Uviéu algama un de los Premios Inspira Ciudaes Amigues de la Infancia 2019 de UNICEF

Uviéu foi la ciudá española galardonada colos Premios Inspira Ciudaes Amigues de la Infancia 2019 de UNICEF. El fallu diose a conocer esta fin de selmana, na ciudá alemana de Colonia.

El Conceyu d’Uviéu participaba na categoría “Non discriminación y Equidad” que tien como oxetivu que “cada neñu o neña sía valoráu, respetáu y tratáu de manera xusta dientro de les sos ciudaes y comunidaes y poles autoridaes locales”.  El proyectu presentáu pela nuesa ciudá, “Itinerarios locales pa la participación de la Infancia y Adolescencia”, escuerre favorecer la participación de la Infancia y l’adolescencia como ferramienta pa lluchar contra la discriminación. Nesti proyectu “intentemos reflexar cómo trabayamos dende’l Plan Municipal d’Infancia y adolescencia pa faer realidá’l derechu a la participación de los neños y les neñes d’Uviéu:  140 neños, neñes y adolescentes d’edaes entendíes ente los 8 y los 16 años, componen los 16 grupos de participación que se distribúin nos 7 distritos del conceyu. Dacuando axúntense pa cavilgar sobre les sos necesidaes y les de les sos redolaes, proponer soluciones y apurrir les sos perspectives… Una traza diferencial d’esti proyectu ye que los grupos de participación componer d’un 60% de neñes que’l so lideralgu ta presente y patente nos barrios. Amás  de la perspectiva de xéneru, nos grupos tán representaos tolos colectivos, cobrando especial relevancia los colectivos más vulnerables, en riesgu o con dalguna discapacidá”, informaron fontes municipales en conociendo’l fallu del premiu.

El proyectu d’Uviéu complementase con un video  “Ruta local de la participación de la infancia y l’adolescencia”. A esta convocatoria presentárense un total de 227 iniciatives de decenes de municipalidaes del mundu. En siendo revisaos técnicamente por un panel internacional d’espertos, en base a los criterios de: Resultancies esperaes, creatividá ya innovación, replicabilidad y conformidá ya integración colos principios rectores de la iniciativa Ciudaes Amigues de la Infancia, fueron escoyíes 20 acciones finalistes ente les que s’atopaba la del Conceyu d’Uviéu, que finalmente resultó ganadora.

L’oxetivu d’estos premios ye promover el compromisu de los gobiernos locales por que cumplan cola Convención sobro los Derechos del Neñu.