Tante Blanco: “Con esti discu quixi camudar el “chip”, non facer lo mesmo de siempres”

Esti músicu de Tolivia (Llaviana) diose a conocer pola so participación nel grupu Los Berrones dende 1989, colos qu’algamó ésito perimportantes como’l célebre “Nun yes tu”. Como miembru d’esta banda participó na grabación d’ocho discos de lo que se denomó “agro-rock”. Agora y dempués de colar del grupu en 2005, torna como “Stroza”. Nome artísticu y discu nuevu: “Música de garrafón”, pero sones cola retranca que siempres caracterizó a Tante Blanco.

-Esti ye un discu que lleva preparando muncho tiempu, ¿pensólo abondo pa tornar al mundu de la música?

-Non, en realidá ya cuando taba en Los Berrones tenía’l proyectu na morra y dalguna vegada, medio en broma, solté-yos que tenía gana facer daqué solu, porque tenía munchu material musical compuesto. Sobre too, porque muncho d’ello nun entraba na propia filosofía del grupu. Creo qu’enxamás lo tomaren en serio. Agora la broma ta fecha realidá.

-Na páxina d’Stroza comenta que salió de Los Berrones “pela puerta d’atrás y por imperativu llegal, más o menos”, ¿qué ye lo qu’asocedió pa que colara del grupu?

-A esta entruga voi responder como fizo l’ex-entrenaor del Real Madrid, Bernard Schuster, cuando-y entrugaron si nel frustráu fichaxe de Villa, dalguién del vestuariu punxo torgues: respuendo con un catarru y un carraspiellu gordu. Dalgún día falaré d’ello, alto y claro. Si te das cuenta y agüeyes na so páxina web, dalguién se tomó la molestia de borrar dafechu cualesquier resquiciu míu, hasta de quitar les semeyes onde yo sacaba’l focicu. Pero nada, nun-y doi importancia nenguna.

-¿Qué temes son los que mueven a Stroza pa crear cantares nuevos?

– Creo que son asuntos bastante cotidianos pero con un tratamientu en crudu, a lo torpe. Caxigalines poques, que pa eso ya tán los Bisbales, les Amaies Montero, y tolos lolailos del país. Lo mío quiero que seya otra cosa. Por exemplu, la xuventú que sal de murga una fin de selmana a practicar l’”equí te pillo, equí te mato…” y yo cuéntolo asina de descarnao, pero creo que bastante real.

-Esti discu nuevu recueye cantares n’asturianu y tamién en castellán, una novedá nes sos producciones musicales, ¿a qué se debe esti cambiu?

-Yera cuestión de camudar totalmente’l “chip” musical. Pa siguir faciendo lo mesmo, como que nun-y vía gracia. Por eso te dicía enantes qu’había proyectos nuevos que nun me cuadraben muncho cola filosofía del anterior grupu. Renovase o morrer, y esto postrero de pifiala, ¡cá!.

-¿Con qué collaboradores cuntó pa la grabación del discu?

-Les bateríes fueron de Chema Fombona, el baxu grabólu Alejandro Blanco Espina, Carlos Blanco fízome los teclaos, la guitarra acústica Alvaro Barcena…Y tola parte técnica del estudiu de grabación corrió de la mano de Dany Sevillano d’Estudios Eclipse, n’Uviéu. Lo demás tocóme trabayalo como un cabrón. Creo que m’arrodié d’una serie de profesionales de la música asturiana de muncha categoría, tanto humana como musical. Tener bonos amigos ye perimportante.

-Y con esti títulu “Música de garrafón”, ¿nun se molestarán estos bonos músicos que participen na grabación?

– Non, porque la música de garrafón ye precisamente lo que ta fuera del discu. Amás, llevándolos a comer daqué curioso, arréglase too meyor (rises).

-El pasáu 28 de febreru tuvo tocando en Llangréu, ¿ónde más vamos poder sentir a Stroza en directu?

-Tengo delles cosuques que tán entamando a salir. Yá les pondré na web, a midida que se vaigan confirmando. Home, vamos dir a poco y a poco. Ten en cuenta qu’esto ye un poco volver a ñacer, musicalmente falando. Voi entamar dende abaxo, per sitios pequeños y llegar hasta onde pueda o hasta onde me dexen.

– Dende va tiempu dedícase tamién a escribir y echar monólogos pal pograma de la TPA, Al Aldu: La Risión, ¿afáyase meyor nesta faceta de cómicu que na de músicu?

– Creo qu´escibir y componer música son dos facetes que van como’l chorizu y la morciella nel compangu les fabes: mui xuntes. Nun tienes más que ver qu’hai otros como Xune, de Dixebra, que tamién escribe. ¿Si m’afayo más como escritor que como músicu?, creo que non. En cualquier casu, ta visto que lo mío ye soltar barbaridaes (rises).

-Amás, nel añu 1998 estrenóse como escritor, y d’ésitu, espublizando “Hestories piquiñines”, un llibru mui aplaudíu, ¿vamos volver a velu peles llibreríes?

-Eso ya ye cosa de la Editorial. Toi na cuenta de que ya s’escosó la segunda edición y de que nun queden exemplares peles llibreríes. Ellos son los que deberíen puxar pol productu, anque agora mesmo furrulen malos aires pa les editoriales. Bono, paez que pa too. Si nun hai novedá quiero espublizar otru llibru en breve col títulu de “Filosofía de caleya”. Toi n’ello.

Nel Myspace d’Stroza pueden sentise dellos cantares del discu