Les instituciones gallegues piden l’entendimientu con Asturies nel congresu de Ribadeo

La polémica entamada a esti llau del Eo tuvo bien presente nes xornaes celebraes en Ribadeo embaxo l’agospiu de la Escola Fermín Penzol de la Universidá de Vigo. Xosé Henrique Costas, representante de la institución organizadora, reclamó nel empiezu del congresu la cooficialidá pal asturianu y pal gallegu-asturianu, y criticó l’espolín que s’armó por estes xornaes n’Asturies. Otros participantes nel alcuentru coincidieron con Costas y reivindicaron la Escola Permanente como llugar d’atopada ente les dos comunidaes.

Xosé Henrique Costas, de la Universidá de Vigo, calificó de “ignorantes interferencias políticas” les reacciones suscitaes a esti llau del Eo pola convocatoria del congresu de Ribadeo y denunció les que consideró «presións para boicotear a colaboración do galego e do asturiano». Na mesma llinia el primer teniente d’alcalde del conceyu agospiador Fernando Suárez criticó a los “detractores que intentan dinamitar o noso entendimento”.

El responsable de la Oficina de Política Llingüística del Principáu, Ramón d’Andrés respondió a les crítiques dica Asturies na so intervención en Ribadeo afirmando que “l’entendimientu tamién pasa pola diplomacia y pola comprensión” que Galicia tien de tener pa coles instituciones d’Asturies. D’Andrés dixo nel alcuentru que les reacciones de dalgunos conceyos del Navia-Eo yeren “comprensibles” énte determinaes iniciatives “poco afortunaes”, al tiempu que pidió un consensu sobre les llingües falaes n’Asturies.

Na xornada de pieslle de les xornaes el director xeneral de Difusión Cultural de la Xunta de Galicia, Luis Bará, afirmó que “l’entendimientu y el respetu mutuu” yeren imprescindibles p’asegurar la sobrevivencia de la llingua asturiana y de la fala del Navia-Eo.