Emigración Primer cursu de llingua y cultura asturiana en Buenos Aires by asturnet 21 de xineru, 2006 El Centru Asturianu de Buenos Aires va cellebrar a partir marzu’l Primer Cursu de Llingua y Cultura Asturianes en Buenos Aires, entamáu conxuntamente pola Subcomisión de Cultura y Prensa de la institución y l’Academia de la Llingua Asturiana.Los oxetivos xenerales del cursu son que los alumnos accedan al conocimientu de la realidá llingüística d’Asturies al travies del averamientu a la lliteratura, el lexicu, la ortografía y sintaxis de la llingua asturiana. Amás, va tratase d’esparder la realidá cultural d’Asturies dende’l puntu de vista de la etnografía, la economía, la mitoloxía y la relixón. De manera que los conteníos van tar basaos nos siguientes apartaos: historia, evolución, normativización llingüística y normalización social de la llingua asturiana; historia y evolución de la lliteratura escrita asturiana; estudiu sociollingüísticu, situación legal y averamientu al lexicu, ortografía y sintaxis de la llingua asturiana. Ente la temática cultural d’Asturies, van dictase clases sobre’l mundu de la maxa; el ciclu agrariu y festivu; la vaca, el gochu y otros animales; cazadores y pescadores; la collecha: de la miel a la mazana y la sidra; los cuentos; lleendes y figures mitolóxiques de la tradición oral; el xuegu y la danza; los santuarios; los ‘vaqueiros’ d’alzada, y el territoriu asturianu. 21 de xineru, 2006 0 FacebookTwitterPinterestEmail
Sociedá Los decretos pa la igua toponímica d’Avilés y Corvera van dase en mayu by asturnet 16 de xineru, 2006 El director xeneral de Promoción Cultural y Política Llingüística, Carlos Madera anunció esti viernes 13 n’Avilés que los espedientes toponímicos d’esti conceyu y del vecín de Corvera podíen tar aprebaos pal prósimu mes de mayu. Colos espedientes d’Avilés y Corvera son ya cuarenta y ún los conceyos que solicitaron la revisión de los sos nomes de llugar pola Xunta de Toponimia. Madera asistió’l pasáu viernes a la reunión d’esti organismu asesor nel Palaciu de Valdecarzana na villa del Adelantráu y presidió un aconceyamientu nel que tamién tuvo presente l’alcalde avilesín Santiago Vega. Los trabayos fechos hasta agora pola Xunta Asesora de Toponimia del Principáu consiguieron recuperar más de 3.000 nomes de llugar cola so forma tradicional. De los cuarenta y ún conceyos que solicitaron la so revisión toponímica son diez los que ya vieron aprebáu’l decretu correspondiente pa la oficialización de los nomes propuestos pola Xunta toponímica: Llanes, Carreño, El Franco, Gozón, Llangréu, L.lena, Sariego, Cabranes, Bimenes y Villaviciosa. El Conseyu de Gobiernu tien enriba la mesa pendientes d’oficializar los espedientes d’otros ocho conceyos Aller, Colunga, Nava, Ribera d’Arriba, Llaviana, Morcín, Pezós y Salime, a los qu’agora se sumen los d’Avilés y Corvera. 16 de xineru, 2006 0 FacebookTwitterPinterestEmail
Tecnoloxía Xixón organiza unes xornaes sobre servicios electrónicos n’Administración by asturnet 3 de xineru, 2006 La modernización de los servicios administrativos afayándolos a les nueves posibilidaes de la comunicación electrónica ye l’asuntu que va xuntar en Xixón los prósimos díes 19 y 20 de xineru a espertos de tol estáu. Les xornaes nomaes “Abierto 24 hores” van debatir los retos y ventayes de l’Administración tecnolóxica. Nes xornaes van tar presentes ente otros el director xeneral de Modernización Administrativa del Ministeriu d’ Administraciones Públiques, Domingo Laborda Carrión;Miguel Azorín Albiñana, subdirector xeneral de Tecnoloxíes de la Información del Ministeriu d’Industria, Comerciu y Turismu; Joseba Koldo Bilbao Gaubeka, director de la Oficina pa la Modernización Administrativa del Gobiernu Vascu; Marta Continente, directora xeneral d’Atención Ciudadana de la Secretaría Xeneral de la Presidencia de la Generalitat de Cataluña; y José Manuel Alonso, director de W3C España. El programa de les xornaes “Abierto 24 hores” van escomenzar el xueves 19 de xineru con una conferencia de Manuel Toharia, director del Muséu de les Ciencies de Valencia y al actu inaugural tien previsto asistir el Ministru d’Administraciones Públiques, Jordi Sevilla. Les xornaes estructúrense alrodiu cinco meses redondes nes que va analizase la situación de la administración electrónica dende’l puntu de vista del Gobiernu Central, los Executivos Autonómicos y les Corporaciones locales; asina como la visión que d’ella tienen les empreses y los ciudadanos. 3 de xineru, 2006 0 FacebookTwitterPinterestEmail
Sociedá Jesús Iglesias afirma que la oficialidá ye la última batalla pa la llingua asturiana by asturnet 26 d'avientu, 2005 El coordinador xeneral d’Izquierda Xunida, Jesús Iglesias afirma que la oficialidá “ye la última batalla pal asturianu y paga la pena pelear”. Pal responsable de la coalición d’izquierdes la reforma del estatutu ye la ocasión onde se espeya esta última oportunidá pa la llingua asturiana y el nun facelo, al so xuiciu, diba suponer “qu’en mui poco tiempu vamos tar falando d’una llingua muerta”. Iglesias fizo estes declaraciones nuna entrevista que publica la edición d’esti martes 26 del diariu La Nueva España. Na entrevista tamién se refier a la propuesta llanzada por IX pa entamar el debate sobre la reforma estatutaria n’Asturies. El coordinador de la coalición anuncia qu’a partir de xineru van escomenzar a recoyer opiniones de los distintos axentes sociales sobre esti debate. Tocante a la oficialidá de la llingua asturiana, Jesús Iglesias atribúi les rocees del PSOE a “prexuicios y pantasmes” y caltién qu’anguañu hai un clima más afayadizu pa sentar a discutir de la reconocencia llegal del nuestru idioma: “nos últimos tiempos, el debate serenóse y mesmo se dieron pasos na Xunta (Xeneral) pa despolitizalo, por eso veo más esperances de que sea posible afrontalo de manera racional”, diz el coordinador d’IX, pal que nun hai que poner llendes al debate y, según afirma: “los plazos y el mou de la oficialidá pueden discutise”. 26 d'avientu, 2005 0 FacebookTwitterPinterestEmail
Sociedá Anxo Quintana califica de ‘inesistente’ la posibilidá d’anexón a Galicia de conceyos foriatos by asturnet 19 d'avientu, 2005 El secretariu xeneral del Bloque Nacionalista Galego (BNG) y vicepresidente de la Xunta de Galicia Anxo Quintana afirmó énte varios miles de siguidores esti sábadu 17 qu’hai “sectores interesaos en que’l nacionalismu gallegu apareza como’l tercer problema del estáu, después de los ‘problemes’ d’Euskadi y Cataluña”. Pal dirixente ‘bloqueiro’ seríen esos sectores los autores de la polémica sobre lo que calificó de “inesistente posibilidá” d’anexón de conceyos d’Asturies y Castiella-Lleón a la comunidà gallega. Quintana atribuyó el “tremendu líu” (nes sos palabres) armáu a cuenta de la propuesta de nuevu estatutu del BNG a “aquellos qu’entienden la Constitución como una arma arroxadiza” y calificó de “posibilidade inexistente” la d’anexonar territorios de Asturies y Castiella-Lleón a Galiza-, una polémica creada, dixo porque “dende Madrid nun se contaba con que Galiza presentase un Estatutu de Nación: namás contaben con Euscadi y Cataluña, y agora temen que nos convirtamos nun tercer problema”. El vicepresidente del gobiernu gallegu afirmó nel so discursu ente los simpatizantes del Bloque que “una nación nun pide permisu pa decidir el so futuru nin rinde vasallaxe a naide” y preguntó “a los qu’agora se rasguen les vestidures” si taríen dispuestos a “dexar Galiza al marxen del debate territorial una vez qu’Euskadi y Cataluña tegan un nuevu testu estatutariu. Pel so llau el PSdG, en voz del so dirixente Paulino Varela, pidió-yos a los sos socios de gobiernu del Bloque que “abandonen los maximalismos” y “trabayen por un Estatutu de consensu de tolos gallegos”. 19 d'avientu, 2005 0 FacebookTwitterPinterestEmail
Sociedá Anxo Quintana pide a los gobiernos d’Asturies y de Castiella-Lleón que rectifiquen by asturnet 12 d'avientu, 2005 El vicepresidente de la Xunta de Galicia y secretariu xeneral del Bloque Nacionalista Galego (BNG) Anxo Quintana considera “deproporcionaes, ilóxiques y manipuladores” les crítiques a la propuesta de nuevu estatutu elaborada pol so partíu y qu’inclúi la posible incorporación a la comunidá vecina de conceyos limítrofes. Quintana pide a los gobiernos d’Asturies y de Castiella-Lleón una rectificación poles sos crítiques. El portavoz nacional del BNG anunció en declaraciones a diversos medios que va reclamar en nome de la Xunta una desplicación a les másimes autoridaes del Principáu y de la Junta de Castiella-Lleón polo que cuida “gravísimes acusaciones ya insultos” nes reacciones polítiques a la propuesta de nuevu estatutu pa Galicia del Bloque. Anxo Quintana afirmó que “voi dirixime tanto al gobiernu autónomu de Castiella y Lleón como al d’Asturies pa, dende una perspectiva cordial y col meyor sentíu de respetu institucional, protestar por una actitú desproporcionada, ilóxica, en dalgunos casos tremendamente manipuladora, y qu’evidencia’l desconocimientu profundu de lo que propón el BNG y de los sos propios estatutos”, dixo’l políticu gallegu. 12 d'avientu, 2005 0 FacebookTwitterPinterestEmail
Sociedá IX-BA fai una propuesta d’autogobiernu plenu énte la indiferencia de PSOE y PP by asturnet 9 d'avientu, 2005 La Federación Socialista Asturiana (FSA) y el Partido Popular d’Asturies consideren que’l procesu de reforma del estatutu ha tar acordies colos movimientos de la política autonómica estatal y refuguen poro la posibilidá de que la nuestra comunidá entame un camín propiu d’autogobiernu, talo proponen Izquierda Xunida y el Bloque por Asturies. La propuesta de nuevu estatutu presentada poles dos formaciones coaligaes esti miércoles 7 n’Uviéu nun tien afayao nengún ecu nin nel PSOE nin nel PP. Los másimos cabezaleros de les dos formaciones mayoritaries declararon a diversos medios que’l´fin de la propuesta d’IX-BA “nun ye lo que toca falara agora “, en palabres del popular Ovidio Sánchez, pal que “nun hai nenguna demanda na cai sobre esti tema”, afirmó. En términos asemeyaos pronuncióse’l socialista Javier Fernández que refugó valorar la iniciativa d’Izquierda Xunida-Bloque: “nun vamos facelo en debate públicu sinón cuando s’entame la ponencia parlamentaria” y dixo como robla del so refugue a debatir la propuesta presentada esti miércoles pola coalición d’izquierdes que “ye meyor pensar que correr”. Jesús Iglesias, cordinador xeneral d’Izquierda Xunida d’Asturies y Roberto COlunga, secretariu xeneral del Bloque por Asturies presentaron nuna rueda de prensa conxunta una tabla de propuestes pal nuevu estatutu cola que se pretende dotar a la nuestra comunidá d’un nivel d’autogobiernu asemeyáu al de les comunidaes estatutariamente más avanzaes. Amás de l’inxerimientu d’una serie de derechos ciudadanos non recoyíos específicamente na Constitución, IX-BA proponen un estatutu nel qu’Asturies quede definida como nacionalidá, l’asturianu comparta oficialidá col castellanu y el Principáu cuente con una policía autonómica, ente otres midíes. 9 d'avientu, 2005 0 FacebookTwitterPinterestEmail
Música La OSPA participa nun conciertu-homenaxe a Severo Ochoa by asturnet 24 de payares, 2005 La Orquesta Sinfónica d’Asturies participa mañana, xunta’l coru de la Comunidá de Madrid y el coru de Radiotelevisión Española, nun conciertu en Madrid dientro de los actos d’homenaxe al premiu nobel asturianu, Severo Ochoa, al que van dir la conseyera de Cultura, Comunicación Social y Turismu, Ana Rosa Migoya, y el director xeneral de Promoción Cultural y Política Llingüística, Carlos Madera. El recital forma parte del XVI Ciclu de Conciertos nel Auditoriu Nacional de Música qu’entama la Universidá Politecnica de Madrid, teniendo esti añu un calter especial, al sirvir pa la conmemoración del centenariu del nacimientu del Nobel asturianu Severo Ochoa. La obra elixida ye la novena sinfonía de Beethoven, que va ser interpretada pola soprano Iwona Sobotka, la mezzosoprano Marisa Martins, el tenor Joan Cabero y el baxu Robert Holzer. La OSPA va tar dirixida pol so titular Maximiano Valdes, y los coros por Jordi Casas y Mariano Alfonso, respectivamente. El conciertu que se fai a beneficio de la Fundación Carmen y Severo Ochoa, va escomenzar a les 22.30 hores na Sala Sinfónica del Auditoriu Nacional de Música. 24 de payares, 2005 0 FacebookTwitterPinterestEmail
Sociedá Les instituciones gallegues piden l’entendimientu con Asturies nel congresu de Ribadeo by asturnet 31 d'ochobre, 2005 La polémica entamada a esti llau del Eo tuvo bien presente nes xornaes celebraes en Ribadeo embaxo l’agospiu de la Escola Fermín Penzol de la Universidá de Vigo. Xosé Henrique Costas, representante de la institución organizadora, reclamó nel empiezu del congresu la cooficialidá pal asturianu y pal gallegu-asturianu, y criticó l’espolín que s’armó por estes xornaes n’Asturies. Otros participantes nel alcuentru coincidieron con Costas y reivindicaron la Escola Permanente como llugar d’atopada ente les dos comunidaes. Xosé Henrique Costas, de la Universidá de Vigo, calificó de “ignorantes interferencias políticas” les reacciones suscitaes a esti llau del Eo pola convocatoria del congresu de Ribadeo y denunció les que consideró «presións para boicotear a colaboración do galego e do asturiano». Na mesma llinia el primer teniente d’alcalde del conceyu agospiador Fernando Suárez criticó a los “detractores que intentan dinamitar o noso entendimento”. El responsable de la Oficina de Política Llingüística del Principáu, Ramón d’Andrés respondió a les crítiques dica Asturies na so intervención en Ribadeo afirmando que “l’entendimientu tamién pasa pola diplomacia y pola comprensión” que Galicia tien de tener pa coles instituciones d’Asturies. D’Andrés dixo nel alcuentru que les reacciones de dalgunos conceyos del Navia-Eo yeren “comprensibles” énte determinaes iniciatives “poco afortunaes”, al tiempu que pidió un consensu sobre les llingües falaes n’Asturies. Na xornada de pieslle de les xornaes el director xeneral de Difusión Cultural de la Xunta de Galicia, Luis Bará, afirmó que “l’entendimientu y el respetu mutuu” yeren imprescindibles p’asegurar la sobrevivencia de la llingua asturiana y de la fala del Navia-Eo. 31 d'ochobre, 2005 0 FacebookTwitterPinterestEmail
Emigración El CA de Málaga cellebral Día dAsturies cola entrega de los Escudos dOru by asturnet 19 de setiembre, 2005 El Centru Asturianu de Málaga, tres la reapertura de la so se social depues de les obres d’acondicionamientu, celebra’l Día d’Asturies el prósimu día 7 d’ochobre, con una recepción oficial a la representación del Principáu y miembros de la Xunta Directiva per parte del alcalde Pedro Fernández Montes y miembros de la corporación. Dientro de los actos, el centru fadrá entrega de les sos distinciones, los Escudos d’Oru, a diferentes personalidaes que vinieron collaborando cola entidá. Los actos entamarán a la una la tarde del día 7 d’ochobre cola recepción oficial a la representación del Principáu y miembros de la Xunta Directiva. El Principáu va tar representáu nel Día d’Asturies por Luis Miguel Fernández Romero, Director Xeneral de l’Axencia Asturiana d’Emigración y por Roberto Perez López, Vicepresidente Primeru del Conseyu de Comunidaes Asturianes y Alcalde de Belmonte de Miranda y los Centros Asturianos por Jose Luis Casas Villanueva, Presidente de la Federación Internacional de Centros Asturianos y pol Folclore Asturianu l’Agrupación Xixonesa “TREBEYU”. A les siete y media la tarde, habrá misa n’honor a la Santina na Ilesia del Buen Consejo, amenizada pola Agrupación folclórica Asturiana “TREBEYU” de Xixón. A les 21 hores, na Casa Cultura de Torremolinos, fadráse la imposición de bandes a la Xanina 2005 y Xanines d’honor, pa depues dar llectura al pregón qu’esti añu correrá a cargu Jose Luis Merino Bobes, director de cine, asturianu y Escudu d’Oru de la entidá nel añu 1984. Pola so especial collaboración cola entidá va imponese esta insignia de reconocimientu a Dª Encarnación Navarro Rico, Teniente Alcalde y Conceyala de Cultura, Educación y Fiestes del Ayuntamientu de Torremolinos y a D. Rafael Trigos Nogueira, Expresidente de la Federación Malagueña de Peñes, Centros Culturales y Cases Rexonales de Málaga. Al terminar, actuará la gaitera y profesora de la Escuela de Gaites, Carina Linares, que va interpretar l’Himnu d’Andalucía y el d’Asturies. Tres d’ella actuará otra vuelta l’Agrupación Folclórica de Xixón“TREBEYU” y Noelia Carrio, socia del Centru (Flauta Travesera). El repartu del bollu preñáu a los socios será al dia siguiente, el sábado día 8 d’ochobre. 19 de setiembre, 2005 0 FacebookTwitterPinterestEmail