Xixón ufre esti branu percorríos lliterarios pela villa

Dende la Oficina de Normalización Llingüística de Xixón ufierten no que queda de brenu unes rutes guiaes pelos llugares del llibru “Xixón de Novela” recién ádautáu a una aplicación pa móviles.

Conocer Xixón ye querela dicen na web del conceyu y proponen darréu “conocela al traviés del llibru Xixón de Novela, un percorríu que, gracies a l’adautación del llibru a una App móvil, va permitir conocer los llugares más representativos de Xixón” al tiempu que avera a los interesaos a la lliteratura asturiana.

Nesti primer casu va conocese la zona del centru de la villa onde van visitase llugares como la Estatua Pelayo, la Plaza’l Parchís o la Ciudadela de Celestino Solar ente otros munchos sitios, too ello de la mano d’autores como Berto Cobreros Gil, Vicente García Oliva, Milio Rodríguez Cueto, Roxelio Crespo González o Carme Martínez Pérez. Estes visites van ser los díes 25 de xunetu, 1, 8 y 29 d’agostu.

Per otru llau ta la visita a la zona de Cimavilla na que los testos de Xulio Berros, Roxelio Crespo, Sabel de Fausta, Ramón Ll. Bande, Pablo A. Marín y Xandru Martino van acompañanos a conocer sitios tan representativos como La Cuesta’l Cholo, El Palaciu de Revillagigedo o l’Eloxu del Horizonte. Van ser los díes 26 de xunetu, 2, 9 y 30 d’agostu.

Toles visites entamen a les 11.00 de la mañana y duren 1 hora aproximadamente y los interesaos puen apuntase nos teléfonos de la Oficina de Normalización Llingüística 985 18 14 28 o 985 18 13 89 o na Oficina de Turismu asitiada enfrente La Escalerona o nel Espigón Central de Fomento.