Cine

Xixón va acoyer el próximu martes 26 de setiembre nel Teatru Xovellanos, dientro del so Festival Internacional de Cine, el preestrenu de la película ‘Vete de mí’, dirixida por Victor García León y protagonizada por Juan Diego y Juan Diego Botto. ‘Vete de mí’ ye la primera de les tres películes incluyíes nel proyectu ‘Primeras Tomas’, una iniciativa del productor Juan Gona que cuenta col apoyu del Gobiernu del Principáu d’Asturies.

‘Vete de mí’ y un baille de mázcares familiar, d’encuentros y desencuentros ente dos egoístes conxenitos: un mentirosu compulsivu (Juan Diego Botto) que llogra esquiciar l’estáu mental de los sos familiares, y un actor de repartu veníu a menos que descrubre de sópetu que la so vida ye una mentira (Juan Diego). Una comedia satírica y amarga sobre cómo llegar a los cincuenta, perder el trabayu, atopar un fíu y querer tolo contrario. El so director, Victor García León, diz d’ella que ye ‘una traxedia griega en Carabanchel, lo que Rabael Azcona llamaría traxedia grotesca’.

Les entraes pa esta proyección, que va empezar a les ocho y media la tarde, van ser de baldre. Los interesaos van poder retirales nes taquilles del Teatru Xovellanos el próximu llunes y tamien el mates con un tope de dos entraes por persona.

El próximu 7 d’agostu nel Teatru Prendes de Candás fadrase la I Muestra Audiovisual “Fecho n’Asturies” la muestra ta abierta a tolos autores asturianos que querian presentar les sos obres, mesmo en DVD como en VCD. La rececpción de los materiales acaba’l día 2 d’agostu.
La muestra “Fecho n’Asturies” ta entamada por Algamar Producciones en collaboración col conceyu de Carreño y el Centru Cultural Teatru Prendes.

Xixón acoyerá’l Primer Festival Internacional de Cine Gai y Lésbicu d’Asturies – CinegailesAST, que se celebrará nesta ciudá del 26 al 29 de xunetu del 2006, nel Salón d’Actos del Centru de Cultura Antigu Institutu, na cai Xovellanos 21, a partir de les 5 la tarde y destináu a promocionar n’Asturies el cine de temática homosexual, gai, lésbica o transexual de tol mundu. El Festival CinegailesAST recibió yá abondos trabayos procedentes d’América, Asia, Europa. L’asistencia a les proyecciones nel Salón d’Actos del Antigu Institutu de Xixón sedrán dafechu gratuítes y preténdese que’l festival seya un certame participativu y abiertu a tou tipu de públicos ensin nenguna clase d’esclusiones y por ello dedicáu a tol mundu interesáu nel cine de ficción y documental más actual que se ta faciendo alrodiu estes temátiques. Pa ponese en contactu cola organización y poder collaborar col Festival CinegailesAST nun hai más que dirixise a la seña electrónica festivalcineastur@wanadoo.es

Trabayada a lo llargo d’un añu, ‘La memoria recobrada’ fai un viaxe per Asturies y Lleón de la mano del cineasta Manuel Gutierrez Aragón nel documental tituláu ‘Los del monte’, nel que se toca la realidá de los maquis de la fastera del norte. El programa completu, inclúi tamien un percorríu per Galicia col escritor Manuel Rivas en ‘Galicia, la tempestad del 36′, Canarias al travies de la música de Pedro Guerra n’ ‘Huesos’, ‘Málaga, la carretera de la muerta’ col historiador Juan Madrid, y la ‘Extremadura amarga’ con Luis Pastor.

Nel capítulu dedicáu a Asturies, baxo la mano del cineasta Manuel Gutierrez Aragón, que yá nel añu 1978 dirixere ‘El corazón del bosque’, el director cántabru investiga la lleenda de Juan Fernández Ayala, ‘Juanín’, ente otros fugaos.

La historia de Juanín permite facer un repasu peles fases de la guerrilla asturiana y lleonesa, pa lo que Gutierrez Aragón cuntó col testimoniu directu de dalgunos fugaos supervivientes a la dictadura asina como de dellos enllaces en monte. El documental inclúi tamien la versión del xeneral Cereceda, de la Guardia Civil, que nos años de la posguerra fue teniente en Potes.

L’escritor Julio Llamazares, autor de “Lluna de Llobos”, tamien collabora nesti episodiu p’amosar nos montes de Lleon, cerca de Riaño, los refuxos y cueves que queden intactos y a los qu’acceden les cámares de televisión per primer vez.

‘La memoria recobrada’ va emitise los domingos a partir de les once la nueche na 2 de Televisión Española.

El ciclu de cine europeu enmarcáu na campaña del 20 aniversariu de la integración d’España na Unión Europea termina güei cola proyección de la película “Struggle” de la directora asturiaca Ruth Mader. Eurosferas, organizáu pola Dirección Xeneral de Rellaciones Esteriores y Asuntos Europeos y la Cámara de Comerciu d’Uvieu ufiertó una selección de películes europees d’actualidá a lo llargo del mes de xunu de 2006.

La clausura cuerre a cargu del Director Xeneral de Rellaciones Esteriores y Asuntos Europeos, Darío Díaz Álvarez, del Director Xeneral de la Cámara de Comerciu d’Uvieu, Javier Cuesta Menendez, y del Director de la Obra Social y Cultural de Caxastur, Jose Vega. L’actu va tener llugar güei a les 20 hores nel Salón d’Actos del Centru Cultural de Caxastur situáu nel númberu 4 de la cai San Francisco d’Uvieu.

La película escoyida pa ciarrar esti ciclu ye “Struggle”, ópera prima de la realizadora austriaca Ruth Mader. El film cunta la difícil vida d’una muyer, dedicada a pañar freses y procedente d’Europa del Este, que llega a Austria pa llabrase un futuru meyor pa si y pa la so fía, y u home, un vienes axente inmobiliariu. La película foi rodada nes fábriques austriaques, amosando sobre too trabayadores reales, poniendo la cámara pa que captare los detalles, la naturaleza y el ritmu d’una cadena de producción ensin perder una respetuosa distancia de les persones que son grabaes.

Xixón va acoyer el primer festival internacional de cine gai y lesbicu d’Asturies, llamáu CinegailesAST, que se celebrará ente los díes 26 al 29 de xunetu nel Auditoriu del Centru de Cultura Antigu Institutu. El festival, destináu a promocionar n’Asturies el cine de temática homosexual, gai, lesbica o transexual de tol mundu, ta organizáu pol Festival de Cine Asturianu en collaboración cola asociación xixonesa El Garrapiellu.

El Festival CinegailesAST premiará trabayos en tres modalidaes diferentes: la de Meyor Película, Meyor Curtiu, Meyor Documental, asina como los premios al Meyor Actor y a la Meyor Actriz, escoyíos pol públicu asistente a les sesiones oficiales competitives.

Sesiones de proyección de documentales y llargometraxes completarán les xornaes hasta’l sábadu 29 de xunetu cuando se fairá la Gala de Pieslle cola proclamación de ganadores.

Nel certame podrán participar trabayos preseleccionaos pol Festival CinegailesAST, en cualesquier formatu, y con cualesquier duración o añu de realización. El plazu presentación de trabayos termina’l 28 de xunu del 2006.

Jose Braña y Chus Neira son los autores d’un documental que se presenta esta tarde, a partir de les ocho y cuartu, nel Teatru Filarmónica d’Uvieu baxo’l títulu de ‘Los años electricos’. Producíu pola productora de programes del Principáu pa la Televisión Autonómica, va estrenase dientro del ciclu Intersecciones, onde habrá música en directu de la mano d’Igor Paskual y Marcos Montoto, Natalia Quintanal y Carlos Redondo, Arma X, Lego my Ego y Cactus Jack.

El documental recueye dende ensayos del grupu Astur, pioneru na renovación del fock n’Asturies, a escenes memorbles de Tino Casal, pasando pel rock de Los Stukas y Jorge Martínez, vocalista de Los Ilegales, hasta les nueves tendencies nel hip hop asturianu.

Dos hores de grabación qu’axunten entrevistes colos llíderes de les bandes más conocíes d’Asturies, como ye’l casu de la charra ente Nacho Vegas y Igor Paskual nun tren nel qu’entrambos músicos analicen los diferentes puntos de vista de la música nes ciudaes d’Uvieu y Xixón. Xunto a ellos, entrevistes a personaxes que lleven tola vida alredol del panorama musical asturiana.

El xueves 1 de xunu escomenzará nel centru cultural Caxastur d’Uvieu’l ciclu de cine europeu Eurosferas organizáu pola Cámara de Comerciu d’Uvieu, la Dirección Xeneral d’Asuntos Esteriores y Caxastur. Esta iniciativa, que proyectará obres de directores como Emir Kusturica, Costa-Gavras y Hans Weingartner, ta enmarcada dientro de la campaña “Asturies n’Europa”, que remembra los 20 años del ingresu d’España y Asturies na Unión Europea.

L’amuesa, que va arrancar cola proyección de la comedia “Las muñecas Rusas” (Les poupees russes) del director frances Cedric Klapisch, va ser inaugurada pol Conseyeru de Xusticia, Seguridá Pública y Rellaciones Esteriores, Francisco Javier García Valledor, y del Presidente de la Cámara de Comerciu d’Uvieu, Severino García Vigón.

Con un total de 8 obres actuales de diferentes directores europeos, el ciclu quier amosa-y al ciudadanu una visión del marcu cultural y social europeu y fomentar la reflexón sobre lo que supunxo p’Asturies y pal conxuntu del país la entrada al marcu europeu xusto cuando se cumplen 20 años d’esta incorporación.

Nel curtiu repasu que quier facer el ciclu Eurosferas sobre l’actualidá del cine d’autor europeu tendrán sitiu autores tan estremaos como’l finlandes Aki Kurismaki del que se proyectará la so comedia “Un hombre sin pasado”, el polemicu director serbiu Emir Kusturica con “La vida es un Milagro”, el cineasta naturalista frances Constantin Costa-Gavras col so trabayu “Arcadia”, l’italianu Vincenzo Marra cola gallardonada “Viento de Tierra” o’l austríacu Hans Weingartner, col so segundu llargometraxe “Los Edukadores”.

L’aportación española al ciclu Eurosferas llegá con “El Cielo gira”, un documental de la directora soriana Mercedes Álvarez sobre la vida n’Aldealseñor, un pequeñu pueblu de Soria nel que depues de mil años d’hestoria interrumpida sólo queden 14 habitantes. La cinta llogró’l premiu a la meyor película y el de la Fipresci nel Festival de Cine Independiente de Buenos Aires y los de meyor película nel Festival de Rótterdam y el Festival de París Cinema du Reel.

El 27 de xunu a les 20 hores va pesllase’l ciclu cola proyección del film “Struggle”, ópera prima de l’austriaca Ruth Mader, un drama sobre la situación llaboral n’Europa.

La obra “Por estar contigo” de la realizadora asturiana Teresa Marcos foi la ganadora del II Festival de Cine Asturianu que tuvo llugar ayeri nun actu nel teatru Filarmónica, d’Uvieu, nel que se-y rindió homenaxe Mary Paz Pondal. Javier Vidal, conceyal de Rellaciones Institucionales y Hermanamientos del Ayuntamientu d’Uvieu y másimu representante n’Asturies de la SGAE, foi l’encargáu d’entrega-y a la veterana actriz uvieína una reproducción de la escultura “Pensadora”.

Na gala que tuvo llugar ayeri a les seis y media la tarde, nel teatru Filarmónica d’Uvieu, el curtiometraxe de Teresa Marcos, “Por estar contigo”, foi’l ganador del premiu al Meyor Curtiu Asturianu n’otra llingua, que foi entregáu por Marisa Vallejo, amás de llograr el premiu a la Meyor dirección. La distinción consistía nún modernu fruteru de cristal, n’homenaxe a “El robo de la fruta”, el primer documental asturianu de ficción que l’añu pasáu cumplía cien años.

Per otra parte, l’apartáu de Meyor Documental premió la obra “Lluvina”, mentes que’l Meyor Guíón foi pa “Entaína”. Ánxel Nava fixo un monólogu sobre los problemes de facer cine n’Asturies, pa depues dar pasu a la categoría de Meyor Actor que correspondió a Carlos Chamarro. La galardonada como Meyor Actriz foi Montse Mostaza.

Finalmente, “Hestoria d’un vezu” llogró’l premiu al Meyor Curtiumetraxe n’Asturianu.

El profesional del cine y la televisión Luis San Narciso va recibir el premiu que concede la Hostelería del Valle de Cuna y Cenera a aquelles persones que pola so trayectoria exemplar, dedicación o imaxe pública, ayudaren a promocionar el valle, la Comarca’l Caudal o Asturies. La cena d’entrega d’esti reconocimientu a San Narciso y la presentación de les VIII Xornaes Gastronómiques de Primavera ta prevista pal prósimu 24 d’abril.

El xuráu del premiu, compuestu por Isabel Sánchez (conceyala de Turismu), Ismael González Arias (director de la Casa Cultura de Mieres), Fermín Rodríguez (director del C-Codet), Celso Fernández (cadena COPE), Carlos Cuesta (TVE Asturies) y Laudelino Vázquez (Club de Prensa La Nueva España), dicidió da-y por unanimidá’l Trasgu d’Oru 2006 a Luis San Narciso (Mieres, 1958) pola so impresionante trayectoria nel mundu de la escena y como director de casting en series de televisión y películes, tando agora d’actualidá polos sos últimos trabayos, “Volver” de Pedro Almodóvar y “El Capitán Alatriste” d’Agustín Díaz Llanes.