Comunicación L’Asociación Periodistes pol Asturianu denuncia l’imcumplimientu de les lleis que regulen la presencia del asturianu na RTPA by asturnet 15 de xunu, 2006 L’Asociación de Periodistes pol Asturianu denunció nun comunicáu fechu públicu na tarde d’ayeri la so preocupación ente les primeres emisiones de la televisión autonómica, ‘nes que la llingua asturiana nun tuvo nenguna presencia’. Pa los profesionales del mediu ‘nun tien nengún xacíu que nuna comunidá con llingua propia s’inore la so existencia nun mediu públicu que quier ser reflexu d’Asturies’ y entienden que ye ‘intolerable y incomprensible’ que e tapeza parte de la realidá asturiana, al empar que se tán vulnerando les lleis que regulen la presencia de la llingua asturiana na RTPA. Periodistes pol Asturianu considera que, polo que se vio nestes primeres emisiones de la televisión pública asturiana, se ta falando de ‘parcialidá y de discriminación pa con una parte importante de la población asturiana’ y por ello reclama qu’esti mediu que ta pagáu con dineru públicu ‘tien de tener presencia de la llingua pa que’l mediu, como tal, funcione como una ferramienta de normalización y non d’aniquilación llingüística’. Los profesionales del periodismu tachen de chocante’l fechu de que nun s’atienda a los principios d’actuación nos que s’inspira’l mediu: ‘Promoción de la cultura y la educación, con especial protección del bable, pente la promoción del so usu y difusión nos medios de comunicación social’. Asina, aseguren que la promoción de les llingües minorizaes ye ún de los motivos básicos que xustifiquen la puesta en marcha d’estos medios, por eso encuentren ‘difícil d’entender que s’arrequexe esti potencial nel mediu acabante d’echar a andar’. 15 de xunu, 2006 0 FacebookTwitterPinterestEmail
Lliteratura Pablo Rodríguez Alonso recueye’l XVI Premiu de Poesía Teodoro Cuesta de Mieres by asturnet 15 de xunu, 2006 L’alcalde y la conceyala de Cultura del Ayuntamientu de Mieres fixeren ayeri entrega del cheque con 4000 euros al escritor ganador de la última edición del Premiu de Poesía Teodoro Cuesta, Pablo Rodríguez Alonso. Na entrega del premiu, l’alcade mierense, que valoró ‘la importancia pa les lletres asturianes d’esti premiu, de referencia nes biografíes de los gracies escritores asturianos que lu algamaron nos últimos años’, anunció nueves actividaes rellacionaes cola lliteratura asturiana pa esti añu nel que se cumple’l 177 aniversariu de la muerte de Teodoro Cuesta. Luis María García, alcalde de Mieres, reiteró’l compromisu del so conceyu col asturianu ‘cola so normalización, col so usu y cola so dignificación’. Y al tiempu agradeció a Pablo Rodríguez Alonso la so participación nesti premiu, que ye’l más veteranu y prestixosu de les lletres asturianes, recordando los nomes de dalgunos de los ganadores como Berta Piñán, Lourdes Álvarez y Alfonso Velázquez, Xuan Bello, Antón García, Martín López-Vega y Chechu García, Pablo Antón Marín Estrada, Esther Prieto, Xuan Santori, Xabiero Cayarga, Ánxel Álvarez Llano, Marta Mori, Vanessa Gutierrez y Xose Ánxelu Gutierrez. Nacíu en Xixón nel añu 1979, Pablo Rodríguez Alonso ye llicenciáu n’Historia pola Universidá d’Uvieu. Como historiador tien ganáu’l premiu d’Investigadores mozos del Conceyu de Cáceres, mientres que la so dedicación a la poesía llevólu a ganar nel añu 2005 el prestixosu certame “Teodoro Cuesta”. 15 de xunu, 2006 0 FacebookTwitterPinterestEmail
Lliteratura Xosé Ánxelu Gutiérrez presenta ‘Países’ na Llibrería Asturiana de Trabe by asturnet 15 de xunu, 2006 L’escritor avilesín Xose Ánxelu Gutierrez Morán presenta güei a les siete y media la tarde na Llibrería Asturiana de Trabe, el so poemariu ‘Países’, col qu’algamó’l premiu Teodoro Cuesta de Poesía na edición del añu 2004, ‘ex aequo’ cola poeta Marta Mori d’Arriba. La presentación de ‘Países’ va correr a cargu del tamien escritor y profesor na Universidá d’Uvieu, Xulio Viejo. Xose Anxelu G. Morán (Aviles, 1969) ye doctor en Bioloxía pola Universidá d’Uvieu y trabaya como investigador nel Centru Oceanográficu de Xixón. Autor d’una ventena d’artículos científicos, esta ye la so primer incursión na lliteratura a nun ser por un relatu premiáu nel Concursu de Cuentos pola Oficialidá de Bimenes en 2002. ‘Países ye un intentu arraimente empíricu d’aplicar el metodu poeticu pa ordenar el mundu’, asegura’l comentariu editorial, nel que ‘los diferentes poemes, marcaos por una señaldá posada, conformen un atles de los países que, dacuando con permisu de residencia y dacuando ensin papeles, foron faciendo la biografía del autor’. 15 de xunu, 2006 0 FacebookTwitterPinterestEmail
Lliteratura Pablo X. Suárez presenta ‘Asturiana Beat’ na Llibrería Asturiana de Trabe by asturnet 13 de xunu, 2006 Na solapa del poemariu ‘Asturiana Beat’ dizse que l’autor, Pablo X. Suárez, emigró a Wesfalia depues de terminar los sos estudios de Filoloxía Hispánica, onde trabayó un añu na empresa automovilística. Tamien se diz que de vuelta a Asturies publicó dellos cuentos y poemes, enantes de morrer en circunstancies non esclariaes na Vega d’Arcenoriu (Ponga) con 24 años. Solapa provocadora pa un poemariu provocador que va ser presentáu esta tarde, a les siete, na Llibrería Asturiana d’Ediciones Trabe, responsable de la espublización d’esta obra. El yo del poema n’Asturiana Beat ye un yo ficcional. Nun tien dengún filtru moral pa esti yo n’estáu de llibertá absoluta y que busca de contino la tresgresión. Poesía social dacuando egoísta, escrito por ‘un yo pervertíu, drogadictu y cuasi siempre cerca del total desesperu’. Pilar Fernández va ser la encarga de presentar el primer poemariu de Pablo X. Suárez, esta tarde, a les siete, na Llibrería Asturiana de Trabe, na Cai Padre Buenaventura de Paredes, 4. Uvieu 13 de xunu, 2006 0 FacebookTwitterPinterestEmail
Lliteratura La Cátedra Emilio Alarcos trai mañana al centenariu Francisco Ayala by asturnet 12 de xunu, 2006 Baxo’l títulu de ‘Corversación con Francisco Ayala’ la Cátedra Emilio Alarcos Llorach de la Universidá d’Uvieu trai mañana, a les ocho la tarde, al academicu centenariu y Premiu Príncipe d’Asturies de les Lletres, amás de Premiu Cervantes, Francisco Ayala. Nel actu, l’autor d’obres como ‘Hisotira de un amanecer’ charrará col rector de la Universidá, Juan Vázquez, y la directora de la cátedra y vilda d’Alarcos, Josefina Martínez. La obra d’Ayala ye comparada cola de Thomas Mann y Aldous Huxley pola so ironía, deshumanizacion ya intelectualismu. Nacíu en Granada en 1906 vivió exiliáu en l’Arxentina onde trabayó poniendo clases en dalgunes universidaes, pa depues pasar a la de Puerto Rico en 1950 y norteamerica en 1958. Ente la obra d’Ayala destaca ‘El hechizado’, ‘Los usurpadores’. ‘El rapto’, ‘El jardín de las delicias’ y ‘El fondo del vaso’. 12 de xunu, 2006 0 FacebookTwitterPinterestEmail
Lliteratura Sergio Algora presenta na Fnac ‘A los hombres de buena voluntad’ by asturnet 12 de xunu, 2006 Sergio Algora (Zaragoza, 1969), consideráu Nuevu Talentu Fnac Lliteratura, presenta esti vienres día 17 de xunu a les siete y media la tarde la so obra ‘A los hombres de buena voluntad’ editada por Xordica en 2006. Nel actu de presentación que tendrá llugar nel Fórum de la Fnac de Parque Principáu va dialogar col so compañeru Fran Fernández, de La Costa Brava y Australian Blonde, col que tamien dará un conciertu acústicu al terminar la xornada. Depues d’editar doce discos con El Niño Gusano, Muy Poca Gente y La Costa Brava, y cinco llibros de poemes, Sergio Algora presenta con ‘A los hombres de buena voluntad’ la so primer colección de relatos que sirven como carta de presentación d’esti autor mozu nel mundu de la narrativa. Los personaxes de los cuentos d’Algora, increyibles pero cercanos, viven entregaos d’una forma desesperada y feliz a la vida. Partiendo de les atmósferes máxiques de los cuentos clásicos, Algora escribe les hisotires qu’avancen ente la ciencia ficción y la lliteratura visionaria, deformándoles cola so mirada corrosiva y posmoderna. 12 de xunu, 2006 0 FacebookTwitterPinterestEmail
Lliteratura ‘Cuentos del Sil’ recueye la lliteratura escrita n’asturianu de les comarques d’El Bierzu by asturnet 11 de xunu, 2006 Les asociaciones de defensa del asturlleones El Toralín y El Fueyu tán acabantes d’espublizar, col apoyu de la Diputación de Lleón, un volume de cuentos que, baxo’l títulu de ‘Cuentos del Sil’, recueye los testos de nueve autores lleoneses, d’ente 20 y 80 años, escritos nesta llingua que, como dicen los propios promotores, ‘ye la de so’ y ta amenazada pol prestixu de la llingua castellana y la presencia d’un gallegu normativu na fastera más occidental d’El Bierzu, arrequexando al lleones qu’ellí se fala. Siguiendo l’exitu algamáu por ‘Cuentos de Lleón’, editáu en 1996 y escosáu pocu tiempu depues, varios escritores de la parte más occidental de Lleón tán acabantes d’espublizar, cola ayuda de la Diputación lleonesa, un volume de cuentos escritos nel asturlleones faláu na parte d’El Bierzu. D’esta manera, les asociaciones El Toralín y El Fueyu, promotores d’esta iniciativa, quieren ‘potenciar y dignificar’ una llingua en peligru d’estinción, destacando amás qu’estos relatos vienen de comarques como Ribasdesil, El Bierzu Este y Central, Furniella y La Cabreira. Asina, nel entamu de la obra, que correspuende a Abel Pardo, los promotores d’esti proyectu editorial con vocación de continuidá analicen una situación na que ‘la llingua castellana cumu idioma de prestixu, y el gallegu normativu na fasteira más oucidental, arrequeixan al Llïones’. En ‘Cuentos del Sil’ pueden encontrase los relatos de nueve autores, d’orixen y nacencia bien estremada, que tienen en común la llingua na qu’escriben. Col subtítulu de ‘Na nuesa llingua’ escritores como Severiano Álvarez, Álex Díez, Daniel Fernández, Eva González, Roberto González-Quevedo, Xuasúa González, Felix Llópez, Adrianu Martín y Abel Uxeniu Pardo, d’edaes estremaes que van dende los venti a los ochenta años, axunten los sos relatos nun proyectu lliterariu de dignificación de la llingua asturiana falada n’El Bierzu. L’escritor presente nesta antoloxía, Roberto González-Quevedo valora esta iniciativa ‘como un fechu mui importante pa la dignificación de la llingua nestes comarques onde se fala asturlleones, sobremanera teniendo en cuenta que la so edición foi apoyada pola Diputación de Lleón’. L’academicu de la llingua asturiana, estima especialmente la diferencia d’edá de los autores d’estos relatos, asina como la diferencia d’estilos y tradiciones lliteraries que representen, ‘porque amuesa la vida de la llingua y la so continuidá xeneracional’. Sicasí, como únicu puntu negativu nesti volume de relatos, González-Quevedo considera un error ‘ensin futuru’ la introducción d’un rasgu ortográficu nos testos ‘qu’incumple dafechu la normativa academica’, y asina lo manifestó nuna recien presentación de la obra xunto al restu d’autores de la obra. ‘Rechazo dafechu esti cambiu ortográficu absurdu’, comentó González-Quevedo, dexando claro que pa el ‘les normes ortográfiques academiques son sagraes’, y insistiendo ‘no absurdo d’esti asuntu, hasta tal puntu qu’inclusive yo tardé varios díes en reparar nello, pensando que yera una errata d’imprenta’. 11 de xunu, 2006 0 FacebookTwitterPinterestEmail
Comunicación La XPDLLA acusa al Gobiernu de desaniciar l’asturianu énte la puesta en marcha de la RTPA by asturnet 8 de xunu, 2006 Güei empiecen les emisiones regulares de la canal pública de televisión asturiana cola programación, a les ocho, del parte informativu de la tarde. Énte la puesta en marcha de la RTPA y la “presencia marxinal del asturianu nes sos emisiones”, la Xunta pola Defensa de la Llingua Asturiana denunció “‘l despreciu del Gobiernu asturianu pola opinión de los asturianos, que dende hai más de 15 años vien manifestándose mayoritariamente a favor de la esistencia d’emisores públiques de radio y televisión qu’emitan íntegramente n’asturianu” y acusólu d’ “avanzar nel procesu de substitución y desaniciu de la llingua”. La Xunta pola Defensa de la Llingua Asturiana considera inalmisible que la presencia de l’asturianu nes emisiones de la RTPA se solventen cola “especial protección al bable” que figura na llei que dio pie a la creacción del Ente de Comunicación públicu asturianu. “El Gobiernu asturianu demuestra que non solo nun tien intención de trabayar na defensa del patrimoniu llingüísticu d’Asturies, sinon que mantien firme la so voluntá de siguir avanzando nel procesu de substitución y desaniciu de la llingua asturiana”, asegura la organización cívica nun comunicáu públicu. “La esperiencia d’otres comunidaes con llingua propia que yá cunten con organismos de radiotelevisión amuesanos que los medios de comunicación audiovisuales son ferramientes indispensables de normalización social de les llingües amenazaes”, poro l’asociación en defensa de la llingua asturiana considera que quita-y esi usu na televisión pública a l’asturianu ye “imponer el castellanu nun ámbitu nuevu d’usu que-y va dar más puxu na presión qu’exerce pola sustitución llingüística total y apostar pola muerte segura del nuesu idioma autóctonu”. Por ello, la Xunta pola Defensa de la Llingua Asturiana acusa al Gobiernu asturianu “d’actuar d’espaldes a la Constitución, qu’afita como obligación de los poderes públicos «promover les condiciones pa que la llibertá y la igualdá de los individuos y de los grupos nos que s’integra seyan reales y efectives, a la vez que reconoz y garantiza’l derechu a la llibre espresión y al accesu a los medios de comunicación públicos de los grupos sociales significativos, respetando el pluralismu de la sociedá y les demás llingües d’España»; de nun respetar l’Estatutu d’Autonomía d’Asturies, qu’otorga a Asturies les competencies sobre’l desarrollu llexislativu y execución del rexime de tolos medios de comunicación social y sobre’l fomentu y protección del asturianu; y d’incumplir la Llei 1/98, d’Usu y Promoción del Asturianu, qu’obliga a l’Alministración Autonómica a velar por una presencia axeitada del asturianu nos medios de comunicación nos que participe”. 8 de xunu, 2006 0 FacebookTwitterPinterestEmail
Comunicación La TPA empieza a emitir en pruebes dende la Laboral de Xixón by asturnet 6 de xunu, 2006 La Radiotelevisión del Principado de Asturias (TPA) va estrenar les sos emisiones regulares el prósimu vienres, 9 de xunu, colos partes informativos de les ocho y media la tarde. Echa a andar d’esta manera la televisión pública asturiana que, anque yá empezó a emitir en pruebes dende la so se na Laboral de Xixón, va dir a poco y a poco completando la so parrilla de programación. Esti empiezu d’emisión “ye’l pasu definitivu pa la puesta en marcha d’un complexu tecnolóxicu que se va encargar de la emisión regular de la programación” al travies d’un sistema basáu dafechu na tecnoloxía dixital, según afirmaron los responsables de la canal pública rexonal que tovía nun confirmen los conteníos de tala programación. 6 de xunu, 2006 0 FacebookTwitterPinterestEmail
Lliteratura Recital d’Antonio Gala nel Paraninfu de la Universidá d’Uviéu by asturnet 6 de xunu, 2006 L’escritor Antonio Gala va facer llectura esta tarde, a les ocho, de los sos poemes nel Paraninfu de la Universidá d’Uvieu, nun actu lliterariu organizáu pola cátedra Emilio Alarcos, qu’amás prepara la visita del centenariu Francisco Ayala pal miercoles de la selmana qu’entra. Antonio Gala (Córdoba 1936) ye autor de varios llibros de poemes, relatu, teatru, ensayu y articulismu, que cunta na so carrera con reconocimientos tan importantes como’l Premiu Planeta, el Premiu Nacional de Lliteratura, asina como’l prestixosu Adonais. Gala espublizaba’l pasáu mes d’avientu un poemariu col títulu d’ ‘El poema de Tobías desangelado’ que foi tou un esitu de ventes. 6 de xunu, 2006 0 FacebookTwitterPinterestEmail