Xurde Blanco presenta apelación escontra la sentencia del Xulgáu númberu 5

Tres de conocese la sentencia qu’esperaba sobre les sos reclamaciones pola negativa de l’Alministración a permiti-y emplegar l’asturianu na so relación con ella, Xurde Blanco vieno acabante de presentar apelación nel xulgáu de lo Contencioso-Alministrativu númberu 5 d’Uviéu.

Xurde Blanco torna a dexar afitao que “nel plazu xustu d’un mes (de 24 de setiembre a 23 d’ochobre), sobre un mesmu asuntu –si un funcionariu tien o non drechu a empobinase n’asturianu a l’Alministración del Principáu d’Asturies que lu emplega, nel intre de defender los sos intereses llaborales- dos xulgaos de lo Contencioso-Alministrativu d’Uviéu, el tres y el cinco, dan resoluciones opuestes”. Darréu d’ello presenta esta apelación na que desplica que la situación de los derechos llingüísticos de los asturianos entama a ser kafkiana y a poner en tela de xuiciu’l valor de les lleis cuando traten de temes llingüísticos, dexando nidio que namái la oficialidá pue garantizar los más mínimos derechos ciudadanos nesti sen.

Nesta apelación, Xurde Blanco fai alcordanza de que “el objeto del presente pleito se circunscribe a la negativa por parte de un órgano de la Administración Asturiana a tramitar tres escritos que un funcionario le dirigió, en el ejercio de sus derechos -que no en el cumplimiento de sus obligaciones- a licencia por asuntos propios y a vacaciones anuales, y ello por el hecho de que eligió la lengua asturiana para redactar tales textos”, poniendo nuna evidencia nidia les contradicciones mentaes.