Tecnoloxía

UNA denunciaba esti martes l’obligáu usu del sistema operativu de Microsoft, Windows, nos ordenadores de los telecentros y consideraba que “ye marafundiar les perres tanto pagar por unes llicencies que nun faen falta como tirar los actuales ordenadores”.

Unidá Nacionalista Asturiana (UNA), al traviés del so voceru Faustino Zapico, amosó l’alcuerdu de la organización pa coles muestres xeneralizaes d’indignación de los blogueros asturianos y los defensores del software llibre, pol apueste de la alministración asturiana de PSOE ya IU pola empresa Microsoft, tal y como queda especificao nel pliegu de condiciones pa la compra de nuevos ordenadores nos telecentros. Esta midida va obligar amás, sigún UNA, a tirar los ordenadores que tán n’usu nestos momentos.

Zapico afirmó que “nun tien xacíu pagar estes llicencies, yá qu’hai opciones de baldre basaes nel software llibre, y qu’amás yá taben usándose en dellos telecentros qu’emplegaben GNU/Linux”. A UNA pésa-y comparar la política del Gobiernu asturianu con otros como l’estremeñu, con una política qu’apoya abiertamente’l desarrollu del software llibre. UNA alvierte de qu’esta decisión amás de ser arbitraria dafechu ta incumpliendo la llei d’accesu electrónicu de la ciudadanía a los servicios públicos, onde se recueye’l principiu de neutralidá tecnolóxica, conseñando amás que l’Alministración Pública tien de garantizar la independencia d’usu d’alternatives tecnolóxiques y que, pa enriba, tien d’usar estándares abiertos y con calter complementariu a los d’usu xeneralizáu.

Zapico indicó que “ye un robu tar gastando les perres de la ciudadanía pa pagar dalgo totalmente innecesario, yá que les opciones basaes nel software llibre garanticen un soporte tecnolóxicu afayadizu y xeneralizáu que nun supón torga nenguna pal usuariu”. Los nacionalistes desixen-yos tamién a PSOE ya IU que “espliquen por qué escueyen una vía de software de pagu, porque más bien paez que l’oxetivu del PSOE ya IU ye paga-yos la crisis a les multinacionales a base de dilapidar el dineru públicu, al tiempu que cuestionen la viabilidá de servicios públicos talos como la sanidá” lo qu’UNA calificó como irónico yá que “estes midíes vienen d’un supuestu Gobiernu d’esquierda”.

UNA alvierte asina mesmo de que “esta opción va obligar a eliminar de los ordenadores de los telecentros el sistema UBUNTU, que tien una versión n’asturianu, lo que aumenta la visibilización de la nuestra llingua, qu’arriendes d’ello tien incluso repercusión internacional”.

Pola mor de la concesión del Premiu Príncipe d’Asturies d’Investigación Científica y Técnica a Martin Cooper, inventor del primer teléfonu móvil en 1973, la Universidá d’Uviéu va entamar una recoyida masiva de teléfonos móviles (col so cargador y too ello nuna bolsa de plásticu) en cada Centru y nel Edificiu Hestóricu de la Universidá hasta’l 20 d’ochobre.

Los teléfonos van ser mostraos nuna gran urna pa, darréu, mandalos a países del tercer mundu onde los teléfonos móviles son mui escasos.

Cada persona qu’entregue unu o más teléfonos podrá, si lo desea, dexar constancia del so nome, yá que toles persones van ser reconocíes nun actu oficial que tendrá llugar el día 22 d’ochobre a les 18 hores nel Patiu del Edificiu Hestóricu de la Universidá.

El colectivu Softastur entama nel Atenéu de Turón, en Mieres, un alcuentru con usuarios o interesaos nel sistema operativu Ubuntu n’asturianu. Va ser el xueves que y vienres que vien, a 19:00 y 16:30 hores respectivamente. Con esta “Instal Party” la organización quier “enseñar y/o instalar a tolos interesaos un sistema operativu que-yos permita manexar un ordenador n’asturianu dafechu”.

Según cuenten los responsables de Softastur, “col sistema operativu Ubuntu pue facese cualesquier xera, como restolar per Internet, ver videos, oyir música, escribir documentos, mandar/recibir emails, ver/editar semeyes, descargar música/películes, chatear… y too ello n’asturianu, ensin virus y de baldre”.

Softastur ye una plataforma de programadores y traductores en llingua asturiana dedicada a la torna y desarrollu de software llibre n’asturianu. Trátase d’una iniciativa de calter cívicu empobinada en programes de códigu llibre.

Consulta necesidaes pa instalar l’Ubuntu

Yá ta disponible la versión dixital del númberu d’agostu de la revista “La Sidra” que fai el númberu 68 d’esta publicación mensual del Ensame Sidreru. Dalgunos conteníos destacaos nes sos 90 páxines son: V Tour del Llagar, el reportaxe “Prohibío escanciar” sobre la polémica en Carreño d’echar sidra na cai, la XVIII fiesta de la sidra de Xixón o’l X festival de sidra d’escalante. Pue lleese la revista na recién inaugurada páxina web de La Sidra.

Asturies lidera per tercer añu consecutivu la disponibilidá de los servicios públicos online, tanto en servicios pa ciudadanos como en servicios pa empreses, acordies col informe añal sobre’l desendolcu de la Sociedá la Información n’España 2009, fechu pola Fundación Orange. Acordies con esti informe, n’Asturies, la media total del nivel de desendolcu online de los 26 servicios públicos evaluaos ye del 97%, ventidós puntos sobre la media total de les 19 comunidaes autónomes, que ye del 67%, y nueve puntos sobre Andalucía y Navarra.

La Fundación Orange presentó esta memoria nun actu oficial celebráu nel Palaciu de Congresos de Madrid, que contó cola asistencia del Presidente del Principáu d’Asturies, Vicente Álvarez Areces, y d’otres autoridaes del Gobiernu asturianu como la Conseyera d’Alministraciones Públiques y Vocera’l Gobiernu, Ana Rosa Migoya; el Delegáu del Principáu d’Asturies en Madrid, Miguel Munárriz Cellino; el Viceconseyeru de Modernización y Recursos Humanos, Luis Iturrioz Viñuela; y el Viceconseyeru de Coordinación y Comunicación, Víctor Manuel Suárez Prado. Acordies con esti informe, la media de los servicios pa ciudadanos ye del 97%, mientres que la de los restantes servicios, empobinaos a empreses, ye del 98%. Hai 23 servicios públicos col máximu nivel de desendolcu online (Etapa 4), ye dicir, que puen facese de forma completa na rede.

Asina de los 26 servicios evaluaos, al Principáu d’Asturies namái-y falten tres p’algamar el 100% de disponibilidá online. D’esos servicios restantes que nun llegaron a la Etapa 4, ningún presenta’l nivel mínimu de desendolcu (Etapa 0). Los índices más baxos son los correspondientes a Cita Médica y Consulta de Llicitaciones. Nel actu oficial en Madrid, el Presidente del Principáu destacó l’esfuerzu inversor del Gobiernu asturianu pa desendolcar la Sociedá la Información na comunidá autónoma y añadió que, nesta llexislatura, l’Executivu va invertir 24 millones d’euros en TDT y 40 millones d’euros en despliegue de banda ancha en tol territoriu, incluyendo la rede Asturcón y les subvenciones pa la estensión de cobertura.

696.000 euros, esta ye la cantidá que va costar caltener los conteníos de la páxina web institucional del Gobiernu d’Asturies, n’asturianu y n’inglés, enre 2009 y 2012. La partida pal contratu aprobóla nel so conceyu selmanal el Conseyu de Gobiernu, cumpliendo col mandáu de la Llei d’Usu del asturianu y la Llei 11/2007, de 22 de xunu, d’Accesu Lletrónicu de los Ciudadanos a los Servicios Públicos, amás de la Directiva 2006/123/CE del Parlamentu Européu y del Conseyu sobre los servicios nel mercáu interior”.

La resolución afirma que “l’oxetu del contratu ye la realización de trabayos de traducción, al inglés y al asturianu, de conteníos del portal corporativu del Principáu de Asturies, www.asturias.es, durante los años 2009 a 2012”. La web asturias.es lleva dellos años calteniendo los sos servicios n’asturianu, castellán ya inglés.

La comunidá virtual enfotada en tornar Software Llibre al asturianu, “Softastur” , ta acabante abrir la so páxina web, dempués de llevar tiempu dándose a conocer al traviés d’un blogue, que va siguir abiertu y n’usu.

La organización trabaya promoviendo y sofitando’l so usu en tolos ámbitos de la sociedá de los programes n’asturianu y xuniendo esfuercios y coordinando los proyeutos, apurriendo aida y sofitu téunicu.

Pa los organizadores ye “mui necesario tener una web sencillina onde poder esplicar lo más claramente posible lo que fai Softastur, como collaborar, como conseguir el software y como conseguir aida”.

Páxina web del colectivu

El portal de vídeos YouTube vieno acabante d’entamar un nuevu serviciu col que quier facer que ver los sos vídeos na tele seya enforma más cenciello.

YouTube XL ye la versión pala pantalla grande del popular sitiu de la rede que s’alcuentra disponible dende esti martes y que quier adaptar los conteníos de la web para visualizalos dende el televisor del salón. En YouTube XL pue buscase, ver o camudar de vídeu nun par de clics.

La versión d’Ubuntu 9.04 ufre una nueva posibilidá de que l’asturianu s’emplegue davezu, esta vegada dende los nuevos ordenadores miniportátiles que tanto se tan espardiendo. Netbook Remix ye’l nomatu d’esta versión nueva de la distribución más popular del sistema operativu Linux.

Fasta agora habia 2 versiones d’Ubuntu pa baxar: La Desktop (pa ordenadores de sobremesa y portátiles) y la Server (pa sirvidores). Ubuntu 9.04 ufierta agora la versión Netbook Remix, adaptada a los minilaptops. Tendrá un nuevu entornu d’escritoriu adaptáu a les pantalles pequeñes, y enfocáu al hardware más común d’estos pequeños portátiles.

Softastur ufre los enllaces pa descargar les nueves versiones d’Ubuntu

L’asociación Softastur, qu’esti sábadu va desendolcar nel Antiguu Institutu de Xixón una nueva Install Party d’Ubuntu n’asturianu algamó esta selmana una sorpresa pergrande al atopar a cuatro de los sos componente ente los 20 que más tornen Ubuntu nel mundiu. La llista pue vese nel Hall of fame d’Ubuntu y ufre los siguientes llugares: 1. Astur. 9. Arcipiescu. 10. marquinos y 20. Xuacu.

Anuncia de la Install Party n’Asturnews