Xosé Bolado: “Que l’asturianu nun seya oficial dexa ablucao a xente que sigue la nuesa lliteratura”

Ye unu de los poetes meyor valoraos de la lliteratura asturiana contemporánea, pero la so obra más conocida ye la dedicada al estudiu de les nueses lletres, y por supuestu la fundación y dirección de la revista lliteraria de l’Academia de la Llingua Asturiana, institución de la que ye miembru, que punxo en marcha en 1990 y acaba de llegar al númberu 29. Amás, cola editorial Impronta acaba d’asoleyar un nuevu poemariu “La bona intención”, que sal al mercáu n’edición billingüe castellán-asturianu. Con esta xida falamos con él d’ello y d’otres cuestiones.

-Acaba de llevar a les llibreríes “La bona intención” que la editorial califica como “una sutil aventura instrospectiva”, ¿ye un poemariu más personal de lo habitual?

-Quiciabes, viendo’l resultáu, sí. De toles formes yá sabemos la distancia qu’hai ente’l referente ya’l testu final. En dellos casos paez cierto que nel procesu d’escritura s’afita más la fábula hestórica. Pero lo central ye siempres l’esmolecimientu pol axuste, la tresparencia, la música propia de les pallabres necesaries. Nesa tensión o llucha, pienso, muéstrase l’auténtica rellación personal.

-La edición ye billingüe, n’asturianu y castellán, ¿ayuda a averar a más llectores?

-En principio, paez lóxico. Dempués habrá que velo en cada casu, pues depende tamién d’otros factores: la distribuición curiosa, la promoción, la calidá propia del llibru, lo qu’ aporte a los llectores d’otres llingues.

-Pesie a los recortes acaba de salir un númberu nuevu de la revista lliteraria de l’ALLA, “Lliteratura”, que dirixe, ¿qué podemos atopar nesti númberu nuevu?

-El recorte, de mano, supunxo un retrasu considerable na salida. Siguimos coles seiciones conocíes, yá con un bon númberu de collaboradores, ente poetes, narradores, traductores, ensayistes, etc. Tamién, como marca de la casa, quiximos que la revista tuviere la calidá visual de númberos anteriores, les semeyes de José Javier González ya la maquetación de Marina Lobo fixéronlo posible con altor, creo.

-El viniente sedrá’l númberu 30 de la revista, ¿dalgún actu o xestu especial previstu pa celebralo?

-Habrá que facer por ello. Nos díes prósimos tendremos de xuntanos pa dir organizandolo too, tamién pa da-y vueltes al costu global de la revista.

-¿Cómo ye tar tantos años al cargu d’una revista como “Lliteratura”, sigue habiendo ganes de trabayar?

-Ganes, sí. ¡Hai tanto por facer! Pero, otra cosa ye que deba siguir o non como director. Pue ser un bon momentu na xunta próxima pa consideralo.

-¿Cómo evolucionó la lliteratura asturiana nestos venti años?

-Foi ganando en calidá. Creció’l númberu d’autores interesantes, en tolos xéneros, masque entovía falte la reconocencia proporcional al so méritu. Ente nós, falten llectores constantes ya formaos que col so criteriu asitien la valía de los llibros. La formación ya’l compromisu d’una sociedá llectora ye imprescindible pa que’l llabor mui estimable de bastantes escritores tenga futuru. Trátase d’una rellación dinámica, tamién d’una suma pues toos sabemos qu’hai xéneros más accesibles qu’otros, autores d’escritura más popular o menos, pero sedrá’l conxuntu lo que-y dea vida a la lliteratura n’asturianu. Una vida variada en gustos, solo alliniada pola calidá de los testos.

Dende’l puntu de vista del apreciu esterior, masque se dieren dellos pasos positivos na estima de la lliteratura, sobre too, de la poesía, creo que sólo autores como Xuan Bello vieren como los sos llibros s’espardíen ya valoraben fuera d’Asturies.

Ehí, notase muncho en falta l’apoyu institucional, les contaes ocasiones nes que la lliteratura asturiana ye motivu de cellebración fuera. Que nun seya oficial l’asturianu dexa ablucada a xente que sigui lo que s’escribe equí, al par fai que nun llegue apenes a los medios de comunicación.

-¿Cómo afecta la crisis a la lliteratura, y n’especial, a l’asturiana?

-Mal, claro. D’entrada, redúcense les ventes ya les ediciones. Pero, imaxino qu’en dalgún casu, de forma paradóxica, non tan mal, pues si les editoriales afinen la so política editorial, tán más atentes a la calidá de los testos, espublicen menos llibros pero más cuidaos, busquen caminos de promoción honesta, ya se complementen colos llibros dixitales cubriendo en papel l’espaciu de los llibros como oxetos preciosos… Entós tamién habría llogros mui a tener en cuenta. Tendríen de cambiase munches coses n’Asturies, too pa ver la manera de que los recortes nun torguen el desenrrollu lliterariu. Va ser mui difícil el camín de les revistes pero tamién del teatru, del cine, masque yá me tea alloñando… ¡Igual hai que volver a formes d’autofinanciación! Si queda xente con dalguna perra. Cualquier cosa contra les paraes en seco, pa la lliteratura asturiana siempres en precario, sedría fatal.

-Dende va munchos años trabaya nel campu cultural col Atenéu Obreru de Xixón, ¿qué proyectos tien en marcha nesi ámbitu?

-Amás de les contribuciones que como sociu pueda facer na distancia, les más de les vegaes, soi responsable personal de la coleición de poesía, Deva. Agora tábamos cola idea de sacar alantre una esposición de tol material que sobre Rosario de Acuña fui axuntando al cabu los años: llibros, cartafueyos, semeyes, prensa, etc. Pero tal como tan les coses, habrá que dexalo pa mayos venideros. Pues amás del trabayu personal desinteresáu son necesarios dellos sofitos municipales pa que se pueda organizar cola dignidá necesaria. ¡A ver si pal cabudañu siguiente!

-¿Cuándo podremos lleer el so próximu llibru?

-“La bona intención”, ta mui recién. Un llibru nun ye una mazana. Hai que cuidalu una temporadina, tar mui atentu a lo que dicen los llectores, presta-y muncha atención a la so primer vida. Ye tamién una manera d’agradecer el trabayu esmeráu de Marina Lobo preparando la edición. Llueu vendrán los aires nuevos, con pallabres que paguen la pena de pensar n’otru llibru o non. Eso, nunca voi sabelo.