El Conceyu d’Uviéu acueye los actos oficiales del Día del Arguyu LGTB

El Conceyu d’Uviéu acueye los actos oficiales del Día del Arguyu LGTB
01 xunetu 08:50 2016 Imprimir

El Conceyu d’Uviéu foi l’escenariu del actu institucional del Día del Arguyu LGTB entamáu por Xega. nos que participaron l’alcalde, Wenceslao López, la vicealcaldesa, Ana Taboada, la concejala d’Igualdá, Marisa Ponga, la vocera d’IX, Cristina Pontón y la directora del Institutu Asturianu de la Muyer, Almudena Cueto.

Tamién tuvieron presentes ediles de tolos grupos municipales según diversos representantes de la política local y rexonal d’Asturies, sindicatos  y numberoses agrupaciones sociales, amás de vecinos de la capital rexonal, que quixeron compartir la celebración del Día del Arguyu LGTB.

Na so intervención, l’alcalde, Wenceslao López, sorrayó que “la igualdá y la llibertá nun precisen presupuestu, namiá voluntá política” y aseguró que “un Uviéu meyor, pasa por desterrar les diferencies” evitando etiquetar a les persones.

Pela so parte, la vicealcaldesa, Ana Taboada, aseguró “que ye un prestu abrir les puertes d’esti conceyu per primer vegada na hestoria al actu institucional” d’esti día y añedió que’l consistoriu tamién va celebrar la xornada del 17 de Mayu, Día Internacional contra la Homofobia y Transfobia, pa siguir trabayando na llucha contra l’odiu, el bullying y les agresiones que siguen asocediendo “n’España y n’otros llugares del mundu, como lo asocedío n’Orlando”.  Amás, Taboada propunxo visibilizar a activistes LGTB nel caleyeru de la ciudá.

La vocera d’IX, Cristina Pontón, sorrayó la necesidá de celebrar esti tipu d’actos públicos “pa educar nel respetu” a la sociedá y animó a los presentes “a siguir lluchando”.

Nel actu, la organización Xega apurrió’l premiu Triángulu Rosa, que reconoz iniciatives de respetu, integración y visibilización al I Festival de Cine LGTBIQ entamáu pel Centru Niemeyer y realizó una mención especial a la maestra Lucía Lietsi por “poner cara n’Asturies a la asexualidad, una realidá pocu visible y apenes conocida”.  La organización tamién fixo entrega del premio Lladriyu Rosa al empresariu Carlos Zúñiga col que quier denunciar “faltes de respetu escontra la Diversidá afectivosexual”.

La celebración del Día del Arguyu LGTB siguió nel Paséu de Los Álamos onde s’encendió una vela poles víctimes de la matanza d’Orlando y toos aquelles que se vieron escorríes pol odiu y la homofobia.

  Categories: