Cine

El plazu pa presentar proyectos pa participar nes principales secciones d’esta 49 edición del Festival Internacional de Cine de Xixón va tar abiertu hasta’l día 16 de setiembre, sacante pa les películes de la sección Enfants Terribles, el so plazu remata’l día 24 d’agostu.

Coles mesmes, caltiense abierta la convocatoria del Premiu Nuevos Realizadores del Principáu d’Asturies 2011, dotáu con 8.000 euros. El plazu d’entrega pa ésti estiéndese hasta’l 14 d’ochobre.

Otres convocatories promovidas pol Festival Internacional de Cine de Xixón, como ye’l casu del Día d’Asturies -patrocináu por RTPA- o Proyectu Curtiu Canal +, van ser espublizaes na páxina web del festival nes próximes selmanes.

Bases completes y reglamentu

El Conceyu Bimenes celebra estos díes la XV Fiesta de la Oficialidá de la Llingua Asturiana, cola que fai alcordanza de la hestórica fecha del 5 de xunetu de 1997, na que’l Plenu del Conceyu aprobó la oficialidá de la llingua asturiana nel territoriu yerbatu. Esposiciones, lliteratura, cine, teatru, monologuismu, concursos lliterarios y actuaciones musicales, amás de los yá tradicionales pregón y misa, too ello n’asturianu, formen parte del programa d’esti añu, con actividades que se desendolcarán hasta’l viniente 2 de xunetu.

Güei, na Casa la Cultura de Santuyano, a les 19.30 hores va poder vese la proyección de ‘Los viaxes de Gulliver’, una de les primeres películes doblaes al asturianu. El trabayu de doblaxe d’esta cinta foi obra de Gonzali Producciones. El responsable d’esta empresa va desplicar a los presentes el procesu pa doblar una película.

Gonzali Producciones asoleya, rotuláu n’asturianu, la primer película sobre’l monstruu de Frankenstein. Una versión de Mary Shelley fecha pola la Edison Film Company en xineru de 1910. Esti monstruu de celuloide tien una característica llamativa; pelo contrario que los postreros, nun ta fechu a base de cachos de cadabres. Ñaz nun “calderu” tres de la cocina d’una fórmula alquímica.

La productora Gonzali Producciones va entamar el doblaxe d’otru nuevu llargumetraxe al asturianu. Trátase del perconocíu western McLintock, rodáu nel añu 1963 nos Estaos Xuníos y dirixíu pol cineasta Andrew V. McLaglen. La película ta protagonizada polos actores John Wayne y Maureen O’hara. El guión basóse parcialmente na obra de William Shakespeare The Taming o the Shrew.

Pa esti trabayu la productora anunció qu’organizará un grupu de profesionales integráu por 30 persones, ente técnicos y dobladores. El doblaxe y acabáu técnicu de la película fadráse nel estudiu Fase Cuatro de Xixón, onde yá se ficieren les versiones asturianes de los clásicos “Los viaxes de Gulliver” y “El tercer home”.

Nel doblaxe participen, según espliquen dende Gonzali Producciones, 20 actores, coordinaos pol actor y director de dobladores Antón Caamaño.

La productora cunta estrenar la versión de McLintock na edición de L’Arribada d’esti añu.

Argumentu:

George Washington McLintock (John Wayne), respetáu y queríu ciudadanu d’un pueblu d’Arizona, ye un ganaderu terrateniente que s’alluga ancláu nunos caducos principios afitaos na rudeza y el machismu. Ye pola mor d’ello, y poles sospeches d’infidelidá, que la so muyer Katherine (Maureen O’Hara) decidiera abandonalu va años. Por embargu, el regresu a casa de la fía en común, cola nueva de que ta prometica, fadrá que la ex pareya se vea otra vuelta pa decidir el so futuru. Dende esti momentu, sucederánse les engarradielles ente ellos, lo que provocará situaciones cómiques, agravaes pola contratación d’una moza y guapa cocinera na facienda. Amás, l’actual gobernador enseñará una malsana envidia hacia la posición de reconocimientu del pueblu pa con McLintock, y tratará de contino de desprestixalu.

Hasta’l 15 de xunu ta abiertu’l plazu pa la recepción de curtiumetraxes, dientro de la sétima edición del festival nacional de curtiumetraxes de “Ribedeva en curtiu”. El festival inclúi distintos premios, ente los que destaca’l meyor trabayu nacional del añu o’l meyor curtiumetraxe pa directores asturianos mozos. El plazu de presentación remata’l día 15 de xunu.

Bases completes

Per novenu añu consecutivu, el Conseyu de Mocedá de Xixón y el Festival Internacional de Cine de Xixón collaboren col Festival de Cine de Giffoni (Italia), nel intercambiu de xuraos mozos d’ente 13 y 17 años d’edá. El plazu pa presentar solicitúes remata’l vienres 3 de xunu.

El Festival de Cine de Giffoni, que se va celebrar del 11 al 21 de xunetu de 2011, ufierta la posibilidá d’unviar cuatro nuevos pa formar parte del so xuráu de les secciones “Generator +13” y “Generator +16”. Los mozos escoyíos van viaxar a Giffoni, onde van tener accesu gratuitu a toles sesiones del Festival y van participar en toles actividaes que se celebren mientres la selmana (charres, alcuentros con directores y actores, seminarios, etc.). El mesmu Festival pon a disposición de los mozos xuraos l’agospiamientu, la mantención y el seguru, quedando’l viaxe hasta les ciudaes de Nápoles o Roma de cuenta de los participantes.

Información ya inscripción na web del festival www.ficxixon.com

Asturnews ufre una galería de semeyes de los actos del Festival de Cine Asturianu, celebráu esta selmana en Madrid. Los curtiumetraxes Días perdidos, de Senén Fernández y Puntu, d’Eva Gallego resultaron ser les obres premiaes nes categoríes de Meyor Curtiumetraxe en castiellán y n’asturianu respectivamente.

La entrega de premios tuvo llugar el llunes 9 de mayu nel Atenéu de Madrid, llugar onde nació’l Festival de Cine Asturianu un 27 d’abril del 2005 pa celebrar el Centenariu del cine asturianu. Como meyor película premióse a L’horror de la dama del llagu, del avilesín Diego Váquez. Como meyores actores recibieron los premios Jesús Pardo, por Días perdidos y Almudena gallego por Anorexia. La productora Hi-Video recibió’l Premiu al Meyor Documental pol trabayu tituláu “Concejo de Tineo naturaleza a la carta” qu’entregó Gil Parrondo.

El guionista y cineasta asturianu Florentino Soria (Xixón, 1917) entregó los premios al meyor curtiumetraxe en castiellanu y a la meyor película mentantu Gil Parrondo entregó los premios al meyor documental y curtiu n’asturianu. Los premios a los actores entrególos la directora y guionista Rocío García. Los xuraos nesta edición fueron los realizadores Teresa Marcos, Iñkli Ibisate y Ángeles Muñiz, premiaos y participantes n’anteriores ediciones del Festival. El Festival nesta edición rindió un homenaxe a los guionistes asturianos en concreto al gran Carlos Blanco (Xixón, 1917), onde se faló de les dificultaes y situación de los guionistes na industria del cine, repasando la trayectoria vital y cinematográfica de dos grandes guionistes asturianos como’l xixonés Florentino Soria, que cuntó y repasó tola so trayectoria nel mundu del cine yá qu’amás de guionista y profesor de la escuela oficial de Cine foi presidente de la Filmoteca Española y de Raimundo García, director amás de dos películes, que llueu d’emponderar mui positivamente’l llibru de Xaviel Vilareyo presentáu faló de la relación a vegaes difícil de los guionistes y los directores según la so propia esperiencia.

El Festival presentó en Madrid el llibru “Historia del cine asturianu” de Xaviel Vilareyo que tuvo mui bona acoyida. A la Gala d’Entrega de Premios asistieron los nominaos y otres personalidaes del mundu del cine y la televisión como los yá citaos Florentino Soria, Gil Parrondo, Raimundo García, María Casal, Lola López, Javier Longas, Rocío García, Miguel Losada y Alfonso Suárez.

Galería de semeyes del Festival

Intersecciones CaxAstur 2011 entmó la so andadura’l martes 10 de mayu y va prollongase hasta’l miércoles 15 de xunu, incluyendo trece conciertos, siete llargometraxes y dos meses redondes.

Programa completu d’actividaes

El Festival de Cine Asturianu entregará los premios de la so sétima edición nuna Gala que tendrá llugar nel Atenéu de Madrid el próximu llunes 9 de mayu onde se rendirá un homenaxe al guionista Carlos Blanco como Premiu d’Honor d’esta 7a edición del Festival.

Los trabayos finalistes nominaos a los premios na categoría de curtiumetraxes nesta edición són los siguientes: Vidas, de Nacho Fernández y Pablo Bermejo; Idealizando, de Moisés Tuñón; Duets el precio de la fama, de Tito Montero; Puntu, d’Eva Gallego; Cruces, de Moisés Tuñón; Tacones, de Benjamín Villaverde; Anorexia, de Kiko y Javier Prada; El detective imaginario, de Juan José Bors y Días Perdidos, de Senén Fernández.

Na categoría de meyor actor los finalistes nominaos son: David Ballesteros por Idealizando, David Rionda por Duets el precio de la fama; Javier Longas por Días perdidos y Jesús Pardo por Días perdidos.

Les nominaes al Premiu a la Meyor Actriz són: Lara Fernández-Noriega por Cruces; Almudena Gallego por Anorexia y Susana Carnero por El detective imaginario.

Carlos Blanco, Premiu d’Honor del 7u Festival de Cine Asturianu

El guionista asturianu Carlos Blanco recibirá’l Premiu d’Honor del Cine Asturianu que concede’l Festival de Cine Asturianu na so sétima edición. L’homenaxe a Carlos Blanco tendrá llugar el próximu 9 de mayu del 2011 nel Atenéu de Madrid, onde s’entregarán los Premios d’esta edición del Festival.Carlos Blanco Hernández ye unu de los guionistes asturianos más importantes. Nació en Xixón el 13 de marzu de 1917. Marchó pa Madrid en 1934 nun pudiendo terminar nengún estudiu por causa de la Guerra Civil yá que lu mobilizaron en 1936 pal exércitu republicanu y por ello sufrió depués xuiciu sumarísimu poles tropes franquistes debío a la so condición de teniente d’artillería y por ello tuvo presu depués de la guerra. Escribió pa les revistes Primer plano y Cámara. El so primer contactu cola escritura pal cine foi a mediaos de 1940 cuando ganó una mención honorífica de los premios del sindicatu vertival d’espectáculos pol guión tituláu Don Beltrán de la Cueva que nunca llegó a rodase. El so primer guion pal cine foi Cuando llegue la noche, película de 1946 sobre la obra teatral homónima de Joaquín Calvo Sotelo. Otru guion suyu foi el premiáu de La princesa de los Ursinos (1947), al que siguió en 1948 el guión de Les agües baxen negres, de temática asturiana y basáu na novela L’aldea perdida de Palacio Valdés. En 1955 ruédase en Xixón otru de los sos guiones: Los pexes coloraos, dirixida por José Antonio Nieves Conde. Esti mesmu añu Carlos Blanco recibe un contratu de la 20th Century Fox pa escribir un guion, Zaino, que tampoco llegó a rodase. Pa la R.K.O escribió Un gánster nel colexu y Melva, versión llibre d’un cuentu de Máximu Gorki, razón pola que vivió nos Estaos Xuníos un añu.

La sétima edición del Festival de Cine Asturianu fadráse en Madrid onde s’entregarán un añu más los Premios del Festival nes sos diferentes categoríes. L’eventu tendrá llugar el 9 de mayu nel Atenéu de Madrid, allugáu na cai del Prado 21, escenariu onde ñació la primer edición del Festival de Cine Asturianu nel añu 2005 col apoyu de la Sección de Cine d’esta vieya institución. Nos actos, d’asistencia llibre y de baldre, amás de la entrega de Premios del xuráu d’esta edición tendrá lugar la proyección de los curtios ganadores y homenaxes a destacaes personalidaes del cine asturianu.

Tamién va presentase, per primer vegada en Madrid, el llibru “Historia del Cine Asturianu”, de Xaviel Vilareyo, un documentáu repás a tola hestoria del sétimu arte asturianu dende la mesma llegada del cine a Asturies hasta l’actualidá.

Los xuraos d’esta edición del Festival són los realizadores Teresa Marcos, Iñaki Ibisate y Ángeles Muñiz, participantes y premiaos n’anteriores ediciones del Festival. El Festival promociona trabayos documentales y de ficción de realizadores asturianos o bien rodaos n’Asturies o en llingua asturiana col fin de dar a conocer el cine asturianu más actual asina como reconocer a les figures más destacaes de la hestoria del cine asturianu. Gil Parrondo, Mary Paz Pondal, Xuan Gona, Gonzalo Suárez, Lilián de Celis y Juan José Otegui yá pasaron pel Festival de Cine Asturianu recibiendo’l so Premiu d’Honor del Cine Asturianu n’anteriores ediciones.