La Feria de Muestres pieslla una edición con mínima presencia institucional del asturianu

Acaben dos selmanes d’ausencia institucional del asturianu. La Feria Internacional de Muestres d’Asturies, el certame ferial más visitáu y con mayor proyección internacional del Principáu, peslló ayeri en Xixón la so 48 edición, na que’l Gobiernu autonómicu y los ayuntamientos reserváron-y un espaciu mínimu a la llingua asturiana pa promocionase nel eventu.

Asina, los cuatro grandes exes qu’escoyó l’Executivu del Principáu pa esponer el so llabor na Feria -el futuru Hospital Central, el Consorciu de Tresportes, el Muséu’l Xurásicu y les polítiques de vivienda- presentáronse al públicu dafechu en castellán, con salvedaes en dalguna inscripción puntual referida a la vivienda.

Tampoco nun s’animaron a emplegar l’asturianu los distintos conceyos con presencia nel certame ferial, más allá de la imaxe corporativa de dalgún de los ayuntamientos -el de Llangréu usó únicamente’l topónimu n’asturianu- o mancomunidaes, como la de los Valles Mineros, que presentó’l so ámbitu d’actuación como “valles mineros de Asturies”.

Amás d’ello, la llingua asturiana tuvo confinada a cartafueyos informativos a disposición de los visitantes, talos como’l que promocionaba’l “centru d’interpretación del pobláu mineru de Bustiello”, pero con testu xeneral en castellán.

No que cinca a los tres principales ayuntamientos d’Asturies, cero n’asturianu: Uviéu optó por presentase na Feria de Muestres como ‘la ciudad de los Príncipes’, Xixón espuso’l so futuru acuariu municipal con testos dafechu en castellán y Avilés promocionó’l Palaciu de Campusagráu nesa mesma llingua.