Xurde Blanco: “El Gobiernu llingüicida d’Areces buscó valtiar la Llei d’Usu y recibió una xostrada”

Xurde Blanco Puente, Lletráu del Serviciu Xurídicu del Principáu d’Asturies y secretariu del Aconceyamientu de Xuristes pol Asturianu viose estos díes lleváu a la primer plana de l’actualidá en tol estáu pola mor del Autu del Tribunal Constitucional que reconocía la llegalidá de la Llei d’Usu del Asturianu, dempués d’un procesu qu’entamó dempués de que-y ñegaren un permisu por tar n’asturianu. Asturnews fala con él pa conocer les sos opiniones y afondar nes repercusiones d’esta decisión xudicial.

-Dempués de que-y ñegaren permisu pa dalgo tán vital como operase, por tar la petición n’asturianu, ¿cómo se recibe personalmente esta sentencia?

-Esti asuntu vívolu más como activista polos drechos llingüísticos que como ciudadanu. -Como bien diz, esti ye un trabayu conxuntu d’AXA, ¿cómo reciben dende Xuristes pol Asturianu una decisión tan importante del TC,tomada amás pol plenu del mesmu?

-Asina, como dalgo colectivo, foi plantegáu dende un principiu y col asentimientu de los collacios de la Xunta Executiva del Aconceyamientu de Xuristes pol Asturianu. Tamos percontentos porque ye un pasín p’alantre pa nós y una xostrada pal gobiernu llingüicida d’Areces.

-¿Qué supón pal Gobiernu d’Asturies y dende’l so puntu de vista esta sentencia?

-Ye una prueba más de quién son, del so antiasturainismu escambronáu y bederre.

-¿Cómo valora’l votu particular del maxistráu del Tribunal Constitucional, que por ciertu, fuere escoyíu pol PSOE?

-Vieno mui bien porque esclaria’l conteníu del autu, pero’l so tresfondu nun ye otru qu’intentar resucitar la vieya categoría xurídica de les rellaciones d’especial suxeción, aperiada per ideoloxíes totalitaries y mui emplegada nel réximen franquista pa lexitimar los abusos de poder. El Tribunal Constitucional echóla abaxo yá en sentencies del añu 1990.

-¿Queda la Llei d’Usu del Asturianu blindada con esta sentencia?

-No que cinca a la so constitucionalidá sí, pero tratándose como se trata d’un testu llegal técnicamente non mui afortunáu va siguir dando guerra nel aspectu interpretativu.

-Va tiempu que diz que yera importante “desprovincializar el conflictu xurídicu del asturianu”, ¿demuestra esti veredictu la esistencia de determinaes zunes escontra l’asturianu nel sistema xudicial asturianu?

-Tán pa vese toles sentencies del Tribunal Superior de Xusticia d’Asturies y de los Xulgaos de lo Contencioso-Alministrativo. De qué padres son fíes sabrálo so madre. En too casu, y a la vista d’elles, ye perconveniente desprovincializar la xusticia nesta materia.

-¿Cree qu’esistió dalgún tipu d’intervención política pa que’l maxistráu del Xulgáu Contencioso-Alministrativu d’Uviéu que llevó’l so casu plantegare la constitucionalidá de la Llei d’Usu ente’l TC?

-Yo nun soi home de fe polo que nun practico el “creo”. Lo que sí puedo afitar ye que la representación llegal del Principáu bien qu’afaló buscando’l plantegamientu de la custión d’inconstitucionalidá y con ella’l valtiar la Llei d’Usu.

-¿Supón esta decisión xudicial un pasu más p’hacia la oficialidá del asturianu?

-Son coses perestremaes. Lo que ye un pasu más pa esmazcaritar dafechu (si a daquién-y queden duldes) al gobiernu asturianu, tolos que son parte d’él (Dirección Xeneral de Política Llingüística, por exemplu) y los partíos políticos que lu sofiten (PSOE, IU, Bloque y el popularmente conocíu como “el verde sobrín de Maximinu”.

-¿Qué opina de les declaraciones feches por Consuelo Vega, Directora Xeneral de Política Llingüística, nes que dicía tar contenta pola decisión?

-Dos coses: que sirve al so amu y que de Drechu nun conoz nin los rudimentos.

-¿En qué otros casos trabaya anguaño Xuristes pol Asturianu?

-Nel plantegamientu d’un recursu escontra l’Estáu español énte’l Tribunal Européu de los Drechos Humanos por concucación de los drechos llingüísticos n’Asturies; na igua d’un sestu informe al Conseyu d’Europa escontra l’Estáu español poles mesmes causes; na puesta en marcha, en xunto con una camaretada de compañeros non xuristes, del Rexistru de la Discriminación Llingüística n’Asturies; nun pleitu plategáu al equipu de gobiernu de la Universidá d’Uviéu qu’aprobó una discriminatoria resolución pal rexistru d’escritos n’asturianu; y en dalguna cosa más que nun nun me vien agora a la cabeza.