Cine

El II Festival de cine asturianu, que tien a l’actriz Mary Paz Pondal como premiu honoríficu al reconocimientu de tola so carrera na gran pantalla y nos escenarios de teatru, va presentase nel Club de Prensa de La Nueva España a les siete la tarde de la mano del so director, Xavi Vilareyo, que va tar acompañáu polos productores Llucía Herrera, Jorge Rivero, Iraida Lombardía, Roberto Bernabeu, Alberto Arce y Rodrigo Lueje, que van presentar les sos obres.

Les obres que cuenten con mayor númberu de nominaciones son “Nada personal” y “Lo que el ojo no ve”, con cinco nominaciones a los premios, siguida por “Entaína”, “La muria d’Adriano”, “Por estar contigo” y “Tierra de guerrilleros” con cuatro nominaciones. Con tres nominaciones ta la obra titulada “…Y del hijo”, con dos “Gritar” y “Corpus trovata”, y con una nominación “El pozu”, “Una historia cualquiera” y “Hestoria d’un vezu”.

Los trabayos nominaos al Premiu al Meyor Documental son: “Lluvina”, “Bon Voyeur”, “Nenyure”, “Sáhara”, “Mitoloxía del llechi” y “Nablús la ciudad fantasma”.

El conceyal de Mocedá del Ayuntamientu d’Aviles, Luis Ramón Fernández Huerga, presentó’l pasáu vienres día 31 de marzu, el V Certame de Cortos Villa d’Aviles que se va cellebrar ente los díes 5 y 8 d’abril na Casa Cultura de la ciudá. Huerga repasó xunto al director del festival, Jorge Iván Arguiz, les numberoses proyecciones que van centrar esta nueva edición del certame, asina como los profesionales que van tar presentes na ciudá, amás del circuitu d’actividaes paraleles que completen un programa que per primer vez estrena la obra ganadora del II Concursu de Proyectos de Cortometraxes -RSU: “Recuerdos sórdidos urbanos”, de Jose Manuel Carrasco Capilla.

El festival arranca cola proyección de dalgunos de los meyores cortos d’animación fechos nel nuestru país, qu’abarca dende vieyes ayalgues hasta trabayos que tán acabantes de salir de la mesa de montaxe. Otres de les secciones del festival son la yá clásica de “Documentales”, la “Nueche de Cultu” de Jesús Palacios, la “Videosesión Lloca” conducida por Borja Crespo, “Un vistazu atrás”, sección na que se percuerren los cortos premiaos n’ediciones anteriores y la llamada “Los Otros”, onde se presenten dalgunos trabayos valoraos pol so especial interes pero que nun llograron llegar a la final. Too ello xunto coles proyecciones de los trabayos finalistes al “Meyor Cortu Asturianu”.

Programa del Festival

Esti día ta acabante de ser estrenada una de les pelis d’animación alternatives más nomaes del sieglu XXI: “The Meatrix II, Revolting!”, la segunda parte de la famosa parodia de la película The Matrix que trata de facer una denuncia sobro la esplotación de les granxes de vacuno y de la que se da anuncia en dellos blogs hispanos.

La primer versión d’esta parodia que ta protagonizada por Leo, Chickity y Moopheus (en llugar de Neo, Trinity y Morpheo), foi vista por 10 millones de persones en tol mundu, lo que pue dar una idega de la so emportancia nel universu alternativu de la rede. Na web hai tamién un tour virtual onde se puen ver con detalle toles referencies que denuncien en The Meatrix.

Web oficial de “The Meatrix II, Revolting!”

L’Asociación de Realizadores d’Asturies (ARDA) presentó esti xueves 23 n’Uviéu los dos nuevos volúmenes de la colección de DVD entamada apocayá con una esbilla de los meyores cortos en llingua asturiana. Agora ye la ocasión de les obres feches por directores asturianos en castellano y inclúi títulos como “Nenyure” de Jorge Rivero, “El beso de la tierra” de Lucinda Torre o “Lo que el ojo no ve” de José Braña.

L’oxetivu de l’asociación qu’axunta a los realizadores asturianos ye difundir la obra que tan desarrollando los creadores de les nueves xeneraciones y que non siempre tienen la difusión que merecen. Los dos nuevos volúmenes publicaos recueyen cortometraxes de los directores Lucinda Torre, Alberto Pardo, Nacho Carballo, Gonzalo Tapia Suárez, Alfonso S. Suárez, Elena Tamés, Carlos Navarro, Tomás Fernández, José Antonio R. Maniega, Iñaki Ibisate, Sergio Sánchez, Jorge Rivero, Amanda Castro, Roxana Popelka, Teresa Marcos, Javier Martín, José Braña, Fernández Prada y Antonio de Benito.

El realizador Javier Maqua presenta esti llunes 20 n’Uviéu la edición en DVD del so documental “Apuntarse a un bombardeo”. La productora uvieína Blaster Televisión y l’Axencia de Cooperación del Principáu promueven esta versión doméstica d’una película protagonizada polos brigadistes asturianos que s’opunxeron en Bagdag a la invasión d’Irak.

El documental, producíu pol actor Guillermo Toledo y Geno Cuesta, narra el realcuentru de los brigadistes na casa qu’una d’elles, Teresa Tuñón, tien nel conceyu de Quirós: ende remembren los díes pasaos en Bagdag embaxo los bombardeos del exércitu americanu y británicu al través de la llectura de los sos diarios personales. La edición en DVD recueye dellos de los testos escritos por dos de los activistes: Teresa y Mino, asina como otros del propiu director Javier Maqua y del responsable de Cooperación del Principáu, Rafa Palacios.

El DVD “Apuntarse a un bombardeo” preséntase esti llunes 20 a les 18.30 nun actu na Biblioteca del Fontán n’Uviéu, con presencia del autor del documental y de los sos principales protagonistes.

La Obra Social y Cultural de Caxastur escomienza esti martes 14 un miniciclu de cine dedicáu al melodrama. El programa, coordináu pol director del Festival de Cine de Xixón, José Luis Cienfuegos, presentóse esti llunes n’Uviéu y inclúi títulos como “Esplendor en la hierba” d’Elia Kazan o “Dos en la carretera” de Stanley Donen.

Los primeros títulos en proyectase son el citáu de Donen: “Dos en la carretera”, que podrá vese esta tarde a les 20.15 nel centru cultural de Caxastur n’Uviéu y “Siempre hay un mañana” de Douglas Sirk, proyectáu nel Monte de Piedá de Xixón a la mesma hora.

El ciclu va desarrollase nos centros culturales de la Obra Social de Caxastur de Xixón, Uviéu, Mieres y Sama hasta’l prósimu 29 de marzu cola proyección de “Quiero vivir” de Robert Wise, “Tu y yo” de Leo MacCarey y “Esplendor en la hierba” d’Elia Kazan. La programación entera y los horarios pueden consultase nel portal de la Obra Social y Cultural de Caxastur , na sección de ciclos .

Gonzalo Suárez presenta esti martes 28 en Madrid un llibru y dos DVD nos que recupera el so llargometraxe ‘Aoom’ (1969) y axúntalu a ‘El genio tranquilo’ (2005), la so última película rodada en Llanes. El director asturianu quier celebrar les sos casi cuatro décades d’aventura cinematográfica con esti proyectu editorial nel que tamién s’apurren testimonios de colaboradores y amigos del cineasta, asina como el so testimoniu personal en forma d’entrevista.

El filme ‘Aoom’ presentóse nel festival de San Sebastián de 1969 y fue recibíu con abucheos, consideráu una tomadura de pelo y nunca llegó estrenase nes sales comerciales. Agora Suárez recupéralu xunto a “El genio tranquilo”, el so últimu títulu como realizador. En xunto los dos filmes y el procesu de xestación d’entrambos, el camín que va d’un al otru, resúmense nestos dos DVD y el volume publicaos pol director asturianu, una de les mirades más personales y tresgresores del panorama cinematográficu del estáu.

El Festival Internacional de Cine de Xixón en colaboración col Conseyu de la Mocedá d’esa ciudá va unviar a tres xóvenes como xuraos pal certame que’l festival italianu de Giffoni entama en Hollywood (Estaos Uníos)del 24 al 30 d’abril. Los candidatos a la esbilla tienen de tener ente 13 y 17 años, conocimientu del inglés y haber asistío a dalguna proyección del últimu festival.

El certame xixonés caltién col de Giffoni un intercambiu de xuraos xuveniles dende va pa cuatro años. Nesta ocasión los rapazos o rapaces seleccionaos van tener la oportunidá d’asistir a l’amuesa cinematográfica que’l festival italianu organiza añalmente en Hollywood. El Festival de Xixón y el Conseyu de Mocedá cuerren colos gastos de los xuraos, ún de trece a catorce años y dos de quince a diecisiete.

Los interesaos en participar na esbilla pueden solicitar la ficha d’inscripción na oficina del Festival de Cine al través del corréu electrónico coordina@gijonfilmfestival.com , o llamando al 985182940. El plazu pa entregar les solicitúes fina’l 24 de febreru. El día 3 de marzu va publicase la llista de los seleccionaos.

Robert A. Miller llega esti xueves 16 a Uviéu pa inaugurar el ciclu cinematográficu col que la Fundación Príncipe d’Asturies va rendir homenax a so pá, Arthur Miller, Premiu de les Lletres 2002. El sábadu va proyectase nel Teatru Filarmónica “Muerte de un viajante” cola presencia del fíu de Miller y l’actor José Sacristán.

El fíu del dramaturgu estaounidense va participar na inauguración del ciclu homenaxe a Arthur Miller esti sábadu 18 a les 19,30 hores.

Pa asistir a la inauguración del ciclu, la Fundación tien puesto a disposición del públicu entraes gratuites (máximu dos por persona) que se pueden retirar dende ayer miércoles n’horariu de 12,00 a 13,30 y de 16,00 a 20,00 hores, nes taquielles del Teatru Campoamor.

La Fundación Príncipe d’Asturies entama un ciclu de proyecciones cinematográfiques dedicada al dramaturgu norteamericanu Arthur Miller n’homenaxe al escritor que recibió en 2002 el Premiu de les Lletres.

Robert A. Miller, fíu del dramaturgu fallecíu en 2005, va tar presente na estrena de les proyecciones el prósimu 18 de febreru nel Teatru Filarmónica d’Uviéu pa presentar el ciclu y la primer película, ‘Muerte d’un viaxante (Volker Schlöndorff, 1985), adaptación de la obra teatral homónima d’Arthur Miller. Va acompañar a Robert A. Miller (productor, amás, de la película ‘Focus’ que se proyecta nesti ciclu), l’actor español José Sacristán, que protagonizó les representaciones teatrales d’obres de Miller como ‘Cristales rotos’ y la mesma ‘Muerte de un viajante’.

L’homenaxe cinematográficu a Arthur Miller va consisitir na proyección de siete películes inspiraes na obra del dramaturgu estadounidense, en versión orixinal, en distintos llugares d’Asturies, como Uviéu, Xixón, Candás, Mieres y La Felguera.