Grau, el mercadón de la cultura

La villa moscona, que va años yera conocida sobremanera polos sos mercaos, foi pasu ente pasu,y ensin dexar de potenciar esi atractivu comercial, convirtiéndose nun centru cultural de primer orde, que tien por fitos la so Casa Cultura, l’Aula de les Metáfores, la Escuela de Música y el Muséu Etnográficu. Cuatro instalaciones alredor de les que surdieron nos años últimos una montonera d’iniciatives culturales que trescienden del ámbitu moscón pa convertise nun focu d’emisión de cultura pa toa Asturies y pal restu del mundu.

Cuando nun llugar la cultura ta en movimientu y vive nes cais y nos caminos, les iniciatives surden perdayuri. Asina, unes y otres van sumando hasta convertir a Grau nun auténticu “mercadón de la cultura”.

En 1982 fundábase’l Muséu Etnográficu de Grau, y dende entós foi medrando la so colección, hasta conviertise nel espaciu de referencia pa la cultura del centru-occidente asturianu que ye anguaño. Nel muséu los visitantes pueden averase al procesu tradicional col que se facía’l pan, conociendo’l funcionamientu de molinos y pisones; recordar los vieyos oficios de paxeru, alfareru, etc. o adientrase nos vezos de la casa tradicional y ver les cacíes d’enantes.

Y Grau ye exemplu na conservación de la cultura tradicional tamién na voz de los sos habitantes. Xosé Ambás, vecín del pueblu moscón que-y da nome, dio a conocer con gran ésitu la música tradicional de Grau y de toa Asturies na televisión pública asturiana, al traviés del so Archivu de la Tradición Oral Asturiana, qu’entamó recopilando d’esti conceyu, col asturianu bien conserváu na voz de los sos vecinos y con un patrimoniu musical y narrativu ablucante.

Y la música sigue abriéndose pasu en Grau. La Escuela de Música estrenó esti setiembre pasáu instalaciones nueves, y cientos de neños del conceyu deprenden cada día a tocar instrumentos como’l pianu o la xiblata travesera, pero tamién el más representativu de los asturianos, la gaita. Profesores como Xaime Arias, Nélida Menéndez, Antón Fernández Ceballos o’l gaiteru Iñaki Sánchez Santianes, ente otros, faen posible esta iniciativa que yá tien tamién les sos consecuencies positives.

En mayu d’esti añu debutaba la Banda de Gaitas Conceyu Grau y ceo, d’esta iniciativa, surdía otra más, creada polos miembros de la banda, l’asociación cultural La Veiga’l Cubia, una más na llarga llista d’entidaes que puxen pola cultura en Grau.

Pero nun ye too patrimoniu inmaterial o etnográficu, la cultura escrita, la lliteratura, cumple un importante papel na villa. La Casa Cultura, cola so Biblioteca Valentín Andrés , ye quiciabes el puntu central de la cultura del conceyu. Los sos concursos de marcapáxines, los clús de llectura, les presentaciones de llibros, les esposiciones y les conferencies enllenen un programa bien fechu y que sabe poner en valor lo propio y acoyer iniciatives interesantes.

Ye’l casu de l’Aula de les Metáfores de Fernando Beltrán, creada pol poeta y el Conceyu en 2004, dempués de que’l primeru donará 1.600 poemarios pa la creación d’un espaciu que nun ye namás una colección de llibros, sinón tamién un llugar pa que la poesía viva y medre. Per esta Aula pasaron yá dalgunes de les voces poétiques más importantes del panorama asturianu y estatal.

Un exemplu que tán siguiendo tamién los más pequeños del conceyu. En Víu’l Picu, un pueblín asitiáu quince quilómetros al sur de la villa de Grau, funciona “El Pizarrín de Cá Pachín”, una tertulia infantil y xuvenil onde los neños del conceyu van a lleer y comentar les sos llectures, a atopase colos sos autores preferíos, a deprender a divertise lleendo y compartiendo les llectures.

Viendo esta afición pola llectura nun ye raro qu’en Grau tamién haya publicaciones como “Las hojas del Foro”, qu’edita otra entidá imprescindible del conceyu, l’Asociación Cultural Valentín Andrés, y que cunta con collaboraciones lliteraries bien importantes. Otra de les asociaciones con más repercusión ye la d’Amigos de Grau, que cada añu entrega los premios Moscones d’Oru y qu’apoya iniciatives empobinaes a la promoción cultural del conceyu.

Actividaes como la que va entamar en pocos díes na villa de Grau. Cada añu, dende va trés, celébrase’l Salón del Llibru, qu’en collaboración coles editoriales asturianes representaes nel Gremiu d’Editores (una d’elles, La Cruz de Grau, con sede nel conceyu), trai a Grau les novedaes lliteraries últimes. Grau conviértese asina nel primer sitiu d’Asturies onde se presenten dalgunes obres recién sacaes al mercáu llibreru. Y ye qu’hasta pa entamar l’añu, Grau ye un mercadón de cultura.