Xaviel Vilareyo reconoz rasgos llingüísticos asturianos na fala de Santander

“L’asturianu ye la llingua propia de les Asturies de Santiyana”, con esta afirmación abrió Vilareyo la so intervención na Xunta d’Escritores Asturianos 2010. Pal autor de Mieres l’asturianu de Santiyana “merez más atención per parte de toos”. Na mesma, describió hestóricamente al vieyu territoriu d’Asturias de Santiyana que xunto cola Llébana formen parte pa Vilareyo “del ámbitu del asturianu oriental”.

Xaviel Vilareyo pasó a desplicar los elementos o característiques fonétiques, morfolóxiques y sintáctiques del asturianu de Santiyana que básicamente son pal autor “los mesmos rasgos llingüísticos que definen al asturianu tal y como yá lo dexó escrito Ramón Menéndez Pidal na so monografía de 1906 sobre’l “dialecto leonés” y la unidá intrínseca de tolos territorios que formen la llingua asturiana”.

De los trés dialectos del asturianu, l’oriental, “al que pertenez tol territoriu d’Asturias de Santiyana” ye’l que sufrió una mayor castellanización, según comento Vilareyo “yá que se tien por seguro que na Edá Media, por exemplu los plurales femeninos -es (qu’anguañu se conserven nel valle de Pas y en Salamanca) n’epoques anteriores debieron ser más xenerales y non sólo reducíos al asturianu central como anguaño”.

Vilareyo denunció los pocos estudios llingüísticos que se tienen fecho sobre la fala de Tresmiera y los posibles restos del asturianu en Bizcaya. Tamién criticó’l desdén o desinterés esistente “nes Asturies d’Uviéu hacia la llingua d’Asturias de Santiyana y en xeneral hacia una tierra ximielga y un cultura tradicional cola que los asturianos d’Uviéu compartimos muncho más qu’un nome y una llingua”.