Un xuez de EE UU declara’l cantar ‘Happy Birthday’ llibre de derechos

Un xuez federal de Los Ánxeles (EE UU) dictaminó esti miércoles que’l cantar Happy Birthday to You, la lletra y melodía más usada en tol mundu pa deseyar feliz cumpleaños, nun ta suxeta a derechos d’autor.

La sentencia de George H. King pon fin a décades de disputes sobre’l copyright de la célebre tema y al monopoliu de la editora musical Warner/Chappell, una división de Warner Music, que mientres años aseguró tener los derechos del cantar.

King indicó nel so veredictu que’l documentu en posesión de Warner/Chappell namái garantiza los derechos sobre dalgunos alcuerdos de la música, y non sobre’l conxuntu del cantar.

La conocida melodía foi tomada del cantar de finales del sieglu XIX Good Morning to All, de les hermanes Mildred J. y Patty Smith Hill, y, acordies con King, dalgunos de los sos alcuerdos rexistráronse en 1935 per parte de Summy Co. Años más tarde, el xigante discográficu mercó esi documentu y dende entós Warner recaldó unos dos millones de dólares (unos 1,8 millones d’euros) al añu por conceutu de propiedá intelectual pol usu del famosu cantar.

Ente les evidencies presentaes polos demandantes atópase un llibru de cantares publicáu en 1927 que contien la lletra del Happy Birthday ensin nengún avisu sobre derechos d’autor y que ye anterior al rexistru de propiedá intelectual de la melodía, realizáu 1935.

Hasta agora, cualesquier qu’emplegara Happy Birthday to You tenía de pagar a Warner polos derechos. Tres la decisión de güei, el cantar pasa a ser considerada de propiedá pública y llibre de derechos, polo que puede usase pa cualquier fin ensin tener que pagar por ello.