sos xestiones énte l’Alministración, con un serviciu incluyíu d’alertes informatives automátiques que, pol momentu, figura na páxina pero nun ta en funcionamientu. Amás de too ello, la nueva cara del l’Alministración asturiana na rede inclúi un buscador internu p’atopar información y concéde-y un llugar destacáu na portada al accesu a datos sobro tributos y sanciones. Tola información incorpórase, como hasta agora, únicamente en llingua castellana. 30 de payares, 2004 0 FacebookTwitterPinterestEmail
Plástiques El ‘Bellas Artes’ cuelga un cuadru de Dalí depués de nueve años p’afitar la so autenticidá by asturnet 30 de payares, 2004 Depués de nueve años, hai veredictu. El Muséu de ‘Bellas Artes’ d’Asturies colgó esta mañana na so colección permanente un cuadru de Salvador Dalí donáu a la institución en 1995 y sometíu llueu a un llargu procesu d’autentificación. La obra ‘Metamorfosis de ángeles en mariposa’, pintada sobro papel pol artista catalán en 1973, revaloriza los fondos de la principal pinacoteca asturiana y faila “privilexada”, según destacó el director del muséu, Emilio Marcos. Al so xuiciu, al gran valor que-y da al cuadru tar firmáu por Dalí hai que-y sumar amás que ye una obra de grandes dimensiones -140 por 200 centímetros-, “de les mayores que yo conozo pintaes en papel”, precisó Marcos, quien sorrayó que siempre ye enforma difícil pa un muséu contar en propiedá con una obra del xeniu catalán. La pieza llegó a la pinacoteca uvieína en 1995, dientro de la colección d’arte que Pedro Masaveu cedió a l’Alministración autonómica como pagu d’impuestos, y dende entós sometióse a una complicada xera d’autentificación a cargu del espertu Ricard Mas, qu’a la fin certificó que n’efectu se trata d’una obra de Salvador Dalí. El cuadru, una alegoría del amor humanu y divinu ente la muerte y la vida, ye n’opinión de la conseyera de Cultura, Ana Rosa Migoya, una pieza “única y singular” que se cuelga amás nun momentu propiu pa ello: Nel mesmu añu en que se conmemora el centenariu’l nacimientu del pintor de Figueres. Dientro’l so procesu de recuperación y catalogación de la pintura asturiana, el Muséu de ‘Bellas Artes’ inagurará el 21 d’avientu prósimu una esposición integrada por 159 obres de 19 pintores asturianos del primer terciu’l sieglu XX, amuesa qu’acompañará a la edición del correspondiente catálogu. Pa 2005, la pinacoteca pública prepara una esposición d’Orlando Pelayo al traviés de les 58 obres d’esi autor que custodia el muséu. 30 de payares, 2004 0 FacebookTwitterPinterestEmail
Cine Una vuelta de tuerca dica la verdá fría y desnuda by asturnet 30 de payares, 2004 Acabante casi d’estrenar la so película musical “Divina lluz”(2004) sobro’l discu del mesmu títulu de Mus, Ramón Lluis Bande presentó nel ciclu Llendes del Festival de Cine de Xixón el so últimu trabayu: ‘De la fuente’, un mediometraxe documental sobre l’alcordanza de la revolucionaria asturiana Aida de la Fuente. Rodada en namás dos planos-secuencia, la película de Bande tenta somorguiase na busca del mitu Aida al través del testimoniu oral de la única hermana superviviente de la heroína comunista y a onde lu empobina el so camín ye a los oríxenes, cuando’l mitu yera realidá, aquella “neña que xugaba a la comba” y “saltaba les barricaes” del cantar popular, la que Pilar de la Fuente conoció cercana. La segunda parte del documental contrasta o complementa el relatu de Pilar cola interpretación respigante del cantar popular na voz de Mari Luz Cristóbal Caunedo. El testimoniu de la hermana d’Aida ye amosáu por Bande dende un planu fixu con enfoque viráu al estremu de la imaxe col fin de llantar la distancia necesaria pa que lo emocional nun interfiera ente la protagonista y l’espectador. Nél Pilar de la Fuente fala de la revolucionaria pero sobretoo de la so familia, una familia pequeño burguesa d’Uviéu consagrada a la militancia nel Partíu Comunista y que tres la muerte d’Aida, na guerra civil sufrió les terribles consecuencies de la represión por ser los familiares de de la Fuente hasta quedar prácticamente aniquilada: namás sobrevivió Pilar. Ye la hestoria tamién d’unes xeneraciones enfotaes nel sueñu de la revolución social y derrotaes después pol facismu, décades enantes de que los volviere derrotar la realidá. El relatu de Pilar de la Fuente, espresáu con una sobriedá averada a la xelidez, ayuda al propósitu de Bande de centrar el documental únicamente na hestoria y los protagonistes d’ella, ensin interferencies superflues que desvirtúen la realidá filmada, la mesma hestoria. El realizador xixonés nuna posición radical énte los usos comunes del documental clásicu cree nel poder de les palabres, el testimoniu y la memoria de los protagonistes directos d’una hestoria tienen pa Bande la lexitimidá verdadera, son ellos los que vuelven a vivir lo relatao nel momentu que lo recuerden. Una vuelta de tuerca más dica la obstinada busca de Ramón Lluis Bande en procuru de la verdá fría y desnuda, de la realidá. 30 de payares, 2004 0 FacebookTwitterPinterestEmail
Cine El documental garra pesu nel Festival de Xixón cola proyección de dos obres sobre el 11-M y Aida Lafuente by asturnet 30 de payares, 2004 L’alcordanza de la revolucionaria Aida Lafuente o un repasu, en 23 curtiumetraxes, a los atentaos islamistes de Madrid. El 42 Festival Internacional de Cine de Xixón abre’l so abanicu al documental hestóricu y d’actualidá y proyecta un mediumetraxe de Ramón Lluis Bande sobro la militante comunista asesinada n’Uviéu en 1934 y una suma de güeyaes al rodiu del 11-M a beneficiu de les víctimes de los sucesos de Madrid. Col estrenu de ‘De la Fuente’, que se pasará a les 22,30 hores nos Cines Centro como prolegómenu del llargu ‘Five’, d’Abbas Kiarostami, Bande pretende afondar nel so repasu cinematográficu a la memoria hestórica d’Asturies al traviés d’una pieza de 34 minutos de duración, grabada nun solu planu, col testimoniu de la única hermana sobreviviente de la revolucionaria, Pilar de Lafuente. El realizador asturianu, autor ente otros trabayos de la cinta ‘Estratexa’, quier poner al algame del públicu “el testimoniu y la presencia de los auténticos protagonistes de la hestoria contada, ensin dala interferencia d’elementos ayenos a esi relatu”, y alluga a la relatora nun llateral del planu pa que’l públicu centre la so atención na hestoria en cuenta poner l’atención na espresión conmovida de la narradora. Nel mesmu complexu cinematográficu, pero en sala distinta y a les 22,15 hores, el Festival de Xixón proyecta el documental collectivu ‘Madrid 11-M, todos íbamos en ese tren’, una suma de 23 curtios d’otros tantos autores que, con una duración d’ente 3 y 5 minutos por pieza, reivindica l’alcordanza de les víctimes de los atentaos islamistes y revisa los ataques col mensaxe central del refugu al terrorismu. La presentación del documental cuenta cola collaboración del Atenéu Obreru de Xixón y empobinará los beneficios obteníos pola venta d’entraes a les víctimes de los atentaos. Na sección oficial del festival, el teatru Xovellanos acueye esta nueche la proyección de les películes ‘Revolution of pigs’ y ‘The four’. Archivu. El realizador Ramón Lluis Bande remata un documental sobro Aida de Lafuente 30 de payares, 2004 0 FacebookTwitterPinterestEmail
Patrimoniu Ochenta espertos busquen propuestes cualificaes n’Uviéu pa una meyor conservación del horru by asturnet 29 de payares, 2004 L’horru, a debate. Unos ochenta espertos en patrimoniu y arquitectura popular debaten dende esta mañana n’Uviéu el valir cultural del singular graneru asturianu, nun congresu que se cellebra nel Auditoriu d’Uviéu y que no so primer xornada analizará el papel del horru na hestoria, na antropoloxía y nel arte autóctonos con ponencies, ente otros, de los estudiosos Juaco López, Armando Graña, María José Valle y Roberto González-Quevedo. Asina, depués de la inaguración formal del congresu, na que participaron estremaes autoridaes de la política y la cultura asturianes, el discutiniu arrancó con tres comunicaciones de José Ángel Rivas, Xuan Pedrayes y Pedro de Llano, mientres qu’a partir del mediudía el programa prevé la intervención d’otros cinco espertos pa falar de calterístiques orixinales de los horros del Valle’l Trubia, Quirós, Cuaña, Grao, Yernes y Tameza, Belmonte y Somiéu. La sesión de la tarde culminará con un alderique sobro los problemes d’estudiu y conservación del graneru autóctonu asturianu que tará moderáu por Gerardo Díaz-Quirós y contará cola participación del diseñador gráficu Ástur Paredes; el director del Muséu Etnográficu del Purblu d’Asturies, Juaco López; y los espertos Ignacio Ruiz de la Peña ya Ignacio Alonso. El congresu, qu’acabará mañana, martes, quier atropar información y propuestes cualificaes pa garantizar el caltenimientu del horru como elementu identitariu d’Asturies. Nes últimes dos décades, casi 3.500 horros foron remocicaos con ayudes de l’Alministración autonómica. Programa íntegru del Congresu 29 de payares, 2004 0 FacebookTwitterPinterestEmail
Lliteratura La Xunta d’Escritores pieslla reclamando más atención pa la lliteratura n’asturianu nes biblioteques by asturnet 29 de payares, 2004 Más atención pa la lliteratura n’asturianu nes biblioteques y mayor implicación del Principáu na dignificación de la figura’l creador. La Xunta d’Escritores peslló ayeri les sos puertes en Llanes con eses demandes, nuna asamblea qu’amás reconoció’l llabor de Conceyu Bable, dio-yos la bienllegada a los autores más mozos y reclamó la coficialidá de la llingua asturiana. Asina culminó un alcuentru de tres díes cuyu coordinador, Xuan Bello, calificó de “éxitu”, y qu’aconceyó a cincuenta representantes de les tres xeneraciones d’escritores n’asturianu. La más reciente d’elles protagonizó la xornada de pieslle, nun alderique centráu na necesidá de promocionar les obres énte’l públicu y evitar, en términos del xoven autor Pablo Rodríguez Medina, “escribir pa teatros vacíos y estanteríes llenes”. Esti mesmu autor proclamó la necesidá que, al so xuiciu, esiste de que la lliteratura asturiana se normalice dafechu -y, poro, haiga tamién novela ‘rosa’ o narraciones d’aventures en llingua asturiana-, y llamó a los sos compañeros d’oficiu a “buscar al llector envede buscanos a nosotros mesmos”. Les pallabres de Rodríguez Medina, y d’otros integrantes de la so xeneración, suscitaron un alderique qu’acabó dividiendo a los escritores énte la oportunidá d’abri-y mercáu a la lliteratura n’asturianu. Ausencia d’autoridaes La primer xuntanza de creadores lliterarios en llingua asturiana que se cellebraba depués de seis años d’ausencia d’alcuentros d’autores culminó, mesmo qu’empezara el pasáu vienres, ensin presencia d’altes autoridaes polítiques del Principáu, pesie a que la Xunta taba espresamente auspiciada pola Conseyería de Cultura, Comunicación Social y Turismu: Si a la ceremonia d’apertura namás asistieron el responsable de la Oficina de Política Llingüística, Ramón D’Andrés, y una representante del Ayuntamientu de Llanes -cuando taben previstes les intervenciones de l’alcaldesa y del director xeneral de Política Llingüística, Carlos Madera-, el pieslle realizóse ayeri ensin embaxada institucional dala. A lo llargo de tres díes, los cincuenta escritores aconceyaos nel Oriente analizaron la identidá de ca una de les xeneraciones d’autores, recuperaron l’alderique sobro la idoneidá d’una ambientación rural o urbana pa les narraciones ya intercambiaron opiniones al rodiu de la producción lliteraria n’asturianu. Archivu. La ruptura ente les distintes xeneraciones d’autores centra’l debate na Xunta d’Escritores 29 de payares, 2004 0 FacebookTwitterPinterestEmail
Cine El Festival de Xixón avanza ente’l nuevu cine arxentín y la transgresión con sellu francés by asturnet 29 de payares, 2004 Los actores que participen en llargumetraxes de gran difusión nun tienen por qué ser profesionales. El director arxentín Pablo Trapero, que presenta nel Festival Internacional de Cine de Xixón la so cinta ‘Familia rodante’, avaló güei esi estremu y reivindicó la so película como una producción mui cara y de montaxe complicáu. Como amuesa d’ello, recordó el realizador sudamericanu, el propiu rodaxe: Catorce selmanes con unes temperatures medies dacuando de 40 graos centígrados y la baxa prematura d’una anciana que, al superar el ‘casting’ como reserva de la propia güela’l director, qu’actúa na película, acabó nel hospital. “Naide nun s’enfotaba nel proyectu”, recordó Pablo Trapero, y esa falta d’apoyu financieru postergó el rodaxe durante años. De fechu, Trapero realizó antes otres películes -ente elles ‘El Bonaerense’- antes de filmar ‘Familia rodante’, que se proyecta esta nueche dientro de la sección oficial del Festival de Xixón y que narra el viaxe catárticu d’una familia al completo nuna caravana p’hacia la provincia de Misiones, nel estremu norte d’Arxentina. Pol so llau, Paulo Branco, productor de la políticamente incorrecta ‘Ma mère’ -hestoria d’incestu que antes d’aniciáu el rodaxe yá contaba con detractores-, recordó esta mañana que’l cine nun pue quedar en películes concebíes sólo “pa que la xente salga contenta del cine”, y defendió el cálter “duru, radical y violentu” de la cinta que concursa en Xixón. Tamién consciente de la polémica que’l llargumetraxe diba suscitar darréu s’estrenare, el coprotagonista de ‘Ma mère’, Louis Garrel, señaló la fonda dualidá con que foi acoyida la película en Francia -grandes detractores, grandes apasionaos- y ensalzó el llabor de la so compañera de repartu, la yá veterana Isabelle Huppert. 29 de payares, 2004 0 FacebookTwitterPinterestEmail
Cine L’agonía de los supervivientes by asturnet 29 de payares, 2004 El Festival de Cine de Xixón ufiertó na so sesión de nueche del domingu y nel ciclu ‘Llendes’ una de les sorpreses más interesantes de tolo qu’hasta agora se pudo ver nél. ‘Medrana'(2004), el primer llargometraxe de Juan Luis Ruiz, amosó que ya nun ye ocurrencia d’inxenuos pensar na posibilidá de la esistencia d’un cine asturianu y n’asturianu. Tamién que se puede tratar un tema como’l de les enfermedaes terminales ensin deformalo col filtru de la demagoxa o el tremendismu. Hestories d’enfermos d’esclerosis múltiple nun mundu que tamién agoniza de la mesma enfermedá: el mundu campesín asturianu. ‘Medrana’, escrita en collaboración con Llucía Herrera -como’l so anterior y celebráu trabayu, ‘Lluvina’-, fala de la llucha na que s’enfrenten la vida y la muerte coles sos poderoses enerxíes, una llucha de la que se conoz el resultáu final y la imposibilidá d’evitalu. Inda asina hailos que nun se resignen a entregase a la derrota y siguen lluchando con tola so fuerza porque saben que cada minutu de combate ye siguir nel llau de la vida. John Berger, l’autor de ‘Tierra puerca’, denunciaba a principios de los años setenta la muerte de la Europa campesina, una aceleración programada polos economistes de Bruseles de l’agonía que sufre dende hai décades, más d’un sieglu, el mundu campesín. A un espectador ayenu a la traxedia la llucha de los llabradores asturianos por siguir baldándose nuna tierra que nun tien otru destín prósimu que’l de convertise en prau o en tierra ermo, puede abultá-y tan inútil como’l d’un de los protagonistes de ‘Medrana’, Juan Ignacio, un casu emocionante del coraxe y la brenga cola qu’un enfermu terminal puede aferrase a la vida. ‘La raza de los supervivientes’ llamó John Berger a los campesinos y a esa raza pertenez Juan Ignacio y otros protagonistes de la película de Juan Luis Ruiz, xente avezada a nun concede-y nenguna tregua a la folganza o al desaliendu porque d’ello depende la so sobrevivencia. Crónica d’una muerte anunciada na que tamién cuerre poderosu’l ríu de la vida, simbolizáu equí pola constante presencia del agua en fontes, regatos, el mar, el molín nel que nació Juan Ignacio y que ye símbolu arriendes del molín que s’alimenta de la so propia capacidá de producir enerxía. El primer llargometraxe del tándem Juan Luis Ruiz y Llucía Herrera ye un testimoniu llúcidu y incómodu de l’agonía d’un mundu, d’unos homes, de nós mesmos qu’agora asistimos como conmovíos espectadores a una llucha con derrota que tamién ye la nuestra. Tamién nós sentimos medrana. 29 de payares, 2004 0 FacebookTwitterPinterestEmail