Mocedá d’Izquierda Asturiana embaló a Tejeiro

Nun actu de refuga de la simbolixía fascista nes cais d’Asturies les Mocedaes d’Izquierda Asturiana embalaron al Coronel Tejeiro como forma d’espeyar el deséu de la retirada de los monumentos y señales del réxime que dirixere Franco. Durante l’actu del 24 de payares los militantes de la organización xuvenil repartieron exemplares de la “Guía pa un Uviéu llibre de simboloxía franquista”, documentu nel que recueyen bona parte de los elementos que la organización propón retirar desplicando amás del so asitiamientu, el so significáu y los sos principales protagonistes, al tiempu que se fai una contestualización histórica de caún d’ellos.

P’acabar l’actu lleóse un comunicáu nel que la organización xuvenil venceyada a Izquierda Asturiana facía una reflexón sobre los ataques del franquismu a la cultura y los derechos ciudadanos, asina como a los intentos de destrucción de cualesquier identidá que nun fuera la de so.
Dende MIAS consideráse que “a lo cabero los tiempos venimos careciendo d’un nuevu surdimientu de movimientos fascistes, qu’ente otres munches repudiables aiciones, vindiquen los fechos y los restos d’esi tiempu tan murniu p’Asturies y pal restu l’Estáu, y qu’inda son bien visibles anguaño nes nueses cais” sicasí reconocen un mayor esmolecimientu social pola recuperación de la dignidá del bandu perdedor del 39 “y honrar la memoria de los millones de persones que vieron dende entós tapecida la so hestoria”.

Pa la organización xuvenil “esta llucha pola ‘memoria hestórica’ de la que tanto se fala güei conlleva necesariamente la retirada de monumentos, plaques y otres parafernalies que siguen nel llugar onde se punxeron va décades, que siguen rindiendo homenaxe a aquellos que derrocaron poles armes un réxime lexítimu, dexando millones de calabres pel camín, somorguiándonos na solombra ya imponiéndonos l’escaezu”. L’actu de MIAS tuvo crítiques hacia la política del Gobiernu español no tocante a la recuperación de la memoria. Pa MIAS el Gobiernu de Rodríguez Zapatero cola aprobación de la Llei de Memoria Histórica supón “un mediu camín que nun satisfái a naide y que como vien siendo norma nes politiques de Zapatero, tien l’únicu oxetivu d’anestesiar, de tapar boques. Pero la nuesa y munches otres, tienen güei más ganes de glayar que nunca”. Dende la entidá xuvenil consideren que la retirada de la simboloxía franquista ye dalgo inescusable y que “l’únicu llugar afayadizu pa estos oxetos ye un muséu de la memoria hestórica onde se faiga’l xustu y más riguruso recuerdu de los fechos d’esa dómina”