Toño Martínez: “Los asturianos exiliaos fueron internaos en campos de concentración cuando aportaron a Francia”

Toño Martínez ye hestoriador y profesor de ciencias sociales bien mozu y ta acabante espublizar el so primer llibru, anque yá asoleyare dellos testos d’ensayu na revista N’AST. Cartafueyos d’ensayu y n’Erada. Revista d’Historia Contemporanea, amás de collaborar n’otres publicaciones como la revista La Sidra o Infoasturies, con testos de calter periodísticu. La so primer obra ye “Exiliu asturianu (1937-1939)”, una investigación rigurosa y novedosa sobre la primer dómina del exiliu asturianu, dende la so formación cola salida d’Asturies hasta la conformación del denomáu “exiliu permanente”, qu’edita Espublizastur dientro de la solección nueva: “Investigación”.

-¿Cómo decide adentrase nel estudiu del esiliu asturianu tres la Guerra Civil?

-Taba finando la Llicenciatura y decidiere que, de momentu, nun diba siguir cola vida académica y diba tirar pela vía educativa. La investigación creo que ye dalgo polo que cualquier hestoriador fai la carrera y nun quería finar ensin una especie de bautismu como Llicenciáu n’Hestoria.

Enteráu de la esistencia de delles ayudes, del Patronatu Municipal de Cultura de Siero, pal caltenimientu de la cultura asturiana y pa la investigación, y sabiendo de la esperiencia anterior de dalgunos compañeros con elles decidime a solicitales pa una investigación de dalgún un tema que me prestare. Equí ye onde entra Rafa Rodríguez Valdés, que l’añu anterior tuviere una ayuda pa facer una investigación sobre la llingua y el movimientu obreru, falé abondo con él sobre’l tema a escoyer y buscando dalgo que fuere nuevo.

Estudiar l’exiliu asturianu paecióme una idea perbona, atractiva y motivadora. Dempués, el mesmu Rafa y Milio León, que tamién tuviere una ayuda d’esti calter en Siero, resolviéronme munches duldes técniques sobre la ellaboración del proyectu. Presentélu y pudi entamar a facer un trabayu base, mercar bibliografía y costeame dalgunos gastos d’archivu, fotocopies…

-El llibru trabaya cola bibliografía yá esistente, pero amás va a les fontes primaries, ¿en qué archivos o fontes pudo consultar?

-La mayor parte del trabayu d’archivu desendolquélu col material microfilmao que tenemos n’Asturies de la Sección Guerra Civil del Archivu Históricu Nacional, anque tamién consulte dalgunos archivos municipales catalanes, hai trabayu d’hemoteca, archivos na rede… Foron interesantes tamién pulicaciones autobiográfiques o de publicaciones de testimonios yá publicaos. No que se refier a fontes prestóme muncho que Corsino Fernández, anguañu Cole Kivlin, me mandare’l so testimoniu de neñu de la guerra escritu, dende los EE.XX., de la qu’entamaba cola investigación.

El trabayu ta dixebráu en fases arreyaes a espacios xeografícos. La salida d’Asturies, en Catalunya y la zona Lleal, nel estáu francés, les reemigraciones y l’afitamientu del exiliu permanete. Asina cuanto más nos alloñamos d’Asturies más dificil y costoso ye acceder a fontes d’archivu. El pesu de les fontes primaries na investigación tienen más pesu nes primeres fases y les fontes bibliográfiques van teniendo más protagonismu na parte final , nos analís del exiliu en llatinoamérica y n’Europa, por exemplu. Aparte de bibliografía del exiliu republicanu en xeneral, d’obres venceyaes a la guerra civil n’Asturies o biografíes o autobiografíes, miré trabayos del exiliu gallegu, del catalán, de la politica de refuxaos en Catalunya….

-La obra diz dar una bona actualización de cifres, cuantificación la magntitú y dando datos nuevos abondo, ¿pue adelantanos dalgún?

-Pues nun se, la verdá que muncho ye novedoso. De primeres, facemos un estudiu bastante fonderu de lo que foi la evacuación d’Asturies. Munches veces xeneralizase con un “cola ocupación d’Asturies miles de persones fuxen…”. Lo cierto ye que hai un procesu controláu d’evacuación, embaxo unes normes y de determinaes persones, dende xunu de 1937, dempués nos momentos finales si hai una fuxida, más descontrolada. Nesta fase, analizamos esta evacuación y cuantificamos lo meyor posible colos datos esistentes pa calcular un mínimu d’unes 63.000 persones que salieron d’Asturies en 1937.

En Cataluña hai 121.000 ‘asturianos y santanderinos’ refuxaos según cifres oficiales y facemos una actualización de cifres por zones, hasta onde pudimos llegar, averémonos al volume d’asturianos en bastantes ayuntamientos catalanes y anque quedó muncho ensin saber hai un entamu de lo que podría ser un estudiu sobre la distribución espacial de los refuxaos y refuxaes d’Asturies en Cataluña según la distribución xeográfica de la época (9 vegueríes, coles sos respectives comarques que conformen ajuntaments). Finamos con una aproximación a la magnitu final, dempues de reemigraciones y repatriaciones, per continentes, averámonos lo más posible al volume en cada destín, Francia y México sedríen los mayoritarios y pudimos apuntar un mínimu d’unes 10.000 persones que s’exiliarien permanentemente, cuasi la metada taríen en Francia y taría en Llatinoamérica , con México, como destín preferente.

Hai munches cifres na obra…, de toes formes averámonos a elles col enfotu de dibuxar el volume y de forma aproximativa, intentemos afitar unos mínimos. Camentamos necesario aproximamos al volume de persones lo más posible pero pa contextualizar el restu de la investigación que se centra no que-yos pasa a eses persones. Nunca nun hai qu’escaecer que detrás d’estos númberos hai persones.

Tamién me presta muncho l’estudiu del procesu final del Conseyu Soberanu d’Asturies y Lleón en Cataluña. Si bien pierde les sos funciones polítiques va caltener una actividá bastante tiempu basada na atención a la población asturiana.

-¿Por qué ye l’exiliu asturianu d’esa dómina un tema poco tratáu hasta agora?

-Tampoco ye que nun se trate, por exemplu del exiliu lliterariu asturianu hebo un congresu y hai asoleyada una obra. Hai referencies a ello en bibliografía, trátense coses en biografíes, n’obres xenerales, n’artículos,… pero nun se tratare d’una forma esplícita y xeneral con una obra monografica qu’esplicare esti procesu con más fondura y como tal. Sí hai obres y congresos del exiliu gallegu, del vascu, del catalán, del denomáu republicanu en xeneral… pero nun había nada del “Exiliu Asturianu”.

Sicasí, el llibru termina col afitamientu del exiliu permanente por eso ye 1937-1939, anque foi inevitable entrar en delles cuestiones d’años posteriores. Quedaría una segunda parte que diría hasta’l so final.

-¿En qué circunstancies se produz la salida de miles d’asturianos neses dos estapes que comentaba, una más controlada y otra ensin un control claru?

-Diferénciense y tratámoles por separtao nel trabayu. La primera ye una evacuación de población civil, neños, muyeres que nun prestaren serviciu pa la guerra, homes fuera d’eda militar, discapacitaos físicos.. ye una salida nunes circustancies difíciles por tar en guerra pero menos que la salida final de los últimos díes dende los puertos entá llibres en tou tipu d’embarcaciones y mayormente de población militar. La población civil foi evacuada en cargueros qu’arribaben a Xixón con mercancíes , la entrada y salida de barcos va ser cada vuelta más dificil col bloquéu naval franquista.

Dempués de la salida d’Asturies la mayoría van parar a Cataluña y la denomada “zona lleal” pa dempués col avance franquista y la ocuapción de Cataluña gran parte pasaran al Estáu francés, ellí va haber un movimientu grande de repatriaciones y reemigraciones.

-¿Hasta qué puntu siguen conformando una comunidá diferencia del restu de los exiliaos del estáu español los asturianos nel exiliu?

-En Cataluña créase una estructura oficial asturiana, col Centru Asturianu de Cataluña a la cabeza y les distintes organizaciones refuxaes van volver a reorganizase y participen nél. Sedrá mui potente l’Agrupación de Socialistas Asturianos y l’Agrupación Socialista de Refugiados Asturianos. El Centro Asturiano tendrá una cooperativa con sucursales en distintos puntos de Cataluña, hai un serviciu d’inspección de refuxaos… en definitiva en Cataluña confórmase una estructura asturiana qu’atiende a la población asturiana.

-¿Qué cantidá d’asturianos llegaron a Cataluña?

-En Cataluña había más d’un millón de refuxaos provinientes de diferentes partes del estáu, los ‘asturianos y santanderinos’ supondríen un 10%, y en mayor o menor medida les comunidaes de los respectivos llugares axuntense, lloxicamente. Digamos que en Cataluña la comunidá asturiana siguió xunida na midida de lo posible y caltendría les diferenciaciones normales que pue haber.

-¿Y cuando pasen a Francia y más tarde a América, cuála ye la situación?

-En Francia, la población n’edá militar va ser internada en campos de concetración y el restu en refuxos esperdigaos pel estáu, piérdese la organización que se creo en Cataluña dende finales de 1937 a febreru de 1939. Sabemos que en los campos de concentración los asturianos van facer por axuntase, por grupos d’amistaes, dalgo lóxico y común a tolos qu’ellí s’alcontraron. L’asturianu y la tonada sintiéronse detrás de les alambraes nes playes del mediterraneu como rellató Celso Amieva nel so llibru autobiográficu “Asturianos en el destierro. Francia”.

Yá n’América l’exiliu asturianu entronca cola emigración tradicional y coles organizaciones d’asturianos que pudiere haber igual qu’otros exiliaos d’otros orixenes con comunidaes de población importante ellí.

-¿Por qué tipu de persones taba formáu l’exiliu asturianu: intelectuales, obreros, políticos, etc.?

-Per fases, nun primer momentu, dempués de la salida d’Asturies y el momentu de mayor magnitú la mayoría son población civil (evacuación controlada) muyeres y neños sobre too. Los combatientes integraránse nos exércitos. En Francia caltendráse esta mayoría. Dempués hai una diferenciación socio-profesional ente l’exiliu que queda en Francia y el que marcha a América, en parte pola política inmigratoria de les repúbliques americanes y en parte por otres circustancies dende económiques a personales como la esperanza del regresu cercanu. En Francia habrá más porcentaxe d’exiliaos de menor cualificación profesional y América tendrá más porcentaxe d’intelectuales y profesiones lliberales.

A diferencia de la emigración económica l’exiliu va ser de calter familiar. Si tradicionalmente’l perfil de la emigración ye un mozu xoven solu, nel exiliu ye de calter familiar o la pareya colos fíos, una vilva con fíoa… Creo qu’en xeneral taba representada tola sociedá o polo menos tola sociedá antifacista, dende un pescador de Candas afiliáu a la CNT hasta un intelectual o medicu d’Izquierda Republicana, pasando por miles de variables.

Ye cierto que los que s’exilien permanetemente son los más comprometíos cola causa. Si con políticos nos referimos a los cabezaleros d’organizaciones, ministros, etc… bona parte van poder exiliase y pola so condición algamarán en dalgunes fases ciertos privilexos como llibrar de los campos de concentración en Francia, alcontrar pasaxe p’America, etc.. Pero cuantitativamente nun sedríen munchos. Si como políticos nos referimos a militantes d’organizaciones daquella el nivel d’afiliación yeren cásique xeneral y la propiu exiliu ye de calter políticu.

-¿Reconocióse’l papel del exiliu asturianu o fueron hasta agora otres “lleendes urbanes” más pal Gobiernu d’Asturies?

-Ye un tema más bien políticu…, home, camiento que si hai reconocimientos públicos a dalgunes persones de relevancia que tuveron exiliaos y cuestiones sobre l’aportación de dellos escritores, artistes, científicos asturianos nes sos materies ellí onde taben exiliaos.

Lo qu’igual nun hai ye un reconocimientu a toles persones que tuvieron qu’exiliar como unes víctimes más de la guerra, non solo los muertos o represaliaos fueron víctimes, tamién aquellos que tuvieron qu’exiliase.

-¿Qué cuestiones camienta importante siguir trabayando alredor d’esta cuestión?

-Bono, hai muncho pero queda muncho más. Un oxetivu que teníemos yera poner unes bases xenerales d’esta primer etapa del exiliu. De cada fase podría facese un trabayu monográficu qu’afondare más, de cuestiones más concretes tamién se pue siguir trabayando bastante. Prestaríen trabayos sobre l’exiliu asturianu en Francia, l’exiliu asturianu en México, etc.

El trabayu nun ye definitivu y tolo que seya siguir completando la información ye importante. Aparte de la importancia d’afondar en tolo que se refier a esta primer fase, quiciabes, pa min, una cuestión importante a siguir trabayando sedría la siguiente fase del exiliu yá que completaría dafechu l’estudiu del exiliu asturianu. Espero que la llectura del llibru por hestoriadores valga pa que s’anime daquién más a investigar sobre l’exiliu asturianu.