19 hosteleros d’Avilés participen na II edición de “Sabores de plaza en plaza”

El conceyal de Promoción de Ciudá, Manuel Riola, y el vicepresidente de UCAYC y responsable d’hostelería de l’asociación, Gonzalo Rodríguez, presentaron esta selmana pasada la segunda edición de la iniciativa turísticu-gastronómica “Sabores de plaza en plaza”, que se va desenvolver ente los díes 3 y 6 d’agostu impulsada pol Conceyu d’Avilés y Hostelería Contorna Avilés-UCAYC.

Un total de 19 establecimientos hosteleros de la ciudá van participar nesta edición, allugaos en 15 casetes distribuyíes en cuatro espacios singulares del cascu históricu d’Avilés: les places de Carlos Llobu, Domingo Álvarez Acebal, El Carbayo y El Carbayedo, qu’amás van cuntar cola ambientación musical de diversos grupos locales.

“Sabores de plaza en plaza” ye una iniciativa turísticu-gastronómica na que los hosteleros participantes ufierten tapes d’orixinal ya innovadora creación, coles curioses places del cascu históricu avilesín como escenariu. Los veceros van poder tastiar hasta dos propuestes gastronómiques distintes en cada caseta, acompañaes de vinu, cerveza o agua.

L’oxetivu d’esta iniciativa ye convertir el paséu y la visita a la ciudá nuna esperiencia distinta, conxugando la faceta gastronómica con ambientación musical itinerante poles cuatro places. Esta cita tien tamién l’oxetivu de reforzar y proxectar la imaxe turística de la ciudá como enclave ricu en propuestes culturales, gastronómiques y d’ociu.

Les 15 casetes van permanecer abiertes del 3 al 6 d’agostu n’horarios de 12 a 16 hores y de 20 a 24 hores. Cinco d’elles van tar instalaes na plaza d’Álvarez Acebal, cuatro na de Carlos Llobu, trés na del Carbayo y otres trés na del Carbayedo. El montaxe d’estes casetes va empezar nos próximos díes.

Los establecimientos participantes nesta edición son los siguientes:

Plaza del Carbayu:

El Tostón de Jon
El Pañol
El Fueru/El Vieyu Ábside Plaza del

Carbayedo

Places/Periquete Moma/Paparazzi

L’Antigua/-y Mystic

Plaza de Carlos Lobo

La Llosa/El  del Mediu Pizzería
La Competencia
L’Alfarería
El Cafetón

Plaza d’Álvarez Acebal

Merlot Vinos y Tapes
Syrah
El Café de Pandora
Puntu d’Alcuentru Apiñón
Bistró

Sortéu d’un viaxe pa dos

Como novedá nesta segunda edición de “Sabores de plaza en plaza”, los veceros que consuman tapes en cuatro establecimientos distintos van poder optar al sortéu d’un viaxe pa dos persones. Pa ello va haber de solicitar el selláu de los cuatro caxellos que, con esi oxetivu, apaecen nel folletu empón de “Sabores de plaza en plaza”. Los sellos tendrán de ser de cuatro casetes distintes, allugaes en siquier dos places distintes.