Sociedá Mocedá d’Izquierda Asturiana embaló a Tejeiro by asturnet 30 de payares, 2006 Nun actu de refuga de la simbolixía fascista nes cais d’Asturies les Mocedaes d’Izquierda Asturiana embalaron al Coronel Tejeiro como forma d’espeyar el deséu de la retirada de los monumentos y señales del réxime que dirixere Franco. Durante l’actu del 24 de payares los militantes de la organización xuvenil repartieron exemplares de la “Guía pa un Uviéu llibre de simboloxía franquista”, documentu nel que recueyen bona parte de los elementos que la organización propón retirar desplicando amás del so asitiamientu, el so significáu y los sos principales protagonistes, al tiempu que se fai una contestualización histórica de caún d’ellos. P’acabar l’actu lleóse un comunicáu nel que la organización xuvenil venceyada a Izquierda Asturiana facía una reflexón sobre los ataques del franquismu a la cultura y los derechos ciudadanos, asina como a los intentos de destrucción de cualesquier identidá que nun fuera la de so. Dende MIAS consideráse que “a lo cabero los tiempos venimos careciendo dun nuevu surdimientu de movimientos fascistes, qu’ente otres munches repudiables aiciones, vindiquen los fechos y los restos d’esi tiempu tan murniu p’Asturies y pal restu lEstáu, y qu’inda son bien visibles anguaño nes nueses cais” sicasí reconocen un mayor esmolecimientu social pola recuperación de la dignidá del bandu perdedor del 39 “y honrar la memoria de los millones de persones que vieron dende entós tapecida la so hestoria”. Pa la organización xuvenil “esta llucha pola ‘memoria hestórica’ de la que tanto se fala güei conlleva necesariamente la retirada de monumentos, plaques y otres parafernalies que siguen nel llugar onde se punxeron va décades, que siguen rindiendo homenaxe a aquellos que derrocaron poles armes un réxime lexítimu, dexando millones de calabres pel camín, somorguiándonos na solombra ya imponiéndonos l’escaezu”. L’actu de MIAS tuvo crítiques hacia la política del Gobiernu español no tocante a la recuperación de la memoria. Pa MIAS el Gobiernu de Rodríguez Zapatero cola aprobación de la Llei de Memoria Histórica supón “un mediu camín que nun satisfái a naide y que como vien siendo norma nes politiques de Zapatero, tien lúnicu oxetivu danestesiar, de tapar boques. Pero la nuesa y munches otres, tienen güei más ganes de glayar que nunca”. Dende la entidá xuvenil consideren que la retirada de la simboloxía franquista ye dalgo inescusable y que “l’únicu llugar afayadizu pa estos oxetos ye un muséu de la memoria hestórica onde se faiga’l xustu y más riguruso recuerdu de los fechos d’esa dómina” 30 de payares, 2006 0 FacebookTwitterPinterestEmail
Sociedá Villaviciosa esixe la Oficialidá by asturnet 30 de payares, 2006 El conceyal de la URAS, ya históricu militante nacionalista, Xicu Xabel Díaz, presentó una moción al Plenu Municipal del Conceyu de Villaviciosa na que se solicitaba que la Xunta Xeneral del Principáu d’Asturies incluyera la Oficialidá de la llingua asturiana na prósima reforma del Estatutu d’Autonomía. La moción aprebada polos conceyales del Partíu Popular y URAS, tuvo l’abstención de los ediles del PSOE. La moción fala d’entamar un debate sobre l’asturianu basándose “na realidá de la llingua y na so non obligatoriedá”. La moción aprobada pola corporación municipal de La Villa tien, al mesmu tiempu, la fin de reconocer los derechos de los asturianu-falantes nel conceyu. Pa esta fin l’Ayuntamientu de Villaviciosa facilitará a los y les ciudadanes los diversos trámites municipales na llingua qu’estos escueyan. 30 de payares, 2006 0 FacebookTwitterPinterestEmail
Sociedá Les Cortes de Castiella y Lleón aprobaron el testu de la reforma del so Estatutu d’Autonomía. by asturnet 30 de payares, 2006 Les Cortes de Castiella y Lleón aprobaron la so reforma del Estatutu d’Autonomía colos votos a favor de los representantes del Partíu Popular y del Partíu Socialista, l’únicu diputáu de la Unión del Pueblu Lleonés votó en contra del testu propuestu. El nuevu testu fai referencia al lleonés qu’hasta’l momentu figuraba col xenéricu “modaliedaes llingüístiques”. Ente les introducciones más significatives del testu aprobáu figura la referencia al lleonés que “sedrá oxetu de protección específica por parte de les instituciones pol so particular valor dientro del patrimoniu llingüísticu” Afitándose una regulación pa la so promoción y usu. El gallegu gociará de promoción y respetu dientro de la Comunidá Autónoma. El nuevu testu recueye menciones a les diferentes llingües falaes na Comunidá Autónoma. La lengua castellana sedrá oxetu d’especial protección y sofitu por parte de la Comunidá y la Xunta de Castiella y Lleón fomentará’l so usu correctu nos ámbitos educativu, alministrativu y cultural. El Testu aprobáu presentaráse darréu a les Cortes Españoles pa la so aprobación definitiva. 30 de payares, 2006 0 FacebookTwitterPinterestEmail
Comunicación La futura Llei de Puxu de la Sociedá de la Información podría poner llendes a la llibertá d’espresión by asturnet 29 de payares, 2006 Presentóse’l borrador de la futura Llei de Puxu de la Sociedá de la Información, na que, según l’Asociación d’Usuarios d’Internet (AUI), nun se recueyen les peticiones feches pol Conseyu Asesor de Telecomunicaciones Estes peticiones trataben sobre les garantíes xudiciales nel intre de retirar un conteníu de la rede o torgar l’accesu a una páxina concreta. La AUI mantién que tien d’esistir un mandáu xudicial mesmo pa poder pesllar un web como p’acceder a los datos que tán obligaos a guardar los proveedores y, finalmente, quitar de la llei la posibilidá de qu’un proveedor pueda desmañar a un usuariu acceder a un conteníu concretu. Sicasí’l testu remitíu establez que “cuando un órganu competente ordenare, n’exerciciu de les competencies que llegalmente tuviere atribuyíes, que s’interrumpa la prestación d’un serviciu de la sociedá de la información o la retirada de dellos conteníos provenientes de prestadores establecíos n’España (…), esti órganu podrá ordenar a los citaos prestadores que suspendan el correspondiente serviciu d’intermediación utilizando pa la provisión del serviciu de la información o de los conteníos cuya interrupción o retirada fueren ordenoa respectivamente. L’Asociación d’Usuarios d’Internet entrúgase por cuálos son los órganos competententes, dao qu’el testu nun lo especifíca en nengún puntu. “Una páxina web ye a tolos efectos un mediu de comunicación y como tal ha ser tratáu; si nun lo camentamos asina, podemos cayer en situaciones como les recién pasaes en China”, dizo Pérez Subías, presidente de l’AUI. La Nueva llei tamién responsabiliza al proveedor del enllace o del motor de búsqueda de los conteníos de los que se tien conocencia porque fueron ellaboraos embaxo la so dirección, autoridá o control. Pa l’AUI, esta midía ta en contra de la Web 2.0, de los espacios públicos de los usuarios, yá qu’internet ye dinámica y cambiante. El presidente de l’AUI entrúgase “¿Por qué sí alguién pon un enllace nel mio blog a otra páxina tengo que ser yo responsable de los conteníos d’esta páxina, si estos pueden cambiar cada minutu?. “L’alministración o, nel so defectu, los órganos competentes” nun han decidir qué conteníos se pueden o non espublizar. Esta midía supón una restricción y un vetu a los usuarios p’acceder a páxines y sitios d’Internet” , afirma l’AUI Amás, l’asociación nun descarta entamar aiciones llegales y recurrir la LPSI ente otres instancies por entender que se vulneren los derechos de los usuarios. Asociación Usuarios d’Internet 29 de payares, 2006 0 FacebookTwitterPinterestEmail
Sociedá La Xunta pola Defensa de la llingua del Suroccidente entama’l II Alcuentru d’Escritores n’asturianu occidental by asturnet 29 de payares, 2006 La Xunta pola Defensa de la Llingua Asturiana nel Suroccidente entama pa los díes 2 y 3 d’avientu’l so II Alcuentru d’Escritores n’Asturianu Occidental. Les sesiones del Alcuentru desenvolveránse nel Teatru Conde Toreno de Cangas. El filólogu, y miembru de la Xunta pola Defensa de la Llingua, Fernando Álvarez Balbuena va entamar los Alcuentros cola conferencia titulada “¿Yía normal escribir na variedá occidental de la l.lingua? Propuesta dunas pautas ortográficas integradoras ya suplementarias a la normativa oficial”, la ponencia esplora les posibilidaes que permite la normativa de l’Academia de la Llingua pa escribir na variante occidental del idioma. Vicente García Oliva falará sobre la historia de la lliteratura nel asturianu occidental nuna conferencia titulada “Nel principiu fue’l cuentu”. Hector García Xil, filólogu, espondrá la so conferencia sobre “La deturpación de la llingua en Cuentos del Sil”, nesta conferencia Hector Xil comentará los diferentes estilos ortográficos nesta monografía sobre los cuentos de la comarca del Sil. Darréu estes ponencies entamaran una riestra comunicaciones nes que participarán Francisco González y Naciu i Riguilón sobre “L’aventura del Cudoxu” y Tradición Oral y lliteratura”. Esti día fadráse un homenaxe La xornada del domingu entamará cola coles comunicaciones de Berto Álvarez Peña, del Conceyu d’Estudios Belenos, Vitorino García, xerente de “El rincón Cunqueiru” y la filóloga Iris Díaz Trancho qu’asoleyarán les sos comunicaciones pa dar darréu pasu a un alderique sobre “tradición oral, cultura popular y territorios na lliteratura n’asturianu occidental” que va moderar Fernando Álvarez Balbuena y que pondrán el peslle de les xornaes. 29 de payares, 2006 0 FacebookTwitterPinterestEmail
Sociedá Presentóse l’Anuariu de la Xunta de Toponimia 2004-2006 by asturnet 28 de payares, 2006 La Xunta Asesora de Toponimia presentó ayer l’Anuariu de los trabayos fechos ente 2004 y 2006. Nel recopilatoriu aparecen los datos toponímicos de los 10 conceyos qu’aprebaren los sos espedientes toponímicos nesti periodu, y que fueron ratificaos nel Boletín Oficial del Principáu d’Asturies. L’Anuariu de la Xunta Asesora de Toponimia ta firmáu por Fernando Álvarez-Balbuena, Xulio Viejo y Ramón d’Andrés. Nel actu participaron Carlos Madera, Director Xeneral de Promoción Cultural y Llingüística; Ramón d’Andrés, Xefe de la Oficina de Política Llingüística; Fernando Álvarez-Balbuena y Xulio Viejo, vocales de la Xunta Asesora de Toponomia. Énte’l públicu alcontrábense dalgunos de los alcaldes de los conceyos que yá vieron les formes toponímiques tradicionales oficializaes. L’Anuariu de la Xunta Asesora de Toponimia presenta los espedientes toponímicos de los conceyos de Carreño, El Franco, Llanes, Gozón, Llangréu, L.lena, Sariegu, Cabranes, Bimenes y Villaviciosa. Carlos Madera entamó la presentación d’esti actu señalando que “l’actuación toponímica ye una aición del Gobiernu asturianu inxertada dientro del marcu llegal”. Pal Director Xeneral l’aición de la recuperación toponímica ye l’aspeutu más desarrolláu de los diferentes compromisos del Gobiernu pa cola llingua. Madera remarcó’l sofitu que s’alcuentra ente la sociedá la oficialización de les formes tradicionales de nomar a los llugares nel país. Carlos Madera recordó qu’actualmente hai 50 conceyos que solicitaron revisar los sos espedientes, la Xunta Asesora de Toponimia tuvo 36 reuniones, que desbordaron les propies espectatives de la Xunta Asesora de Toponimia. El llabor de la Xunta de Toponimia foi calificáu como exemplar pol responsable autonómicu de promoción y política llingüística al ser capaz d’imponer los criterios técnicos respectu de los políticos. Sobre la implantación de los topónimos oficializaos Madera faló de la “progresividá” nesa tema, mesmo que sobre la so aparición nel Boletín Oficial del Principáu d’Asturies, alegando la lentitú alministrativa y les diferentes “inercies alministratives y burocrátiques”. Sicasí reconoció que se tán faciendo recomendación pa favorecer la rápida implantación na Alministración del usu de los topónimos oficiales. Pa Ramón d’Andrés el llibru presentáu ye’l frutu d’un trabayu esamináu dende’l puntu de vista técnicu. D’Andrés presentó los conteníos del Anuariu toponímicu, dende les primeres introducciones sobre lo que ye la Xunta Asesora de Toponimia a los capítulos específicos de cada conceyu. Ramón d’Andrés afitó la vocación de futuru d’esti anuariu anunciando que se fadrá lo mesmo colos topónimos oficializaos durante 2006. Xulio Viejo espresó la sos satisfacción por asoleyar esti trabayu depués del trabayu de recoyida toponímica. Pa Viejo esti Anuariu ye la coronación d’un trabayu de munchu tiempu, de muncha xente ue tuvo coordináu pola Xunta de Toponimia. Pa Xulio Viejo un de los llabores más importantes del trabayu de los diferentes encuestadores toponímicos foi’l d’alcontrar bien de topónimos que nun figuraben. Xulio Viejo afitaba la necesidá de qu’el trabayu de recuperación, y oficialización, toponímica algame una una Oficialización social, más allá de l’alministrativa, de los topónimos oficializaos. Fernando Álvarez-Balbuena señaló que l’Anuariu ye’l resultáu de lo que se “pudo facer” nos años 2004-2005. Pal filólogu y asesor de la Xunta de Toponimia cola oficialización de la toponimia se ta cumpliendo “parcialmente” una revindicación histórica del asturianismu, ye un “cachín d’oficialidá que fuimos arrancar per primera vegada” dixo Fernando Álvarez-Balbuena. El filólogu fizo referencia a la historia de la recuperación toponímica dende qu’en 1973 José Luis Montoto na Primera Asamblea Regional del Bable presentará “Defensa Topónimos d’Asturies”, pasando pol “Conceyos y parroquies d’Asturies” de la Comisión toponímica d’Asturies en 1985, el Nomenclator d’Asturies publicáu pol SADEI en 1987, l’entamu de la Colección Toponimia de l’Academia de la Llingua Asturiana en 1990 cola fin de preservar el patrimoniu toponímicu del país, l’Atlas d’Asturies de la editorial Nobel nel que se fai l’intentu de cubri la toponimia menor en 1995-1997, Nomes de Conceyos, Parroquies, Pueblos y Llugares del Principáu d’Asturies de l’Academia en 2000 y como en 2006 l’Anuariu de la Xunta Asesora de Toponimia. 28 de payares, 2006 0 FacebookTwitterPinterestEmail
Sociedá L’Atenéu Obreru de Xixón va inaugurar un monolitu na so antigua sé by asturnet 24 de payares, 2006 Esti sábadu a les 11,30 hores l’Ayuntamientu de Xixón, nel Paséu del Muru escalera 7, va inaugurar un monolitu col que se fadrá alcordanza del espaciu qu’ocupó la última de les sés del Atenéu Obreru de Xixón enantes de la so clausura ya incautación de los sos bienes durante la Guerrea Civil. L’actu enmárcase nel programa d’actividaes previstu pa conmemorar el 125 aniversariu de la fundación del Atenéu Obreru de Xixón. 24 de payares, 2006 0 FacebookTwitterPinterestEmail
Sociedá Llames de Pría cellebra esta fin de selmana les V Xornaes de Deporte Tradicional by asturnet 24 de payares, 2006 El pueblu llaniscu de Llames de Pría cellebra esta fin de selmana la quinta edición de les Xornaes de Deporte Tradicional, incluyides nel programa de les fiestes de San Saturnín. Los actos tán organizaos pol Club de Deporte Tradicional San Zornín col sofitu del Ayuntamientu de Llanes y la Federación Asturiana de Deporte Tradicional. Güei vienres 24 de payares, los asistentes podrán disfrutar d’un amagüestu, que se fadrá en tolos chigres del pueblu. El sábadu 25 de payares habrá una misa solemne interpretada a la gaita pol gaiteru de San Roque Ignacio Noriega. Darréu la misa entamará’l concursu Exhibición d’arrastre de Pesu con caballos, nel que participarán Luis Villa, Guillermo Gómez, Amador Molleda, Pablo Galdeano, Manuel Jardón, Sergio Gutiérrez, Ángel Conde y Ramón Gutiérrez. A les 20,00 hores fadrase una carrera de panoyes. Darréu ello entamará un espicha con verbena. Toles prebes y actos fadránse nel Prau Corrales. 24 de payares, 2006 0 FacebookTwitterPinterestEmail
Sociedá Los partíos mayoritarios entamen a enxertar asturianistes nes llistes d’ayuntamientos by asturnet 24 de payares, 2006 L’anuncia de que Xosé Suárez Arias-Cachero, hestóricu militante nacionalista asturianu, dirá na llista del PP al Ayuntamientu d’Uviéu, nun ye sinon la primer apaición d’un fenómenu que será’l más significativu de les prósimes eleiciones. Les llistes de PP y PSOE en Xixón sedrán les prósimes que tendrán la pallabra nesti sen. L’anuncia esti día de la inclusión na llista del PP al Ayuntamientu d’Uviéu, qu’encabeza Gabino de Lorenzo, de Xosé Suárez Arias-Cachero, “Felechosa”, ta acabante d’abrir la veda del enxertamientu d’asturianistes nes llistes a les prósimes eleiciones. La popular Fernández Pardo ya dexara bien nidiu’l so compromiso col asturianismu al aceutar el nomamientu como patrona de la Fundación Caveda y Navas, lo que fai albidrar que tamién habrá na so llista al Ayuntamientu Xixón nomes asturianistes y el PSOE tien de decidise en Xixón por una realidá incontestable: el pergran sofitu que tien el so coordinador de la zona Oeste, Serxu Solares. A too ello vien a xuníse la recién candidatura de Faustino Álvarez, otru veteranu asturianista nes files del PSOE, a l’alcaldía de Siero. Nesti sen, la derecha asturiana ta persabiendo adelantase al PSOE en dexar bien nidio que nun hai torgues a la presencia del asturianismu nes files de tolos partíos, no que nun pue interpretase sinon como un avisu de qu’entama a vese la llingua asturiana y la oficialidá como una reclamación ensin tintes partidistes. Los prósimos díes tendrán de ser granibles nesti sen y nesta fastera de la vida política. 24 de payares, 2006 0 FacebookTwitterPinterestEmail
Educación Actividaes complementaries na escuela d’Alderique 2006 by asturnet 23 de payares, 2006 La escuela del asociacionismu uvieín ufrirá una riestra d’actiuvidaes culturales complementaries que se van axuntar al programa formativu. Llinguaxes va entamar con una conferencia de Francisco García Pérez, caderalgu de lliteratura y llingua castellana titulada “El nome esactu de les coses”, la conferencia fadráse nel salón d’Actos de la Biblioteca Pérez d’Ayala d’Uviéu a partir de les 11,00 del vienres 24 de payares. A partir de les 20,30 hores del vienres habrá un conciertu d’Esmussein y la Debacle A.k.A La Perdición & Buby, nel chigre La Calleja la Ciega. El sábadu a partir de les 16,00 hores presentaráse la participación del Conseyu de la Mocedá d’Uviéu nel Intercambiu Xuvenil fechu a entamos d’ochobre en Nitra (Eslovaquia). La Escuela d’Alderique 2006 tien 9 talleres formativos tocando temes tan diversos como’l llinguaxe inmobiliariu, el caló, los podcast o l’usu de la llingua asturiana nes asociaciones xuveniles. 23 de payares, 2006 0 FacebookTwitterPinterestEmail