Xixón celebra’l Día Internacional del Idioma Maternu nel colexu San Lorenzo

El 21 de febreru celébrase’l Día Internacional del Idioma Maternu col oxetivu de promover el multillingüismu y la diversidá cultural. La Oficina de Normalización Llingüística de Xixón va celebralu colos escolinos y escolines del Colexu San Lorenzo, que van ser los y les protagonistes de les actividaes celebraes nel centru con cuentacuentos, un pasaporte musical multillingüísticu y un photocall onde prauticar delles de les 4.000 llingües del mundu.

Esti Día Internacional del Idioma Maternu celébresa gracies a Bangladesh. La fecha ye significativa nesi país: el 21 de febreru de 1952, morrieron tres persones nuna manifestación que pidía que la so llingua materna, el Bangla, fuera reconocida pol Estáu.

En 1999 la UNESCO declarólu’l Día Internacional de la Llingua Materna. Anque foi Bangladesh el país qu’unvió formalmente la propuesta a esta institución, la idea surdió en Canadá, d’una organización llamada Amantes de la Llingua Materna del Mundu formada por diez falantes d’inglés, kutchi, cantonés, alemán, filipinu, bengalí ya hindú. Ellos ficieron el pidimientu primeru pero la UNESCO informó-yos que namás podía venir de dalgún país miembru pa ser considerada. Entós, esta organización informó per teléfonu al Ministru d’Educación de Bangladeh qu’al empar avisó al Primer Ministru que lu autorizó a mandar la propuesta nel intre.

Va ser esti un bon día pa reflexonar sobre’l papel que cada quien pue cumplir nel respetu y espardimientu de les llingües, entamando pola nuestra, l’asturianu.