Mozilla incorpora en llugar destacáu de la so web la versión n’asturianu del navegador Firefox

La llingua asturiana ye la primera en dalgo. La Fundación Mozilla, una rede qu’alita el llibre espardimientu y usu’l software ensin ánimu de lucru, encabeza col asturianu la llista de 30 versiones n’otros tantos idiomes del navegador Firefox 1.0, de calter alternativu al Explorer de Microsoft. Mozilla ta acabante d’incorporar la posibilidá de descarga de la versión asturiana nel so sitiu oficial d’internet.

Hasta agora, la ufierta de ‘baxar’ la personalización n’asturianu del navegador Firefox apaecía n’otres direcciones web dende les que s’executaron más de 1.200 descargues dende la puesta en circulación del navegador, que se presentó con calter xeneral el pasáu 9 de payares, pero nun encabezaba la llista de la propia web de Mozilla, dende la que la descarga de la versión asturiana ye más ‘visible’ y fácilmente llocalizable.

La torna al asturianu de la cabera versión asoleyada’l Firefox ensértase nel procesu de meyora y desendolcu de programes informáticos llamaos de códigu abiertu, que puen usase, modificase y distribuyise llibremente col únicu requisitu de ponelos llueu a disposición de tolos internautes pa que, al mesmu tiempu, puean ser sometíos a llibre usu, cambiu y distribución.

Nesi contestu, la entidá de programación llibre Softastur anima dende la so páxina web a collaborar nel espardimientu l’asturianu como llingua operativa d’internet, bien comprobando los programes yá traducíos pa detectar posibles fallos, o bien tornando directamente programes, pa lo que se requieren sólo dos condiciones esenciales: Dominar l’inglés y tener ordenador con sistemes operativos Windows o Linux.

Descarga de Firefox 1.0 n’asturianu na web de Mozilla