‘L’Asturianá. De la magia a la desolación’ nel Teatru de L’Entregu

El Teatru Municipal de L’Entregu acueye esta tarde a les 20:00 hores la presentación del llibru L’Asturianá. De la magia a la desolación, un estudiu profundu sobre la canción asturiana que pon al día la vixencia y la historia d’esti xéneru musical asturianu. El actu de presentación va contar cola presencia del autor, Oscar Roces Arboleya, de Gabino Busto Hevia y Pablo Rodríguez Medina, como presentadores, y coles actuaciones de Bibiana Sánchez García y Francisco José Fernández.

Óscar Roces Arboleya (La Texuca, Bimenes, 1963) presenta un ensayu fondu y estensu, que dacuando ye polémicu por esponer idees tresguesores y novedoses, pero siempre dende’l rigor y con argumentaciones de pesu. “L’Asturianá: De la Magia a la desolación. Un siglo de canción asturiana”, ye un llibru escritu en clave histórico-social y mui comprometíu, nel que’l so autor trata de facer homenax a la canción asturiana como ún de los heriedos de mayor importancia que nos llega de los nuestros antepasaos y como mediu de comunicación y espresión de la realidá socio-cultural asturiana.

Estructuráu en tres partes, analiza’l mundu de l’Asturianá y la so evolución dende munchos puntos de vista, dende l’analis de les sos lletres, les distintes escueles, el valor antropolóxicu, la realidá xeográfico-social, la téunica, les grabaciones, les categoríes, el papel de los concursos y les escueles.

Dende la maxa a la desolación, Óscar Roces, analiza y interpreta’l pasáu y el presente de l’Asturianá pa rematar definiendo’l so futuru como mui poco esperanzador pol devenir de la propia sociedá asturiana y pola falta d’escuela, causes que torguen tou tipu d’esperanza pa esti xéneru y falen d’un momentu de desolación nel que se fai necesario una intervención que posibilite la involución d’esta situación.