22 de marzu Día Mundial del Agua

La Coordinadora asturiana d’ONGDs por mor de la cellebración el 22 de marzu del Día Mundial del Agua y nel marcu de la so campaña ¿Quién debe a quién? llama a la ciudadanía a continuar reivindicando l’abolición de la delda esterna y la restitución de la delda ecolóxica.

Los datos facilitaos pola Coordinadora d’ONGDs asturiana amuesen qu’una de cada tres persones nun tien accesu al agua potable por nun tener los medios afayadizos pa garantizar la salubridá del elementu. Y ye qu’anque más del 70% de la superficie de la Tierra tea cubierta d’agua sólo’l 2,5% d’esti agua ye apta pal consumu.
Dende la Coordinadora consideren que la crisis d’abastecimientu d’agua agrávase nun momentu nel que les fontes y manantiales tán privatizándose, citando qu’el Fondu Monetariu Internacional utiliza’l recursu de la privatización d’estos pa conceder préstamos a los países en víes de desarrollu.
La Coordinadora, atendiendo a les cifres y estadístiques, denuncia que l’importe de los intereses que los países del sur aporten a los países desarrollaos por esta cuestión podríen ser abondo como pa garantizar un suministru afechiscu d’agua a la población. Ye’l casu pol que nos países africanos los gobiernos han pagar 15$ por persona en conceptu de gastos de delda y empobinar sólo 5$ a servicios como la salú y la educación.
La campaña ¿Quién debe a quién? ta compuesta por más de 50 organizaciones estatales que trabayen nel ámbitu de la cancelación de la delda esterna de los países en víes de desarrollu.