SUATEA denuncia la negación de derechos fundamentales per parte del PSOE y el Conseyu Consultivu

El Sindicatu Unitariu y Autónomu de los Trabayadores de la Educación d’Asturies (SUATEA) acaba de facer públicu un comunicáu col que se suma al abondante númberu de colectivos y persones que nos últimos díes manifestaron el so rechazu al informe ellaboráu pol Conseyu Consultivu sobre la reforma del Estatutu d’Asturies, al qu’acusen de ‘negar dererechos fundamentales de los asturianos’, incumpliendo ‘la llei del asturianu , el Plan de Normalización y la propia Constitución española’ cuando nieguen la oficialidá de la llingua asturiana.

Dende SUATEA y STES-i reivindiquen la necesidá de que’l prósimu Estatutu p’Asturies recueya la oficialidá de la llingua asturiana que ‘PSOE y el Conseyu Consultivu nieguen’. ‘El famosu Conseyu Consultivu ta formáu por miembros que siempre tuvieron a la escontra de la oficialidá, por eso ve pilancos pa reconocer la llingua, faciendo papel moyao de la Consitución Española y faciendo valoraciones personales totalmente subxetives sobre esti tema ignorando toles encuestes feches hasta la fecha’, aseguren.

Nun comunicáu fechu públicu esta mañana, SUATEA acusó al gobiernu de ‘nun-y temblar la mano en solicitar que seyan cooficiales les llingües del estáu español (gallego, castellano, vasco y catalán, excluyendo al asturianu) na Unión Europea y ser incapaces de reconocer un derechu fundamental n’Asturies incumpliendo la Constitución nel so artículu 3, onde diz que toles demás llingües del Estáu sedrán oficiales nes sos respectives comunidaes’.