“Nomes d’Asturies” conviértese nun llibru didácticu

La Conseyería d’Educación y la RTPA editen a comuña un llibru con dvd sobre’l programa de radio-teatru de la RPA “Nomes d’Asturies” destináu a les clases d’asturianu. Nesti dvd inclúinse nueve programes, seis pieces d’otros programes con actividaes de comprensión oral, una antoloxía poética y una biblioteca d’efectos sonoros. La obra ta coordinada por Chechu García, director del programa y maestru.

Xunto a él participó na realización del llibru un equipu de profesores de Secundaria formáu por Pablo Rodríguez Medina, Mercedes Tarano Fondón, Monserrat Fueyo, Xermán Fierro y Azucena Álvarez. L’equipu d’ilustradores ta formáu por Alfonso Zapico, David Fernández, Xulio Arbesú, David Fernán, Carolina Calleja y Miguel Angel Chayán. El montaxe sonoru ye de Lucía Menéndez Díaz-Palacio y el propiu Chechu García.

La presentación celebróse’l pasáu miércoles 29 de xunu, a les 18:00 nel palaciu de Toreno, na Plaza Porlier, cuntando cola presencia del Conseyeru d’Educación y dellos directivos de la RTPA.

El resultáu d’estes unidaes didáctiques ye frutu d’un análisis del espaciu radiofónicu “Nomes d’Asturies”, un programa de la RPA qu’usa la fórmula de radio-teatru. Dellos capítulos de “Nomes d’Asturies”, esbillaos pol so valir pedagóxicu y educativu, van ser la base pa crear les unidaes didáctiques qu’agora asoleyamos.

El llibru permite averar al alumnu al trabayu sobre una antoloxía poética, al estudiu de guiones de radio o al propiu mundu técnicu d’esti mediu, ente otres xeres.

Según Chechu García “estes unidaes didáctiques tenten de ser una ferramienta moderna, útil y prestosa cola qu’estudiantes y profesores puedan trabayar la llingua asturiana dende un mediu de comunicación de mases como ye la radio”.