Tecnoloxía Telecable cumple diez años asitiando a Asturies ente les comunidaes cabezaleres na banda ancha by asturnet 12 de mayu, 2005 La empresa de telecomunicaciones asturiana Telecable celebra los diez años de la so esistencia con un actu que va celebrase esta tarde nel Auditoriu d’Uviéu y nel que va presentase’l llibru “Telecable 10 años” del periodista Eduardo García. Nel mesmu actu de conmemoranza del décimu aniversariu de la operadora Francisco Pardo pronunciará una conferencia titulada:”¿Y los prósimos diez años?”.Dende la so creación Telecable lidera n’Asturies el mercáu de les telecomunicaciones y tien asitiao a la nuestra comunidá ente les cabezaleres na banda ancha. La operadora asturiana celebra los sos diez años d’esistencia colos güeyos puestos nel futuru del sector n’Asturies y nel restu del estáu. En febreru d’esti añu l’Institutu Nacional d’Estadística facía públicu un informe sobre’l desenvolvimientu de les telecomuniaciones nel que se percontiaba a Telecable como la empresa líder na nuestra comunidá na prestación de servicios de banda ancha, superando a les conexones d’ADSL qu’ufierten otros competidores como Telefónica, Wanadoo o Ya.com. Según otru informe, de la so más directa competidora, Telefónica d’España, namás hai cinco comunidaes autónomas nes que los operadores de cable superen a la operadora nacional, y, d’elle, la diferencia más grande alcuéntrase n’Asturies. Les otres comunidaes son Cantabria, Murcia, País Valencianu y País Vascu. 12 de mayu, 2005 0 FacebookTwitterPinterestEmail
Tecnoloxía Mozilla gana-y la batalla a Internet Explorer en materia de seguridá by asturnet 28 de marzu, 2005 Internet Explorer, el programa más usáu del mundu ya nun ye’l más seguru. Asina lo aseguren entrambos informes elaboraos poles empreses Symantec y ScanIT alrodiu de la seguridá na rede según los cualos el software de Microsoft ta perdiendo posiciones nesa materia en favor de Mozilla. El trabayu de la empresa Symantec, autora del sistema antivirus Norton, el buscador Explorer foi el más vulnerable a les últimes foleaes d’ataques de los hackers. Mozilla, sicasí, un programa qu’empieza recibir cásique tantos ataques al so sistema como’l de Microsoft, tien amosao, según estos estudios, una capacidá más grande pa tornalos. Anguaño’l xigante de Bill Gates pierde terrén en seguridá énte Mozilla y tamién Safari, el navegador d’Apple. La información apaecía na edición d’ayer domingu en ‘La Crónica de Hoy’ firmada por Gabriel Pérez Osorio, recoyendo materiales d’axencies y reproducíala el rotativu ‘Diario Signo’, publicación de la Comunidá Sorda d’Andalucía. Dos informes recientemente conocíos de les empreses espertes en seguridá na rede Symantec y ScanIT alrodiu de les últimes foleaes d’ataques de hackers a los principales navegadores na rede amosaben que l’Internet Explorer ya nun ye’l más seguru. El navegador de Microsoft sufrió a lo llargo de los 365 díes del añu 200 ataques que non siempre pudieron ser tornaos. De les 13 vulnerabilidaes que l’Esplorer nun foi quien a tornar, nueve d’elles foron ‘altamente severes’, un númberu mayor que l’amosáu por Mozilla, que namás nun foi tornar nueve ataques y nos demás amosó una eficacia más desenvuelta a la hora de reaccionar contra les truñaes de los hackers. Según estos trabayos el programa de navegacion na rede más seguru y preparáu pa los ataques, sicasí, sigue siendo Safari, d’Apple, l’eternu competidor en desventaya del xigante Microsoft. Les empreses autores de los informes sobre seguridá na rede asitien los sos análisis nun contestu nel qu’Internet Explorer recibe’l 80 por cientu de tolos ataques, poro, la novedá ye que los sos más directos competidores Mozilla y Safari ya empiecen algamar, por mor de la so popularidá, cifres bien asemeyaes de truñaes de hackers y la conclusión d’estos trabayos ye que s’amuesen más preparaos pa tornalos que’l pernomau programa de Microsoft. L’Explorer corrixe los sos fallos nun promediu de 43 díes, según los análisis fechos poles empreses espertes en seguridá, mientres que Mozilla ye quien a facelo nun promediu non superior a 26 díes. L’informe de ScanIT inda ye más rotundu al afirmar que mientres Internet Explorer resultó inseguru el 98 por cientu del añu, el navegador de Firefox namás lo foi nun 15 por cientu del mesmu periodu. Más información 28 de marzu, 2005 0 FacebookTwitterPinterestEmail
Tecnoloxía El Principáu entama un plan pa llevar la banda ancha a los llugares que nun tienen accesu a ello by asturnet 26 de marzu, 2005 El gobiernu del Principáu en colaboración cola Secretaría d’Estáu de Telecomunicaciones y pa la Sociedá de la Información (SETSI)va poner en marcha un programa pal espardimientu del accesu a la banda ancha en zonas rurales y aislaes. Con esti programa, tenta universalizase l’accesu a les conexones d’alta velocidá na rede tanto en cuantes a particulares como a empreses. Según los datos que manexa l’administración autonómica, n’Asturies inda hai 22 conceyos a onde nun llegó la banda ancha y 42 onde namás llega a dellos llugares. El plan del Principáu y la SETSI quier consiguir llegar al 100% de los llugares. El 28% de los conceyos asturianos nun cuenta inda con accesu a les redes d’alta velocidá, lo que representa’l 7,8% de la población de la nuestra comunidá.Al empar de los 75.909 locales con actividá económica n’Asturies, calcúlase que 5.919 nun tienen posibilidá de contratar banda ancha y que el 33% de éstos (1.953) taría dispuestu a contratar esti servicio si pudiere. Estos son los datos que manexa’l gobiernu del Principáu y que sofiten el programa entamáu en colaboración cola SETSI pa esparder la banda ancha a onde inda nun llega al través d’ayudes económiques destinaes a esplotadores de redes y prestadores de servicios de comunicaciones electróniques dispuestos a ufiertar esti accesu nes zones escluíes d’él. L’adxudicación de les primeres asignaciones a estos prestadores de servicios va facese en xunetu d’esti añu y los proyectos candidatos a les ayudes podrán presentar programes de calter pluriañal, hasta 2008 como másimu. Los requisitos p’algamar l’adxudicación d’ayudes son los d’ufiertar un serviciu de prestaciones asemeyaes al mayoritariamente disponible, asina como’l d’ufrir el serviciu a un preciu asemeyáu a la oferta mayoritaria d’accesu. 26 de marzu, 2005 0 FacebookTwitterPinterestEmail
Tecnoloxía France Press demanda a Google por colgar noticies ensin paga-y derechos de reproducción by asturnet 23 de marzu, 2005 L’axencia France Press (AFP) presentó nun tribunal de Washington una demanda contra la multinacional Microsoft, propietaria del buscador Google por colgar nel so serviciu gratuítu de noticies na rede material informativu elaboráu polos sos redactores. El fundamentu de la demanda básase nes lleis de protección de la propiedá intelectual que, según los abogaos de l’axencia de noticies francesa, taría vulnerando Google al nun pagar derechos de reprodución poles informaciones pañaes de France Press. Por si acasu dende la presentación de la demanda el buscador más usáu del mundu ya empezó retirar noticies obteníes de l’axencia gala. Una indemnización de 17,5 pide France Press a Microsoft na demanda presentada en Washington por utilización ilícita del so material informativu nuna llanzada xudicial ensin precedentes y que podía camudar, si prospera, munchos vezos habituales na rede tocantes a la propiedá intelectual de les noticies colgaes que s’obtienen de recursos ellaboraos previamente nes redacciones de medios de comunicación privaos y suxetos, poro, a les lleis de protección de la propiedá intelectual. La querella de l’axencia francesa diríxese contra’l sitiu ‘Google News’, onde según los abogaos de France Press, ufiertáranse titulares, noticies y imáxenes propiedá de só ensin pidir el permisu correspondiente nin abonar los derechos de difusión d’esos materiales informativos. Los responsables d’AFP afirmen que Google recibió diversos alvertíos pa que dexaran de colgar na rede les noticies elaboraes na redacción de l’axencia ensin que fueren atentíos estos requirimientos. La presentación de la demanda provocó una reacción inmediata de Microsoft, empresa propietaria de Google, que por boca del so voceru Steve Langdon anunció que ya tien retirao alrodiu de 4.500 noticies ya imáxenes utilizaes de France Press y al empar anunció que non por esta demanda “Google nun va siguir suministrando noticies de cualaquier fonte a los sos usuarios siempre que les consideremos d’interés pa ellos y en correspondencia al procuru qu’estos internautes tienen depositao de cuantayá en nós p’acceder a informaciones d’actualidá”. Más información 23 de marzu, 2005 0 FacebookTwitterPinterestEmail
Tecnoloxía Francia desafía al imperiu llingüísticu y tecnolóxicu de Microsoft con un proyectu pluricultural by asturnet 20 de marzu, 2005 El presidente francés acaba de da-y el preste a un proyectu del so ministru de Cultura Jean Noel Jeanneney pa dixitalizar y colgar n’Internet los fondos de les principales biblioteques d’Europa. L’oxetivu d’esta iniciativa tenta contrarrestar los prexuicios que puede acostinar pa la diversidá llingüística y cultural el proyectu puestu en marcha por Microsoft pa ufiertar al través del so buscador Google l’accesu a los fondos de les principales biblioteques americanes y britániques. De llevase alantre los planes de la compañía de Bill Gates el so imperiu tecnolóxicu y l’inglés algamaríen una supremacía nel accesu a los conocimientos del mundu riesgosa pa la diversidá cultural La noticia recoyíala la edición dixital del diariu madrilanu El Mundo de l’axencia Reuters y nella afirmábase que’l gobiernu de París, especialmente sensible a la supremacía cultural del inglés, tien un proyectu en marcha pa consiguir que los fondos bibliográficos en llingua francesa y los de les otres llingües europees tean disponibles pa la so llectura o consulta na Rede. Francia quier compartir estos planes colos restantes estaos d’Europa pa llograr que’l proyectu algame una envergadura quien a impidir que nos prósimos años l’accesu a los conocimientos del mundu quede en manes del imperiu tecnolóxicu de Microsoft y del idioma inglés. Apocayá la compañía de Bill Gates robló un alcuerdu coles universidaes de Michigan, Harvard, Oxford, Standford y la Biblioteca Pública de Nueva York pa colgar na rede los sos fondos bibliográficos. La iniciativa surdió de Sergey Brin y Larry Page, creadores del sistema operativu en 1998 cuando estudiaben na Universidá de Standford. La biblioteca de Standford -ciudá asitiada a tiru piedra de la sé de Microsoft en Mountain View- foi una de les primeres en sumase al proyectu y Michaesl A. Keller, el so responsable declaraba en feches recienes que de llevase a fechu los planes de Brin y Page: “d’equí a dos décades la mayoría de los conocimientos del mundu tarán dixitalizaos y disponibles on line”. Como tien mieu Francia ‘la mayoría’ d’estos conocimientos seríen en llingua inglesa y la compañía de Sergey Brin, Larry Page y Bill Gates, sería la puerta d’accesu a les biblioteques virtuales. El ministeriu de Cultura francés decidió poner a furrular la so iniciativa depués d’atender los encamientos del director de la Biblioteca Nacional, Jean Noel Jeanneney, qu’advirtió de los peligros pa la diversidá llingüística y cultural que suponía el proyectu de la compañía propietaria de Google y Windows. Ye precisamente la Biblioteca Nacional de Francia la encargada de diseñar y encarrilar el proyectu alternativu al entamáu por Microsoft. Más información 20 de marzu, 2005 0 FacebookTwitterPinterestEmail
Tecnoloxía Uviéu acueye les Quintes Xornaes de Software Llibre by asturnet 10 de marzu, 2005 L’Auditoriu Príncipe Felipe ye’l sitiu onde se van desarrollar a lo llargo de tres díes les quintes Xornaes de Software Llibre d’Asturies qu’organiza l’asociación Asturlinux y la Escuela d’Informática d’Uviéu. Especialistes y usuarios van debatir alrodiu de temes como la relación ente les nueves tecnoloxíes de códigu abiertu y el mundu de la empresa, el sistema educativu o l’administración autonómica. Les xornaes, nes que tamién colabora l’asociación d’antiguos alumnos de la Escuela Universitaria d’Informática, van desenvolvese a lo llargo de los díes 14, 15 y 16 de marzu y tan abiertes la inscripción de cualquier usuariu interesáu pol software llibre. El programa d’esta quinta edición del alcuentru organizáu por Asturlinux reserva una importancia especial a les aplicaciones del sistema de códigu abiertu al mundu de la empresa y a les salíes llaborales qu’ufierta esti nuevu marcu tecnolóxicu. Les xornaes empiecen el día 14 con una ponencia de J.Manrique López titulada “Introducción al software llibre: El puntu de vista del usuariu”, al que van siguir Manuel Angel Fernández con “Software llibre y emprendedores”; “Estándares web del W3C” de José Manuel Alonso. El mesmu día na sesión de tarde falaráse de “Por qués y cómos de l’accesibilidá nel software llibre”, por Rodrigo García; “Evolución de la participación d’empreses, instituciones ya individuos nel desarrollu de software llibre”, por Diego Barceló; y “Qué ye un hacklab y cómo montar un hacklab”. Nos díes siguientes trataráse del “Proyectu Advonicer.org: adaptación de un modelu d’empresa de desarrolu de software propietariu a software llibre” por M.A. González; “IGLUES-Bulmnagés” de René Mèrou, “Trabayando con programación estrema” de Miguel Jaque, ente otros. 10 de marzu, 2005 0 FacebookTwitterPinterestEmail
Tecnoloxía Mieres agospia les primeres xornaes d’Internet, música y copyleft by asturnet 26 de febreru, 2005 Un conciertu de Stoned Atmosphere, Lego my ego y Dj-Rayito valió pa escomenzar en Mieres les primeres xornaes d’Internet, música y copyleft qu’organiza’l colectivu mozu eXg a común con Mocedá d’Izquierda Asturiana (MIAS). Charres sobro software llibre y intercambiu d’archivos P2P, xunto a una mesa redonda alrodiu de la música na rede completen esti alcuentru dedicáu a les alternatives de comunicación cultural qu’ufierten les nueves tecnoloxíes. Les xornaes abriéronse ayer con un conciertu del duu de Hip-hop Stoned Atmosphere y una sesión de los Djs Lego my ego y Dj-Rayito y van siguir güei dende les cinco la tarde con una xornada de debates. Nella el director de publicaciones del Círculu de Belles Artes de Madrid y coordinador de la revista Ladinamo, César Rendueles va falar de les llendes impuestes a la llibertá d’espresión poles lleis del copyright y la concentración de grupos de comunicación nuna charra titulada: ‘Copiar, robar, mandar’. Darréu, Xabiel García Pañeda, profesor de la Universidá d’Uviéu y miembru del consorciu internacional w3c, va ocupase del intercambiu d’archivos P2P na rede y Luis Rodíguez, presidente de l’asociación de software llibre Asturlinux, falará de los formatos d’audio de códigu abiertu y la distribución llibre de los mesmos. Les xornaes van rematar con una mesa redonda na que cinco músicos d’otros tantos grupos asturianos van debatir de les nueves formes d’espresión y difusión creativo na rede. Nel debate participen Estela Aparisi (subbuteo), Arma X (Stoned Atmosphere), Pedro Vigil (Edwin Moses), Carlos Redondo (Felpeyu) y Pedro Souto (Skanda). Les charres van celebrase nel salón d’actos de Cajastur de Mieres. El colectivu organizador de les xornaes ‘eXg’ xunta a un grupu de mozos y moces que reivindiquen un papel activu pa les cuenques nel desenvolvimientu de nueves formes d’espresión creativo y de sensibilización social. Na organización d’estes xornaes colabora col colectivu eXg la organización MIAS, les mocedaes d’Izquierda Asturiana(IAS). 26 de febreru, 2005 0 FacebookTwitterPinterestEmail
Tecnoloxía Mozilla incorpora en llugar destacáu de la so web la versión n’asturianu del navegador Firefox by asturnet 23 de febreru, 2005 La llingua asturiana ye la primera en dalgo. La Fundación Mozilla, una rede qu’alita el llibre espardimientu y usu’l software ensin ánimu de lucru, encabeza col asturianu la llista de 30 versiones n’otros tantos idiomes del navegador Firefox 1.0, de calter alternativu al Explorer de Microsoft. Mozilla ta acabante d’incorporar la posibilidá de descarga de la versión asturiana nel so sitiu oficial d’internet. Hasta agora, la ufierta de ‘baxar’ la personalización n’asturianu del navegador Firefox apaecía n’otres direcciones web dende les que s’executaron más de 1.200 descargues dende la puesta en circulación del navegador, que se presentó con calter xeneral el pasáu 9 de payares, pero nun encabezaba la llista de la propia web de Mozilla, dende la que la descarga de la versión asturiana ye más ‘visible’ y fácilmente llocalizable. La torna al asturianu de la cabera versión asoleyada’l Firefox ensértase nel procesu de meyora y desendolcu de programes informáticos llamaos de códigu abiertu, que puen usase, modificase y distribuyise llibremente col únicu requisitu de ponelos llueu a disposición de tolos internautes pa que, al mesmu tiempu, puean ser sometíos a llibre usu, cambiu y distribución. Nesi contestu, la entidá de programación llibre Softastur anima dende la so páxina web a collaborar nel espardimientu l’asturianu como llingua operativa d’internet, bien comprobando los programes yá traducíos pa detectar posibles fallos, o bien tornando directamente programes, pa lo que se requieren sólo dos condiciones esenciales: Dominar l’inglés y tener ordenador con sistemes operativos Windows o Linux. Descarga de Firefox 1.0 n’asturianu na web de Mozilla 23 de febreru, 2005 0 FacebookTwitterPinterestEmail
Tecnoloxía La versión n’asturianu del navegador d’internet Firefox supera les 1.200 descargues by asturnet 14 de febreru, 2005 Más de 1.200 internautes qu’opten por navegar per internet col asturianu como llingua de viaxe. La versión 1.0 del navegador Firefox, desendolcáu pola Fundación Mozilla y de calter alternativu al Explorer de Microsoft, rexistra yá más de 1.200 descargues na so personalización en llingua asturiana, tres meses depués de la so puesta en circulación. Según datos apurríos pola entidá promotora de software llibre n’asturianu Softastur, tala cifra de descargues contabilizóse yá nes primeres selmanes inmediates al llanciamientu de la qu’hasta agora ye la más reciente ‘cara’ del Firefox, yá que la versión 1.1 d’esti navegador alcuéntrase anguaño en plenu procesu de desarrollu. El preséu informáticu asoleyóse con calter xeneral na so versión 1.0 el pasáu 9 de payares p’amenorgar la influencia del popularizáu Explorer de Microsoft, y respuende a la iniciativa de la Fundación Mozilla, una rede de programadores qu’aliten el llibre espardimientu y usu’l software ensin ánimu de lucru. La torna al asturianu de la cabera versión asoleyada’l Firefox ensértase nesi mesmu procesu de meyora y desendolcu de programes informáticos llamaos de códigu abiertu, que puen usase, modificase y distribuyise llibremente col únicu requisitu de ponelos llueu a disposición de tolos internautes pa que, al mesmu tiempu, puean ser sometíos a llibre usu, cambiu y distribución. Nesi contestu, la entidá Softastur anima dende la so páxina web a collaborar nel espardimientu l’asturianu como llingua operativa d’internet, bien comprobando los programes yá traducíos pa detectar posibles fallos, o bien tornando directamente programes, pa lo que se requieren sólo dos condiciones esenciales: Dominar l’inglés y tener ordenador con sistemes operativos Windows o Linux. Web de Softastur 14 de febreru, 2005 0 FacebookTwitterPinterestEmail
Tecnoloxía Telecable peslló l’añu con 50.000 conexones d’internet d’alta velocidá, un 29 por cientu más qu’en 2003 by asturnet 11 de febreru, 2005 Telecable xestiona yá 50.000 conexones de banda ancha a internet. La operadora asturiana peslló l’añu pasáu con esa cifra, que supón un crecimientu’l 29 por cientu respecto a 2003, y declara unos beneficios netos en 2004 de 331.000 euros, según comunicó güei la compañía. Telecable invirtió 168 millones d’euros nos últimos siete años pa espardir n’Asturies la so rede de fibra óptica. D’esti mou, internet foi’l ñeru de mercáu de la operadora que más medró con respecto al añu anterior, sustentáu nuna inyección económica de 23 millones d’euros a lo llargo de 2004. N’otres estayes de negociu, Telecable peslló l’añu pasáu con 80.000 llinies telefóniques propies, un 23,6 por cientu más que nel exerciciu anterior, y poco más de 80.000 servicios de televisión, con un aumentu’l 16 por cientu. En total, y según una comunicación pública asoleyada esti mediudía, la operadora asturiana de telecomunicaciones rexistró en 2004 unes ganancies finales de 331.157 euros, mientres que’l resultáu brutu d’esplotación algamó los 20,7 millones d’euros, un 47,7 por cientu más qu’en 2003. No que cinca a la facturación, Telecable despachó a lo llargo de 2004 un total de 63,9 millones de euros, lo que supón un crecimientu’l 30 por cientu respecto al mesmu indicador rexistráu pola compañía de telecomunicaciones en 2003. Mieres estrena los servicios de telefonía ya internet d’alta velocidá de Telecable nes cuenques 11 de febreru, 2005 0 FacebookTwitterPinterestEmail