Trabe entrega’l so premiu de Narraciones 2005 n’Uviéu a Xandru Fernández

Esti martes 25 d’abril, a les 19,00 hores, na Llibrería Asturiana d’Ediciones Trabe n’Uviéu (Padre Buenaventura de Paredes, 4, barriu de Pumarín)presentarase la novela ganadora y entregarase’l premiu “NARRACIONES TRABE 2005” que foi a parar a “La banda sonora del paraísu” de Xandru Fernández.

La banda sonora del paraisu ye una novela construida sobre la biografía d’un personaxe llamáu Fidel, nacíu en 1970, a través de la narración en primera persona que fai un amigu qu’intenta reconstruir y entender la so trayectoria vital. Fidel ye fíu d’un mineru y una hippie, y, como si esi nacimientu determinara la so personalidá, la so vida hasta’l presente recorre un camín irregular pero coherente: delincuente xuvenil aficionáu al rock y al sadomasoquismu, ermitañu cultivador de plantes alucinóxenes, guerrilleru na revuelta de Chiapas, cazador y ermitañu pelos bosques d’Asturies, inspirador d’una comuna anarquista… La editorial considera que “Xandru fai un mui guapu retratu de la sociedá asturiana de los últimos años nesta novela moderna, que tien muncho de novela negra, y na que nun falten nin les referencies a la sicodelia o la crítica xeneracional al primer asturianismu, nin los retratos de les sociedaes indíxenes mexicanes o de Bosnia na posguerra”. La narración trata non sólo de la personalidá de Fidel o d’otros protagonistes como Beatriz y Mori, sinón tamién de les dificultaes de reconstruir eses vides dientro d’una identidá colectiva. Xandru Fernández

Xandru Fernández naz en Turón en 1970. Profesor de Filosofía nel institutu de Lluanco, vien desarrollando’l so llabor creativu n’asturianu dende 1990 que lu convierte nun de los escritores más interesantes y versátiles d’esta lliteratura, igual como narrador que como poeta o como autor de les lletres de les canciones de Dixebra, amás de columnista en dellos medios de comunicación. Tien nel so haber los principales premios asturianos: dos veces ganador del «Xosefa de Xovellanos» de novela, premiu de narrativa de l’Academia, premiu «Xuan María Acebal» de poesía, nel 2005 recibió’l premiu de la crítica que concede l’Asociación de Escritores Asturianos (AEA) pola so novela Les ruines.

Xandru Fernández publicaba en 1990 el so primer llibru de poemes, Primer bestiariu, al que siguen Breviariu de la diáspora (1993), Lletra muerto (1998, premiu «Elvira Castañón» de poesía) y Servidume (premiu de poesía «Xuan María Acebal» del año 2000). Nestos años Xandru Fernández foi publicando una amplia obra narrativa: les noveles El silenciu en fuga (1990, premiu de «Novela Curtia» de l’Academia), Tráficu de cuerpos (1990), El club de los inocentes (1994, premiu «Xosefa de Xovellanos» de novela), El suañu de los páxaros de sable (premiu «Xosefa de Xovellanos» de novela, 1999) y Los homes de bronce (2001) y los llibros de cuentos Del llaberintu al trenta (1995) y Les cuentes de l’alma (2000). Nel 2005 publicó la novela yá citada Les ruines y El nuesu mar de los sargazos.

Tien publicaes varies traducciones, del gallegu y del alemán principalmente: Land Rover de Suso de Toro, Memories d’un nenu llabriegu de Xosé Neira Vilas, La tresformación de Franz Kafka, Mario y el magu de Thomas Mann, y l’ensayu Nietzsche contra Wagner de Friedriche Nietzsche.

En 2002 publicó’l llibru País cerrado, nel que recueye y traduz al castellanu los sos cuentos.

Sigún una nota asoleyada esti día pola editorial “el xuráu destacó l’alta participación llograda nesta convocatoria, la bona calidá de la mayor parte de les obres presentaes y la so variedá formal y temática, que pon de manifiestu l’escelente momentu qu’altraviesa la narrativa asturiana”.

El xuráu del Premiu de Narraciones Trabe formáronlu esti añu, como vocales, Esther Prieto (escritora, ganadora del «Xosefa de Xovellanos» de novela), José Luis Fernández (escritor y periodista), Luis Casteleiro (filólogu de la Conseyería de Cultura) y Consuelo Vega (narradora, ganadora del «María Josefa Canellada» de narrativa), actuando como presidente Xulio Viejo (narrador y profesor d’asturianu na Universidá d’Uviéu) y como secretariu del xuráu, con voz pero ensin votu, Antón García.

El premiu consiste na publicación de la obra ganadora dientro de la colección «Incla interior» d’Ediciones Trabe, 3.000 euros en conceptu de derechos d’autor y una escultura orixinal de María Jesús Rodríguez fecha pal premiu. N’archivu adxuntu mándase una fotografía de la escultura, un prisma cuadrangular (11 x 16 x 3 cm, n’aluminiu, grabáu, pintáu n’azul y barnizáu) que se titula So la panera-8.

Fueron 11 (once) los orixinales qu’opten al Premiu de Narraciones Trabe 2005. Presentáronse cinco noveles y seis llibros de cuentos. Los orixinales llegaron de sitios bien dispares: ocho d’Asturies, dos del restu d’España y unu del continente americanu. Destaca l’alta participación y el nivel de calidá de les obres presentaes, que fairá riñíu’l fallu del xuráu.

Ediciones Trabe convocó nuna primer etapa, dende 1992 a 1995, cuatro ediciones d’esti premiu con éxitu de participación, de crítica y de públicu. Esti premiu ye’l segundu concursu de narrativa asturiana meyor dotáu (depués del de novela «Xosefa de Xovellanos» que convoca la Conseyería de Cultura, Comunicación Social y Turismu) y el primeru que convoca una empresa editorial privada.

Ediciones Trabe quier convocar esti premiu con carácter bienal (cada dos años), alternándolu cola convocatoria d’otru premiu pa lliteratura infantil y xuvenil, del que se dará cuenta a lo llargo d’esti añu 2006.