Cadavéu recibió la primer Xunta d’Escritores na Casa Natal del Padre Galo

La casa del escritor clásicu asturianu Fernán Coronas, recibió esti sábadu lo que se nomó como “I Xunta d’Escritores en Llingua Asturiana na Casa Natal del Padre Galo”, onde escritores y persones venceyaes a la cultura asturiana aldericaron alredor de la lliteratura asturiana y la sociedá na que se desenrrolla. L’actu sirivó amás pa homenaxear al Padre Galo y a la escritora valdesana Nené Losada, que morrió esti mesmu añu. Asturnews ufre un completu reportaxe fotográficu y d’audiovisuales.

La xornada entamó a les diez y media coles intervenciones de Néstor Xosé Fernández, Conceyal de Cultura que se disculpó por nun ser quien a “espresase n’asturianu”, celebrando darréu “la llegada de los escritores al conceyu de Valdés”. Ana Cámara, Xefa de la Seición de Coordinación Bibliotecaria de la Conseyería de Cultura y Turismu, aprovechó pa recordar que la Xunta coincidía col Día de la Biblioteca. Roberto González-Quevedo, secretariu de l’Academia de la Llingua Asturiana, participó dempués, rematando les intervenciones Juan Fernández Pereiro, alcalde de Valdés, l’alcalde pedaniu de Cadavéu y Consuelo Vega, Direutora Xeneral de Política Llingüístical, que recordó la importancia de los escritores homenaxeaos na Xunta, Padre Galo y Nené Losada, que dixo “nun son escritores namás valdesanos, son grandes escritores asturianos y en toa Asturies tamos arguyosos d’ello”.

González-Quevedo dio llectura a la ponencia “Pol camín del Padre Galo”, onde percorrió la historia de la lliteratura escrita na variante occidental del asturianu, faciendo alcordanza d’Eva González, Basilio Garrido, Ignaciu Llope y otros munchos “que dieron de sí una granible lliteratura”.

Darréu, los participantes de la Xunta axuntáronse en delles meses de trabayu, la primera sobre Escribir n’asturianu, coordinada por Mª Esther García López, escritora y miembru correspondiente de l’Academia de la Llingua Asturiana; la segunda alredor d’editar n’asturianu, coordinada por Carmen Guardado Parga, escritora y profesora de Llingua asturiana y la cabera, sobre lleer n’asturianu, al cargu de Cristina Álvarez y Santiago Pérez, directores de biblioteques del occidente. L’alderique pararía al meudía pa la xinta.

Dempués de la xinta, amenizada pola actuación d’un quintentu de gaiteros de la Banda de Gaites “Faro de Luarca”, Xosé Nel Fernández Riesgo, escritor, faló de la lliteratura en llingua asturiana como elementu na construcción de l’Asturies del sieglu XXI nuna ponencia apasionada na que declaró tar cansáu “de los comportamientos de dellos escritores de la segunda xeneración” que pal autor avilesín “vendiéronse por cuatro perres”. La conferencia foi, amás, una defensa del momentu vivíu pola lliteratura asturiana nos años ochenta. Pa Riesgo, a partir de los noventa “perdióse la oportunidá de facer una lliteratura combativa”.

Dempués del alderique porterior a la conferencia, les meses de trabayu siguieron, dando llectura a les conclusiones a les cinco. La mesa d’escritores reclamó “la oficialidá del asturianu pa da-y normalidá a la lliteratura”, mientres que la mesa dedicada a la edición reclamó “una meyor enseñanza del idioma y la lliteratura nes escueles” y “l’adaptación de les editoriales al nuevu mercáu tecnolóxicu”, ente otres cuestiones. La mesa de llectura n’asturianu, peslló les intervenciones recordando la necesidá “de llibros n’asturianu de más temes, non solo lliterarios, fai falta ensayu divulgativu, materiales sobre ciencia”. Les conclusiones van espublizase nos mese vinientes.

A les siete celebróse’l pieslle con un Homenaxe a Nené Losada, a cargu de Mª Esther García López, que recordó la so vida y obra en presencia del fíu de l’autora, José Antonio y vecinos de Cadavéu. Darréu, María Regla Rico; miembro de la sociedá popular La Regalina, homenaxeó al Padre Galo, recordando la fiesta creada por esti popular escritor, na que cada añu lo asturiano y l’asturianu son protagonistes.

Na Xunta tuvieron amás de los yá nomaos, escritores y persones venceyaes a la cultura asturiana como Carlos Rubiera, Javier Cubero, Esther Prieto, Inaciu Galán, Rafa Lorenzo, Ana Fernández Marqués, Xuan Santori, Esti Rubio, Ricardo Sánchez del Pulgar y Xosé Manuel Fernández, ente otros.

Les gaites volvieron a despidir a los escritores dempués d’una xornada na qu’hubo tiempu pa la reflexón alredor de la lliteratura asturiana nun espaciu tan especial como ye la casa natal del Padre Galo.