Cultura promociona la poesía n’asturianu con un ciclu internacional d’alcuentros lliterarios

La Conseyería de Cultura, Política Llingüística y Turismu impulsa’l nuevu ciclu Quod Erat Demonstrandum (QED) pa promocionar y dar voz a los poetes en llingua asturiana dientro y fora de la comunidá. La iniciativa va axuntar en dellos alcuentros a poetes del Principáu con autores d’otros llugares, que van ser traducíos a la llingua asturiana para la ocasión. Les xornaes van desenvolveses hasta finales d’añu na Biblioteca d’Asturies Ramón Pérez de Ayala,d’Uviéu.

El primer alcuentru del QED celebrose’l vienres, día 21, con Xaime Martínez, Aurélia Lassaque y Xosé Antón Ambás. Darréu, el 25 de payares va ser la vez de María García, Marta Mori y Olga Novo. Y finalmente, el 16 d’avientu van lleer los sos poemes Nacho Vegas, Xuan Bello y Bernardo Atxaga.

QED pretende promover l’intercambiu d’esperiencies poétiques al traviés del diálogu ente autores n’asturianu y poetes que provienen d’otros llugares pero caltienen estilos asemeyaos. El ciclu, entamáu pola Asociación Cultural Mezá col sofitu de la Dirección Xeneral de Política Llingüística, naz cola vocación de convertise en puntu d’alcuentru pa escritores d’Asturies, sofitar la calidá lliteraria y promover la diversidá xeneracional y d’estilos.

El nome del nuevu ciclu poéticu, coordináu pol escritor Miguel Rodríguez Monteavaro, vien de les llocución matemática llatina que la so traducción sería “como queda demostráu”, una alusión directa a la necesidá de sofitar y favorecer la profesionalización del exerciciu de la creación poética.