Suburbia espubliza llibros de Pablo X. Suárez ya Ignaciu Llope

La editorial Suburbia tien nes llibreríes dos novedaes. D’una banda, Pablo X. Suárez espubliza “El sistema débeme una chocolatina”, el so tercer poemariu (el segundu n’asturianu, dempués d’Asturiana Beat). Afonda con él nel particular estilu desenfadáu (y n’ocasiones tamién enfadáu) que gasta tamién en narrativa (véase la colección de cuentos Yoni y yo, tamién espublizada por Suburbia Ediciones). Munchos de los poemes recoyíos nel llibru yá son habituales nos recitales o timbes poétiques organizaes pel autor estos últimos dos años.

Una amuesa d’inxeniu, iconoclastia y fuerza espresiva que nun-y va cayer embaxo al llector atentu. “El sistema débeme una chocolatina” ye’l númberu 5 de la colección de poesía “males tierres”.

D’otra banda, na colección d’ensayu “páxina en blanco” la editorial presenta’l primer volume de “De les coses del mundu”, del poeta y ensayista Ignaciu Llope. Ye esti un llibru con hestoria, una y bones l’autor yá usó d’esi títulu hai más de dos décades pa recoyer los sos artículos sobre cuestiones polítiques y antropolóxiques. Ignaciu Llope siempre pensó que “De les coses del mundu” yera un proyectu en marcha, y nesta edición recueye non sólo aquellos artículos inaugurales, sinón tamién tolos que, dende la década de 1980 hasta l’actualidá, foi asoleyando en mui diversos medios.

La producción ensayística del autor ye tan abondosa que “De les coses del mundu” va publicase en dos volúmenes. El primeru, que ye’l qu’agora ve la lluz, recueye tolos escritos sobre celtismu y música folk, amás de los ensayos y artículos espublizaos sobre’l paisaxe y la hestoria del conceyu de Cuideiru, llugar de nacencia de Llope. El segundu volume va incluir los ensayos sobre política y lliteratura.