Mieres agospia les primeres xornaes d’Internet, música y copyleft

Un conciertu de Stoned Atmosphere, Lego my ego y Dj-Rayito valió pa escomenzar en Mieres les primeres xornaes d’Internet, música y copyleft qu’organiza’l colectivu mozu eXg a común con Mocedá d’Izquierda Asturiana (MIAS). Charres sobro software llibre y intercambiu d’archivos P2P, xunto a una mesa redonda alrodiu de la música na rede completen esti alcuentru dedicáu a les alternatives de comunicación cultural qu’ufierten les nueves tecnoloxíes.

Les xornaes abriéronse ayer con un conciertu del duu de Hip-hop Stoned Atmosphere y una sesión de los Djs Lego my ego y Dj-Rayito y van siguir güei dende les cinco la tarde con una xornada de debates. Nella el director de publicaciones del Círculu de Belles Artes de Madrid y coordinador de la revista Ladinamo, César Rendueles va falar de les llendes impuestes a la llibertá d’espresión poles lleis del copyright y la concentración de grupos de comunicación nuna charra titulada: ‘Copiar, robar, mandar’. Darréu, Xabiel García Pañeda, profesor de la Universidá d’Uviéu y miembru del consorciu internacional w3c, va ocupase del intercambiu d’archivos P2P na rede y Luis Rodíguez, presidente de l’asociación de software llibre Asturlinux, falará de los formatos d’audio de códigu abiertu y la distribución llibre de los mesmos.

Les xornaes van rematar con una mesa redonda na que cinco músicos d’otros tantos grupos asturianos van debatir de les nueves formes d’espresión y difusión creativo na rede. Nel debate participen Estela Aparisi (subbuteo), Arma X (Stoned Atmosphere), Pedro Vigil (Edwin Moses), Carlos Redondo (Felpeyu) y Pedro Souto (Skanda). Les charres van celebrase nel salón d’actos de Cajastur de Mieres.

El colectivu organizador de les xornaes ‘eXg’ xunta a un grupu de mozos y moces que reivindiquen un papel activu pa les cuenques nel desenvolvimientu de nueves formes d’espresión creativo y de sensibilización social. Na organización d’estes xornaes colabora col colectivu eXg la organización MIAS, les mocedaes d’Izquierda Asturiana(IAS).