Sociedá

L’asturianu afronta una preba decisiva pa la so sobrevivencia. La Xunta Xeneral del Principáu retoma mañana l’actividá depués de les vacaciones de veranu y abre un cursu políticu nel qu’habrán determinase l’usu de la llingua na futura televisión autonómica, la postura de los grupos políticos sobro la oficialidá na inminente reforma del Estatutu d’Autonomía y l’aprobación y desendolcu del Plan de Normalización Sociollingüística.

Na xornada inagural de mañana, de momentu, una xuntanza de los portavoces parlamentarios decidirá l’orde del Plenu institucional que va cellebrase’l 7 de setiembre con ocasión del Día d’Asturies y debuxará les primeres llinies formales del denomináu ‘debate sobro l’estáu de la rexón’. A partir d’esa cita, la maquinaria política echará a andar y deberá analizar importantes asuntos sociollingüísticos.

El director xeneral de Promoción Cultural y Política Llingüística, Carlos Madera, prevé que’l Plan de Normalización -el documentu qu’estructura y planifica la política llingüística’l Gobiernu hasta 2007- tea llistu pa entrar en vigor nos prósimos meses. El testu, que’l director de la Oficina de Política Llingüística, Ramón D’Andrés, quier ver vixente como mui tarde nos primeros meses de 2005, empezará ser analizáu darréu polos altos cargos de la Conseyería de Cultura, y el momentu y el mou de la so aprobación dirán bastante de les intenciones del Gobiernu autonómicu pa cola llingua asturiana.

Col alderique de fondu sobro la reforma l’Estatutu d’Autonomía -na que l’asturianu xuégase bona parte’l so futuru en función de si se declara o non idioma cooficial-, los políticos podrán definir amás la proporción en que la llingua asturiana va emplegase na futura radiotelevisión pública asturiana, cuyes primeres emisiones regulares tán previstes pa mediaos de 2005. El nomamientu’l conseyu d’alministración, les directrices del Executivu y el propiu interés de los trabayadores del ente sedrán claves nesti aspectu.

Nel horizonte debúxense asinamesmo puntos d’inflexón que puen entainar la marcha de la normalización llingüística fuera les puertes del Parlamentu. Dos d’elles son la creación de nuevos servicios municipales de promoción del asturianu y l’interés de pas y alumnos na matriculación de los escolinos na asignatura de Llingua Asturiana, cuyu currículu ta a puntu de ser aprobáu pol Conseyu de Gobiernu.

Una irresponsabilidá hestórica, frutu d’una visión “acomplexada y provinciana”. Asina interpreta la Xunta pola Defensa de la Llingua Asturiana les declaraciones nes que’l presidente autonómicu, el socialista Vicente Álvarez Areces, postergó la coficialidá del asturianu “pa nun tratar de reforzar lo que nos separa de los demás”.

Nun comunicáu difundíu esta mañana, la Xunta deduz que les pallabres del presidente, asoleyaes nuna entrevista publicada’l pasáu domingu nel diariu ‘La Nueva España’, faen prever que la política llingüística qu’Areces ta dispuestu a liderar sedrá “acomplexada y curtia”, acordies cola “mentalidá antiasturiana” que la entidá de defensa de la llingua atribúi a la cúpula dirixente’l PSOE asturianu.

Nesti sen, la Xunta pola Defensa de la Llingua albidra que les declaraciones del presidente’l Principáu pretenden “empuercar” el debate sobro la posible inclusión de la coficialidá del asturianu na prósima reforma del Estatutu d’Autonomía, y fáenlo, na opinión de la Xunta, dende “argumentos tramposos”, asegurando que la oficialidá diba provocar confrontación na sociedá asturiana.

Lloñe d’esti argumentu, la Xunta pola Defensa de la Llingua reivindica l’idioma asturianu como un “elementu de xuntura ya identidá” y fai un llamáu a esixir los mesmos drechos que yá tienen reconocíos otros idiomes del Estáu. El procesu contrariu, camienta la entidá de defensa’l patrimoniu llingüísticu, fai responsables a los sucesivos Gobiernos asturianos de la desapaición de la llingua autóctona.

Artículu d’opinión: “¿Medalles d’Asturies?”

Falta la firma final. El paquete de subvenciones pa la promoción de la llingua asturiana correspondientes al exerciciu de 2004 esperimentará un pequeñu retrasu nel so trámite completu de resolución respecto al añu pasáu, yá que les propuestes de concesión y denegación esperen la firma de la conseyera de Cultura, Ana Rosa Migoya, que regresa de vacaciones a primeros de setiembre, pa poder ser publicaes nel Boletín Oficial del Principáu. En 2003, esa publicación materializóse’l 16 d’agostu.

Magar d’esi retrasu técnicu respecto al añu pasáu, que nun se prevé llargu, fontes de la Conseyería de Cultura cuestionaron que la postergación na publicación de la resolución -fechu que-yos da calter de firmes ya oficiales a les subvenciones concedíes- vaiga traducise nun retrasu nel cobru de les ayudes, y precisaron que los solicitantes yá tienen o puen tener información de la cuantía concedida, o de la denegación, al traviés de la Oficina de Política Llingüística’l Principáu.

El director d’esti organismu, Ramón D’Andrés, estudia modificar la política de concesión de subvenciones de promoción en toles estayes de la llingua asturiana a partir de la convocatoria del añu prósimu, col envís declaráu d’evitar “inercies qu’obliguen a subvencionar proyectos poco comprometíos cola normalización”.

Nel casu de les ayudes económiques directes a los conceyos pa la protección y emplegu de la llingua asturiana, les solicitúes medraron esti añu nun 50 por cientu, yá que de les 108 peticiones empopbinaes polos ayuntamientos a Cultura nel añu 2003 pasóse a más de 150 espedientes na convocatoria de 2004.

Jean Germain, de la Universidá de Louvain-la Neuve de Valonia; Daid Heap, de la Universidá de de Western Ontario, nos Estaos Xuníos; y Paquita Suárez Coalla, de la City University of New York, van ser los espertos cimeros de les XXIII Xornaes Internacionales d’Estudiu que como tolos años va desendolcar nesti mes d’ochobre de 2004 l’Academia de la Llingua Asturiana. Les Xornaes d’estudiu van tener llugar n’Uviéu los díes 25, 26 y 27 d’ochobre y van cuntar cola participación de munchos otros espertos como Emilio Ridruejo, Carmen Muñiz, Roberto González-Quevedo y el direutor d’Asturnews, Próspero Morán, ente otros.

El profesor de de la Universidá de Louvain-la Neuve de Valonia Jean Germain va falar nes xornaes d’ochobre sobre “Las lenguas regionales endógenas de Valonia: un enfoque sociollingüísticu”, mentantu que David Heap, de la Universidá de de Western Ontario, nos Estaos Xuníos, va facelo sobre “Las encuestas del ALPI para Asturias” y Paquita Suárez Coalla de la City University of New York va disertar alrodiu de “La experiencia de la escritura dende dos llinguas marxinadas: l’asturianu y el castellanu”.

Na programación de les xornaes, amás d’estes conferencies tan previstes otres del académicu de la llingua asturiana Roberto González-Quevedo sobre “Símbolos de Sangre”, otra de Carmen Muñiz Cachón, de la Universidá d’Uviéu, sobro “La entonación y el conxuntu de rasgos prosódicos na carauterización d’una llingua” y d’Emilio Ridruejo, de la Universidá de Valladolid, sobro “El aprovechamiento de los mecanismos analógicos en los procesos de estandarización de las lenguas. El ejemplo del asturiano”.

Comunicaciones estremaes

Amás de la participación del Profesor de Periodismu de la Universidá Carlos III de Madrid y académicu de la llingua asturiana, Próspero Morán, que falará sobro “El periodismu alternativu y les llingües minoritaries”, presentaránse nes Xornaes comunicaciones d’Ana Cano González (“L’álbum de Josefina Pérez d’Ayala”), Xosé Lluis Campal (“Sobre el bable (1902), una reflexón d’un interesante artículu periodísticu de fai más d’un sieglu apaecíu por entregues en El Carbayón”), Xosé Lluis García Arias (“Galicismos”), Miguel Ramos Corrada (“Dalgunos casos de yeísmu n’asturianu”) o Xulio Viejo Vázquez (“aloración, intercomunicación y dialectoloxía: la vivencia de la llingua nel Quirós tradicional). Xunta estos espertos presentarán comunicaciones otros como Liliana Díaz Gómez, María del Pilar Fernández González, Héctor García Gil, Esperanza Mariño Davila, María del Mar Martín Martín, Xuan Porta Allende, Rafael Rodríguez Valdés, Xuan Santori Vázaquez, Aníbal González Miyares, Hermenegildo Bardio Díaz y Javier Fernández Irigoyen.

N’ochobre, si hai conformidá de los ayuntamientos. La Xunta Asesora de Toponimia’l Principáu tará en disposición d’eleva-y nesa fecha al Conseyu de Gobiernu los dos primeros espedientes qu’estrenarán el procesu de recuperación de la toponimia tradicional, los qu’afiten los nomes de llugar de Carreño y El Franco. L’organismu asesor reunióse ayeri cola ausencia consumada de L’Academia de la Llingua, que yá anunciara’l so distanciamientu.

Acordies col procedimientu qu’establez la llei, la Xunta alcordó na so primer xuntanza depués del ‘parón’ veraniegu empobina-yos a los ayuntamientos de Carreño y El Franco los sos espedientes toponímicos, que yá tán pesllaos y que son los dos primeros informes ellaboraos pol organismu. Los dos conceyos tendrán agora un plazu d’un mes pa da-yos el preste a los espedientes o pa formular alegaciones.

D’esti mou, si los ayuntamientos tán conformes, los informes entenderánse aprobaos poles Corporaciones llocales afectaes y tarán llistos pa ser elevaos al Conseyu de Gobiernu a partir d’ochobre -un mes más si hai disconformidá-, lo que nun significa, ensin embargu, que pasen esi trámite darréu, yá que la Xunta de Toponimia estudia inda si someterá los espedientes a l’aprobación definitiva’l Gobiernu ún por ún o en grupos d’ellos.

Credibilidá

En tou casu, el secretariu de la Xunta y director de la Oficina de Política Llingüística’l Principáu, Ramón D’Andrés, vinculó a les clares la credibilidá del organismu con que’l Gobiernu asturianu aprebe y oficialice los topónimos que-y propón la Xunta de Toponimia “ensin retrasu nengún”. La potestá d’elevar los informes definitivos al Executivu, en forma de Decretu, correspuende-y por llei a la Conseyera de Cultura, la socialista Ana Rosa Migoya.

La Xunta Asesora de Toponimia analizó ayeri n’Uviéu los nomes de llugar de Llanes, conceyu cuyos topónimos quier afitar na so prósima reunión de trabayu, fixada pa mediaos de setiembre y na que l’organismu prevé abordar l’espediente de L.lena. Amás d’esos dos conceyos, y de los dos que yá tienen los sos espedientes pesllaos, la Xunta acumula les peticiones d’otros ocho municipios pa recuperar la so toponimia tradicional.

Nesi procesu nun participará L’Academia de la Llingua, qu’ayeri tuvo ausente por primer vegada nes reuniones de la Xunta de Toponimia y que yá anunciara, tal como adelantó Asturnews el pasáu 19 d’agostu, el so distanciamientu del organismu al considerar que’l llabor que-y correpuende nél “ya ta fechu y plasmáu” nel nomenclátor de conceyos, parroquies, pueblos y llugares editáu pola institución académica nel añu 2000.

El procesu pa recuperar la toponimia tradicional algama yá a la mitá de la población asturiana

Los Alcuentros Internacionales de Mocedá de cabueñes xirarán na so 22 edición, que se cellebrará nel Antiguu Institutu de Xixón del 20 al 24 de setiembre, sobro tres grandes pegollos: la globalización, les polítiques públiques de mocedá y les posibilidaes reales d’emancipación de mozos y moces.

P’abordar esos asuntos, el coordinador xeneral de los alcuentros, Pau Solanilla, aseguró esta mañana na presentación de les xornaes que pretende apostar por un mayor diálogu ente los participantes, poniendo enriba la mesa cuestiones que la mocedá tien que discutir.

El filósofu Gustavo Bueno participará na sesión d’inaguración con una ponencia sobro la globalización, estaya que coordinará’l director xeneral d’Asuntos Europeos y Cooperación Internacional del Gobiernu de Cantabria, José Félix Calleja, mientres que Leasse Sougara, falará sobro les polítiques públiques, ámbetu coordináu pol xestor xuvenil de la Universidá de Valencia Vicente Inglada.

El tercer exe temáticu, que tará introducíu na llección inagural por Bruno Astrada, desendolcaráse baxo la coordinación d’Emilio José Sánchez Romero, asesor técnicu de la Ministra de Vivienda.

Nun esfuerzu de modernidá, editaránse toles reflexones y conclusiones de los alcuentros -que podrán seguise por internet na web oficial de les xornaes- como referente pa posteriores polítiques. El plazu d’incripciones finaliza’l 31 d’agostu, con cuotes que van de los 19 a los 74 euros, y espérase una participación de 180 a 200 persones.

Acaben dos selmanes d’ausencia institucional del asturianu. La Feria Internacional de Muestres d’Asturies, el certame ferial más visitáu y con mayor proyección internacional del Principáu, peslló ayeri en Xixón la so 48 edición, na que’l Gobiernu autonómicu y los ayuntamientos reserváron-y un espaciu mínimu a la llingua asturiana pa promocionase nel eventu.

Asina, los cuatro grandes exes qu’escoyó l’Executivu del Principáu pa esponer el so llabor na Feria -el futuru Hospital Central, el Consorciu de Tresportes, el Muséu’l Xurásicu y les polítiques de vivienda- presentáronse al públicu dafechu en castellán, con salvedaes en dalguna inscripción puntual referida a la vivienda.

Tampoco nun s’animaron a emplegar l’asturianu los distintos conceyos con presencia nel certame ferial, más allá de la imaxe corporativa de dalgún de los ayuntamientos -el de Llangréu usó únicamente’l topónimu n’asturianu- o mancomunidaes, como la de los Valles Mineros, que presentó’l so ámbitu d’actuación como “valles mineros de Asturies”.

Amás d’ello, la llingua asturiana tuvo confinada a cartafueyos informativos a disposición de los visitantes, talos como’l que promocionaba’l “centru d’interpretación del pobláu mineru de Bustiello”, pero con testu xeneral en castellán.

No que cinca a los tres principales ayuntamientos d’Asturies, cero n’asturianu: Uviéu optó por presentase na Feria de Muestres como ‘la ciudad de los Príncipes’, Xixón espuso’l so futuru acuariu municipal con testos dafechu en castellán y Avilés promocionó’l Palaciu de Campusagráu nesa mesma llingua.

Toponimia y normalización nos conceyos. Esos son los dos pegollos enriba de los que la Oficina de Política Llingüística’l Principáu quier desendolcar el so llabor nel prósimu cursu políticu, qu’empieza en setiembre. L’organismu, dependiente de la Conseyería de Cultura, Comunicación Social y Turismu, pide qu’un mínimu d’un terciu de la publicidá institucional del Gobiernu seya n’asturianu y propón una “fonda reforma” nes subvenciones.

Nun programa d’ocho puntos ellaboráu como una declaración d’intenciones pal añu 2005, la Oficina afita la política llingüística nel ámbitu municipal como oxetivu prioritariu y, nesi sen, llama a fortalecer la Rede de Normalización nos Conceyos y a apoyar económicamente los servicios llocales de promoción del asturianu.

Una segunda amuesa de que’l departamentu dirixíu por Ramón D’Andrés entiende que la normalización ‘cuezse’ en gran midida no más prósimo al ciudadanu ye’l tratamientu preferente a la recuperación de los nomes de llugar en llingua asturiana. Nesti apartáu, la Oficina avisa que la credibilidá de la Xunta Asesora de Toponimia básase en que’l Conseyu de Gobiernu oficialice “ensin retrasu nengún” los topónimos propuestos, y poro pide una actuación rápida y ensin torgues del Executivu autonómicu “yá nel 2004”.

Nos meses finales d’esi añu, o nos primeros de 2005, habrá tar llistu amás el Plan de Normalización Sociollingüística, documentu qu’organiza y planifica la política llingüística’l Principáu pa los prósimos tres años, y el so asoleyamientu, prevé la Oficina dirixida por D’Andrés, coincidirá con una “fonda reforma” del criteriu con que se vienen concediendo mui estremaes subvenciones pa la promoción del asturianu, col envís d’evitar les “inercies qu’obliguen a subvencionar proyectos poco comprometíos cola normalización”.

Dos puntos más completen la llista de propósitos esternos de la Oficina: L’usu del asturianu “en calidá, proporción temporal y dignidá” na futura radiotelevisión autonómica, y la invitación a que polo menos un terciu de les comunicaciones institucionales y la publicidá del Gobiernu, les Conseyeríes y otros organismos del Principáu se faigan en llingua asturiana.

Una campaña entamada hai bien poco por Eurominority ya tien recoyíes más de 3000 firmes (3282 a la hora redactar esta información)pa llograr el reconocimientu de les llingües minoritaries y rexonales, tanto si son oficiales como si non, permitiendo que los ciudadanos puean emplegales na so relación cola alministración y les instituciones. La campaña va a la gueta de firmes de ciudadanos europeos que namái que tienen de rellenar un formulariu nesta páxina web depués de comprobar la llarga llista de llingües, ente les que s’alcuentra l’asturianu, pa les que se pide la reconocencia dafechu de la Xunión Europea.

La campaña que ya superare esta selmana les tres mil firmes nun ta teniendo ecu informativu nos medios de comunicación de territorios como l’asturianu, que faen oyíos sordos a una solicitú que s’afita precisamente en resolver la problemática de los ciudadanos que tienen una llingua que nun ta declarada oficial, anque la petición faise pa toles llingües minorizaes.

El documentu, que namái se pue lleer en francés ya inglés, como la mayor parte de la web d’Eurominority diz que los firmantes, “ciudadanos europeos, encamienten a les instituciones europees un estatutu pa les llingües minoritaries y rexonales (reconocíes o non polos Estaos), una torna de la futura Constitución europea a eses llingües y que los ciudadanos puean empobinase a les instituciones y recibir la información nes sos propies llingües”. Darréu d’ello, los ciudadanos firmantes “encamienten a los Estaos miembros de la Xunión Europea que recueyan esta demanda y la treslladen a los muérganos de decisión europeos”, convencíos de que “les llingües minoritaries y rexonales d’europa son un elementu fundamental del patrimoniu del nuesu continente, contribuín a la riqueza y a la diversidá cultural y son les llingües qu’empleguen davezu millones de ciudadanos europeos”.

Carta europea polos Drechos de les Llingües Minoritaries (firmada por España)

El centru territorial de Televisión Española n’Asturies, dirixíu pol periodista Pedro Alberto Marcos, ve con bonos güeyos una posible programación especial con ocasión del 30 aniversariu de la hestórica asociación Conceyu Bable, que va cellebrase a finales de payares con un programa qu’inclúi, nel so primer borrador, una esposición, una conferencia y tres conciertos.

Magar que los organizadores de les cellebraciones, alitaes pola Oficina de Política Llingüística’l Principáu col sofitu d’otres entidaes, manexen entá un programa embrionariu qu’ha ser negociáu con ayuntamientos ya instituciones, nesi proyectu despunten un gran conciertu final n’Uviéu el vienres 26 de payares con participación d’artistes del Resurdimientu y otros dos posibles recitales, ún de Carlos Rubiera en Xixón y otru centráu nel rock fechu n’asturianu, con allugamientu inda por concretar.

Si prosperen les intenciones de los organizadores de la efemérides, les tres décades de vida de Conceyu Bable cellebraránse amás con una esposición de llibros en llingua asturiana, una conferencia al rodiu la nueva lliteratura, una amuesa d’artes plástiques y estremaes actividaes de música folk y tonada.

Conceyu Bable echó a andar nel añu 1974 cola revista ‘Asturias semanal’ como epicentru de les sos reivindicaciones y la defensa de la llingua asturiana por bandera. Na asociación confluyeron los pioneros del movimientu asturianista, que col pasu’l tiempu ramificóse n’estremaos collectivos y corrientes y vio aselecer la que ta considerada como la so organización fundacional.