Portada Turismu Uviéu presenta de nuevu al Principáu’l so proyectu de Plan de Sostenibilidá Turística en Destín

Uviéu presenta de nuevu al Principáu’l so proyectu de Plan de Sostenibilidá Turística en Destín

by redacción asturnews

El Conceyu d’Uviéu presentó’l vienres fizo una selmana tola documentación necesaria para la valoración inicial del Principáu d’Asturies d’un nuevu proyectu de Plan de Sostenibilidá Turística en Destín na convocatoria de 2021.

El Programa de Planes de Sostenibilidá Turística en Destinos ye una propuesta de sofitu a la inversión n’actuaciones d’impulsu, adecuación y meyora de los destinos turísticos col fin d’aumentar y ameyorar la so sostenibilidá. Ye un programa promovido pola Secretaría d’Estáu de Turismu, aprobáu pola Conferencia Sectorial de Turismu’l 13 de xunetu de 2020 al tar incluyíu nel Real Decreto-llei 25/2020, de 3 de xunetu, de midíes urxentes para sofitar la reactivación económica y l’empléu.

Dichos planes van desenvolvese conxuntamente coles Comunidaes Autónomes y Entidaes Locales y pretenden llevar a cabo actuaciones empuestes a:

– Desenvolvimientu y meyora de los destinos turísticos basaos na sostenibilidá.
– Sofitar la reconversión de los destinos turísticos pioneros.
– Impulsar el desenvolvimientu de los destinos turísticos allugaos n’árees rurales y d’interior.
– Reforzar a les entidaes locales xestores de los destinos.

Na convocatoria de 2020 Uviéu presentó un proyectu de 4 millones d’euros, siendo aprobaos namá n’Asturies los presentaos per Somiedu por 1,87 millones d’euros y el d’Onís por 880.000 euros.

El proyectu presentáu agora pol Conceyu d’Uviéu pretende poner en valor los grandes y esclusivos recursos turísticos con que cunta la capital del Principáu: El Prerrománicu (cinco monumentos reconocíos como Patrimoniu de la Humanidá), l’Orixe del Camín de Santiago y el cascu históricu.

La propuesta coincide dafechu cola estratexa defendida pol Presidente del Principáu, Adrián Barbón y pola Conseyería de Cultura, Política Llingüística y Turismu qu’establez ente les sos prioridaes “el Camín de Santiago y la programación del Xacobéu 2021 como una de les exes vertebradores de l’acción de la Conseyería”.

Por esi motivu, el Conceyal de Turismu d’Uviéu considera que va tener el máximu sofitu técnicu y económicu pa la so aprobación, destacando que los recursos nos que se centra’l plan tán n’Uviéu pero son d’Asturies y el so desenvolvimientu va repercutir na meyora del turismu na nuesa rexón.

El plan propuestu va desenvolvese en trés añalidaes que van ser financiaes a partes iguales pol Estáu, el Principáu y el Conceyu. L’importe total del proyectu de la presente convocatoria ye de 2,1 millones d’euros.

Tamién te podria gustar