Turismu

El ministru d’Agricultura, Alimentación y Mediu Ambiente, Miguel Arias Cañete, vieno acabante defender en Nava la “plena constitucionalidá” de la Llei de Mariñes poles bondaes de la nueva norma que va desplicar na xunta que caltenga col presidente del Principáu, el socialista Javier Fernández. El gobiernu asturianu decidió recurrir al Tribunal Constitucional esta nueva norma, palo que’l ministru nun atopa desplicación.

Cañete dixo tamién que la Llei de Mariñes foi peranalizada per xuristes, que aportaron a la conclusión de que nun invade nenguna competencia del Gobiernu asturianu.

EL Ministru quiso dexar bien nidio que si cola anterior llei nun se desanició dengún hotel con pinta de monstrusiodá urbanística …”¿Quién va baltar 25.000 viviendes?”.

La demanda nacional d’agospiu nos establecimientos de calter rural aportó al 56% demientres la ponte d’agostu, un 19% más que la previsión xeneral pa tol mes, según datos de reserves rexistraos nel portal de turismu rural EscapadaRural.com, qu’asitia Asturies, Cataluña y Navarra nel cumal de los destinos rurales más demandaos pa la ponte d’agostu con un 73% d’ocupación. A estes rexones sígueles el País Vascu col 64% de les places ocupaes y la Comunidá Valenciana con un 60% d’ocupación.

Madrid ta nel últimu llugar con un 33% d’ocupación, siguida por Castiella-La Mancha (37%) y La Rioxa (42%), qu’a pesar de tar a lo últimos del ranking meyoren los sos rexistros de los últimos meses.

Y oor provincies, Girona ye preferida polos viaxeros col 77% de les places ocupaes, siguiéndola Barcelona, Ciudá Real y Gipuzkoa con un 75% d’ocupación.

La Conseyería d’Economía y Empléu, al traviés de la Sociedá Rexonal de Turismu (SRT), robló un alcuerdu cola agrupación Travel Inspirers, en virtú del que tolos sos miembros van viaxar a Asturies demientres los próximos meses pa potenciar la proyección d’Asturies nes redes sociales. L’acción entama esta selmana cola visita de José Ramón Álvaro, fotógrafu y periodista del blogue “Viajes, rock y fotos”, y va siguir el próximu día 19 cola visita de Jordi Busque, fotoperiodista especializáu en viaxes que va retratar la naturaleza asturiana.

L’asociación Travel Inspirers ta formada por 12 bloggers profesionales del periodismu, la fotografía, el vídeu y el marketing en llinia, con acreditada esperiencia na ellaboración de cróniques de viaxes, espardimientu de destinos y escoyeta de conseyos útiles a la de viaxar. Los sos blogues son un claru reflexu de la profesionalidá na información de marques y destinos y na creación de productos rellacionaos col sector de viaxes. Xúntalos la pasión por viaxar y rellatar la esperiencia vivida coles mires de tresmitir el gustu por conocer nuevos destinos y abrir nuevos horizontes.

Mientres esti últimu trimestre, Asturies ta presente tamién en Tripadvisor, onde ta activa una microsite de destín con información sobre Asturies en castellán, inglés, francés y alemán, amás d’una campaña segmentada de banners que pretende captar turistes ineresaos en viaxar a la zona. TripAdvisor ta presente en 30 estaos y ye, con más de 60 millones de visitantes únicos al mes, el sitiu de viaxes más grande del mundu.

El Muséu del Ferrocarril d’Asturies ye un gran complexu museísticu allugáu na ciudá nel barriu del Natahoyo, xunto a la sablera de Pando o Poniente, en Xixón, y ta consideráu ún de los museos más importantes d’Europa nel so xéneru. El Muséu cunta con Sales d’Esposiciones Temporales, Centru de Documentación propiu (con biblioteca, hemeroteca, archivu documental y archivu d’imáxenes), sales d’actividades, talleres pa escolares, tienda y facilidaes pa persones con movilidá amenorgada. Delles vegaes al añu, prénden pa la so esibición les llocomotores de vapor que caltién n’estáu operativu, nes nomaes Xornaes del vapor.

Nes sos enanchaes instalaciones de más de 14.000 metros cuadraos, formaes pola antigua estación de Renfe, la llamada sablera de víes y dos edificios de nueva planta, guarda una de les mayores y meyor conservaes coleiciones de máquines y vagones de ferrocarril del continente européu.

Figura un ampliu conxuntu de llocomotores de vapor d’estremaos ferrocarriles, como’l Ferrocarril de Llangréu tercera llinia ferroviaria costruyida nel estáu dempués de la de Barcelona a Mataró y Madrid a Aranxuez) que xunía los conceyos asturianos de Llangréu y Xixón. La coleición tamién tien llocomotores de los Ferrocarriles del Norte, Vascu Asturianu y de munches llinies mineres ya industries. Arriendes, caltién coches de viaxeros, vagones, tranvíes y otros oxetos y útiles arreyaos a los trenes y les víes ferroviaries. ¿Tovía nun conoces toes estes xoyes? Esti branu tienes una oportunidá nueva.