Silvia Cosío: “Ye necesario apostar polos escritores mozos”

En 2007, va pa cuatro años, ñacía Suburbia Ediciones, una nueva editorial qu’apaecía “col espíritu de vindicar la lliteratura en llingua asturiana”. Dempués de les fiestes navidiegues, ún de los meyor momentos pa la venta de llibros, falamos cola so directora Silvia Cosío Vaquero, pa que mos cuente la so visión de la situación del mercáu editorial, l’actividá al frente de Suburbia y les novedaes que tán a piques d’asoleyar.

-Nun país como Asturies, nel que hai una importante rede d’editoriales, ¿nun yera una llocura montar una nueva?

-Podría parecelo, de toes maneres cuando di’l pasu de montar la editorial tenía claro que nun diba faceme rica con ella pero foi una decisión mui meditada nesi momentu, siempre ye posible facese un güecu nel mercáu editorial asturianu si se tienen en cuenta les sos característiques particulares y se respeta penriba de too la calidá lliteraria.

-Dende l’entamu Suburbia vien apostando polos escritores mozos, ¿ye esta una apuesta arriesgada?

-Non necesariamente, ye énte too una apuesta necesaria, la lliteratura n’asturianu necesita que s’apoye a los autores mozos que a pesar de tenelo too en contra tomen la decisión d’escribir nuna llingua minoritaria y maltratada.

-Nuna empresa del sector cultural, como ye una editorial, ¿albidra qu’han buscase otros oxetivos, amás de la obvia rentabilidá, necesaria en cualesquier proyectu empresarial?

-Por supuesto, editar n’asturianu ye una toma de postura hacia la llingua y el modelu de sociedá que queremos nesti país. Les empreses culturales nun pueden nin deben midise dende prespectives esclusives de mercáu porque cumplen con una función social.

-La so vocación de proyectu cultural pue vese na so web, que nun ye namás un espaciu de propaganda, sinón un llugar pa la creación…

-Creo firmemente nel compromisu que tenemos que tener cola creación y la cultura, nesti casu con tolo que tea rellacionao cola llingua, y da-yos voz a los creadores y escritores. Ensin cultura nun podemos crecer, al marxe de la “cultura” oficial que traten de vendenos dende arriba, esisten cientos de voces que piensen y ven el mundu d’otra manera. La creación d’espacios llibres d’expresión ye dalgo indispensable y la única manera d’entamar a conocenos y poder cambiar.

-A lo llargo d’estos cuatro años espublizaron delles antoloxíes, poesía, narrativa y ensayu, ¿de qué ta más arguyosa como editora?

-Siéntome arguyosa de caún de los llibros que tenemos nel catálogu, suena tópico pero ye cierto, caún d’ellos foi un retu y una aventura diferente.

-Na so páxina anuncien novedaes de Miguel Rojo, un autor consagráu y d’Iván Cuevas, un autor mozu qu’espubliza’l so primer poemariu, ¿ye compatible y hasta recomendable, conciliar estes dos llinies?

-Ya imprescindible. Per un llau mimar y cuidar a autores consagraos y pel otru alentar y dar a conocer a les nueves voces. La lliteratura ye un bucle ensin fin que s’alimenta constantemente. Pa min como editora amás ye mui afalagador poder conciliar nun añu llibros de xente como Miguel Rojo o Xulio Arbesú que yá nun tienen que demostrar nada con otros d’autores tan mozos y sorprendentes como Ivan Cuevas o Pablo X. Suárez.

-Amás, dientro de bien poco van entamar a espublizar tamién una revista d’hestoria “Erada”que vien yá con una trayectoria previa, ¿qué novedaes va incluyir?

-Sobre’l conteníu, la revista mantien la llínea de los otros dos númberos, centrándose en temes d’historia contemporánea asturiana, la única novedá ye’l diseñu esternu namás, mantenemos los mesmos criterios de calidá de los otros númberos.

-La editorial que dirixe nun pertenez al Gremiu d’Editores d’Asturies, ¿nun-y paez necesaria la collaboración ente editoriales o tienen pesao axuntase a la organización nel futuru?

-La collaboración ye imprescindible pa la nuestra supervivencia, mantengo mui buenes relaciones personales colos miembros del Gremiu y cuento formar parte d’él nel 2010.

-¿Cómo ve la política de les sovenciones a la edición de llibros n’asturianu?

-Les subvenciones son necesaries pa toos, editores, escritores y pa tola sociedá. Siempres creí que la cultura tien que tar apoyada pol estáu y nun rexise por patrones de mercáu y rentabilidá. Nun podemos permitinos que se dexe de publicar n’asturianu o en cualesquier otra llingua o que los únicos productos que s’ofrezan seyan los de consumu masivu. Eso lo único que produz ye un emprobecimientu cultural.

-¿Qué cuestiones podríen meyorase?

-Hai munches coses meyorables porque hai que tener en cuenta que’l dineru de les subvenciones ye’l de tolos asturianos y hai que tener munchu cuidáu nel so emplegu.

-¿Esiste un públicu llector suficiente como pa caltener l’actividá de les editoriales esistentes anguaño n’Asturies?

-Sí, siempres digo que tenemos que tar contentos y saber cuál ye’l nuesu sitiu. Si mos comparamos con Planeta y los sos llibros d’usar y tirar tamos a años lluz, pero nun vendemos menos llibros que cualesquier escritor qu’espubliza en castellán nuna editorial del tamañu de les asturianes, teniendo en cuenta amás que nós utilizamos una llingua minoritaria y que l’escritor en castellán cuenta con un públicu potencial de millones de falantes. El llector n’asturianu ye un llector fiel.

-Y los llibros dixitales. Munchos espertos albidren poco futuru pa les editoriales que nun se pasen a esti formatu, ¿cómo ve’l futuru de la edición en papel?

-Nun se pueden poner puertes al mar, tamos viviendo un cambiu nes costumes y los hábitos de consumu cultural, el llibru dixital, a la llarga, mos sedrá tan normal como agora los Ipod, la nuesa obligación ye entender los cambios y adaptanos a ellos. De toes maneres la mio opinión ye que pasará con esto dalgo parecío a lo que ta pasando cola industria musical. Internet foi una revolución nel conceptu de cultura, per primer vegada na Hestoria toos y toes podemos acceder a la cultura de manera instantanea y ensin intermediarios. El problema van tenelu más les grandes compañíes editoriales y los productos culturales d’usar y tirar. Pero creo que siempre hai un güecu pal llibru tradicional, y creo que nesto les editoriales pequeñes al igual que les discográfiques independientes tenémoslo más fácil que les grandes compañíes, porque arriesgamos y sabemos ofrecer a la xente productos novedosos y con calidá. Al final el llector sedrá más esixente a la hora de comprar y les editoriales tendremos que ponenos les piles pa satisfacer al comprador.