Sociedá

Nel últimu Conseyu de Gobiernu de xineru. L’Executivu autonómicu tendrá qu’aprobar la selmana qu’entra el documentu que rixe la política llingüística pa los prósimos tres años, si nun quier faltar al compromisu alquiríu pola conseyera de Cultura, Ana Rosa Migoya, quien anunció la entrada en vigor del testu pa esti mesmu mes. Fontes del Executivu aseguren que’l Conseyu de Gobiernu yá anició l’análisis del documentu.

El pasáu 10 de payares, Migoya afirmó, na presentación pública del presupuestu de Cultura pa 2005, que’l Plan de Normalización Sociollingüística -primer documentu integral qu’aprobará’l Gobiernu autonómicu pa planificar la política llingüística con midíes concretes hasta 2007- entraría en vigor nesti mes de xineru, un plazu qu’escosa a mediaos de la prósima selmana yá que’l documentu precisa’l preste del Conseyu de Gobiernu y la última xuntanza del Executivu nesti mes produciráse previsiblemente’l xueves.

Diverses fontes de la propia Conseyería de Cultura indicaron que nesa fecha ye factible que s’apruebe el plan, cuyu análisis yá s’entamó nel Conseyu de Gobiernu, anque l’aprobación del documentu comentóse como inminente nes anteriores reuniones que l’Executivu mantuvo esti mes -la última d’elles, ayeri- y finalmente nun se produxo.

El partu’l Plan de Normalización remóntase al pasáu mes de marzu, fecha na que yá taba redactáu el borrador definitivu. A primeros de xunetu, el documentu aportó a la mesa de trabayu de la conseyera de Cultura, y a partir d’ehí, too foron especulaciones colos plazos pa la so aprobación y posterior entrada en vigor.

El director xeneral de Promoción Cultural y Política Llingüística, estimó primero que’l plan podría empezar a aplicase en setiembre de 2004 y depués albidró que’l documentu aprobaríase nel “últimu Conseyu de Gobiernu de 2004 o el primeru de 2005”. Nun foi asina.

A lo llargo de 64 páxines, nel Plan de Normalización pónense plazos mui precisos a les actuaciones pa normalizar l’usu del asturianu en toles estayes, con menciones específiques a la relixón, el deporte, la enseñanza y la radiotelevisión autonómica, a la que se-y dedica un capítulu espresu. Anque nun se fala espresamente d’oficialidá, el documentu plantega una coficialidá ‘de fechu’ a base de llevar a la práctica toles midíes pormenorizaes nel testu.

Archivu. Avance de conteníos del Plan de Normalización

Cinco conferencies y alderiques sobro cultura popular, vivienda, educación y vieyera, más un conciertu de Javier Krahe. Xixón acueye con esi programa a partir de mañana, y hasta’l prósimu 29 de xineru, la IX Selmana del Aula Popular ‘García Rúa’, qu’entamen en comuña l’Atenéu Obreru, la Sociedá Cultural Xixonesa, la emisora Radio Kras y l’equipu de teatru ‘La Máscara’.

Col centru de les actividaes previstes nel Antiguu Institutu Xovellanos, l’especialista en vivienda Fernando Urruticoechea estrenará a les 20 hores de mañana el programa d’actos con una conferencia sobro’l sector inmobiliariu y les múltiples derivaciones del urbanismu. El llunes 24, el protagonismu sedrá pa la ocupación, con intervención d’estremaos collectivos d’Asturies y Madrid.

Teresa Ramírez y Belén Iglesias disertarán, respectivamente, sobro programación cultural alternativa el martes y al rodiu de la dimensión social vieyera, el miércoles, antes que’l xueves garre’l relevu el veteranu cantautor Javier Krahe, qu’ufrirá un conciertu nel teatru Xovellanos con un preciu únicu d’entrada de 10 euros.

Una conferencia, el vienres 28, del propiu profesor José Luis García Rúa -que-y da nome al aula popular qu’entama les xornaes- y una espicha de confraternización nun hotel de la ciudá pesllarán el programa d’actos, que cuenta col sofitu del Ayuntamientu de Xixón al traviés de la Fundación Municipal de Cultura, Educación y Universidá Popular.

Galicia destina dos xornaes a analizar los conteníos del so plan pa impulsar l’idioma gallegu, un documentu que plantega espardir l’usu d’esa llingua nel occidente d’Asturies. El Principáu espera una copia’l testu que yá-y solicitó al director xeneral de Política Llingüística de la comunidá vecina, Xesús Pablo González Moreiras.

El documentu, ellaboráu con ampliu consensu y aprobáu nel Parlamentu gallegu en setiembre pasáu, provocó dos meses depués la controversia nel ámbitu asturianista, depués que l’Academia de la Llingua Asturiana denunciara que’l testu pretende ‘galleguizar’ espresamente la comarca asturiana comprendida ente los ríos Navia y Eo, estremu occidental del Principáu.

González Moreiras -quien yá se comprometió a unvia-y una copia’l testu al Gobiernu asturianu- presentará mañana’l plan nel trescursu de los VIII ‘Encontros para a normalización’, que güei entamaron en Santiago de Compostela y que van facer repás de los conteníos y el procesu d’ellaboración del ‘Plan Xeral de Normalización da Lingua Galega’, asina como de les midíes propuestes pol documentu na alministración y na educación.

Al otru día, sábadu, el director de Política Llingüística en Galicia presentará en públicu’l plan, nun actu formal que quier esplicar les propuestes del documentu, y nel que van repartise miles d’exemplares del plan.

Ente otres midíes, el plan de la comunidá vecina pa da-y puxu al so idioma aboga por reforzar la idega ente la población del occidente asturianu de que la so fala ye gallegu, “coles sos peculiaridaes dialectales, pero gallegu”, universalizar la cobertura de la televisión pública gallega nel Navia-Eo y alitar a los comerciantes de la zona a retular los sos negocios en gallegu.

Archivu. Galicia traza un plan pa ‘convencer’ a los habitantes del occidente asturianu de que falen gallegu

Pueblu a pueblu. L’Ayuntamientu de L.lena, al traviés del so serviciu llocal de normalización, ultima la edición de cartafueyos con un llistáu de los nomes tradicionales de pueblos y aldegues que depués repartirá nos núcleos de población del conceyu p’alitar a los sos habitantes a qu’empleguen con normalidá los topónimos en llingua asturiana.

Según precisaron güei responsables de comunicación del Ayuntamientu de L.lena, los cartafueyos tán yá na imprenta y sedrán l’anticipu d’una segunda acción: Responsables municipales recorrerán los pueblos del conceyu pa comprobar sobro’l tarrén el grau de caltenimientu y les causes de la desapaición de los topónimos tradicionales, qu’agora quier recuperar el Consistoriu.

Gobernáu pol PSOE y pioneru xunta Llangréu na creación de servicios llocales de normalización llingüística, L.lena ye un de los 21 municipios que-y encamentaron hasta agora a la Xunta Asesora de Toponimia la so intervención pa rescatar y oficializar los nomes de llugar n’asturianu del conceyu.

El municipiu entamó, a primeros del pasáu mes de payares, una campaña propia de señalización en llingua asturiana del accesu por carretera a los pueblos, col asitiamientu de 25 cartelos indicadores d’entrada y salida a núcleos de población.

Un millón d’exemplares. La empresa pública Correos pondrá en circulación esa cantidá de sellos alusivos al XXV aniversariu de los Premios ‘Príncipe de Asturias’, que se cellebra’l prósimu mes d’ochobre. La estampa incorporará una illustración de la escultura de Joan Miró que se-yos entrega a los galardonaos p’acreditar el premiu.

Según informó güei la Fundación ‘Príncipe de Asturias’, entidá que vien convocando los premios homónimos dende l’añu 1981, el sellu conmemorativu saldrá a la venta a partir del mes d’ochobre, coincidiendo col aniciu’l gruesu de les cellebraciones del aniversariu de los galardones, qu’incluyirán conciertos, esposiciones y conferencies, ente otres actividaes.

Dende la creación de los premios ‘Príncipe’, hai agora 25 años, los unvíos postales que salen d’Uviéu nes feches prósimes a la ceremonia d’entrega de los galardones, que se cellebra na seronda nel teatru Campoamor, lleven un matasellos especial col emblema de la Fundación ‘Príncipe de Asturias’ y un testu alusivu.

El plazu pa presentar candidatures pa los premios ‘Príncipe’ 2005 pesllaráse con calter xeneral el prósimu 15 de marzu, sacante les categoríes de Concordia y Deportes, pa los que d’almitirán aspirantes hasta’l 29 de xunetu. La Fundación ‘Príncipe de Asturias’ reparte yá n’academies, universidaes, legaciones diplomátiques y centros d’investigación de tol mundu la convocatoria pa recibir candidatures a los ocho premios que fallará nos prósimos meses.

Mercar fruta o pidir un café, n’asturianu. L’Ayuntamientu de Xixón, al traviés de la Oficina Municipal de la Llingua, prepara una campaña p’alitar a los comerciantes de la ciudá a usar la llingua asturiana de forma habitual nos sos establecimientos, con cartafueyos y cartelos qu’espera poner en circulación antes del mes d’abril.

Asina lo precisó güei la responsable de la Oficina de la Llingua, María Xosé Rodríguez, quien avanzó que la campaña quier espardir l’usu del asturianu oral y escritu nes compres cotidianes de los ciudadanos y va centrase nel pequeñu comerciu. La iniciativa nun incluyirá, en principiu, facilidaes pa que los comerciantes retulen los sos negocios en llingua asturiana.

Con esta midida, que sigue la sienda d’actuaciones asemeyaes puestes en marcha hai años por otres entidaes de defensa del idioma, l’Ayuntamientu guiaráse por primer vegada na práctica poles conclusiones del reciente estudiu sociollingüísticu dirixíu pol caderalgu Francisco Llera Ramo nel conceyu, cuyos resultaos avanzáronse a mediaos d’avientu.

Nesa investigación, un 55 por cientu de los xixoneses encuestaos pide la denominación n’asturianu de productos y servicios en chigres, cafeteríes y comercios, y un 52 por cientu aboga por que l’asturianu tea presente nes cartes de los bares. Hai más desalcuerdu na conveniencia de los emplegaos usen l’asturianu nel so tratu col veceru: Un 42 por cientu de los xixoneses amuésase contrariu, frente a un 40 por cientu que ye favoratible.

Amás de la campaña pal pequeñu comerciu, la Oficina Municipal de la Llingua de Xixón prepara yá la segunda edición de los Alcuentros de la Mocedá cola Llingua, qu’aconceyarán a primeros de mayu nes instalaciones del Pueblu d’Asturies a estudiantes de Secundaria col asturianu como exe conductor d’estremaes actividaes.

Habrá consensu en puntos esenciales. El presidente’l PP n’Asturies, Ovidio Sánchez, avanzó güei que la so formación entrará dende yá na reforma del Estatutu d’Autonomía y buscará l’alcuerdu col restu de partíos representaos nel Parlamentu autonómicu, PSOE ya Izquierda Xunida-Bloque por Asturies. Socialistes y conservadores, que sumen 41 de los 45 diputaos na Xunta Xeneral, empezarán a negociar cola coficialidá de la llingua asturiana fuera de los sos planes.

La propuesta d’entendimientu cursada por Ovidio Sánchez ratifica la inminente apertura’l procesu de reforma del Estatutu, que l’asturianismu ve de forma unánime como una oportunidá decisiva pa que l’idioma asturianu resurda o desapaeza: Si’l nuevu testu estatutariu nun incorpora de forma espresa la coficialidá de la llingua asturiana, diagnostiquen llingüistes y espertos europeos, l’idioma dará un pasu definitivu p’hacia la estinción.

En principiu, la Federación Socialista Asturiana yá anunció -en boca de la conseyera de Cultura y vocera’l Gobiernu, Ana Rosa Migoya- que los socialistes opondránse a la coficialidá y apostarán por fórmules de mera promoción institucional del asturianu. El PP, pol so llau, acudirá a la negociación del nuevu Estatutu cola so postura tradicional roceana a apostar por una llingua que considera virtual y artificial.

Con esi panorama, sólo los cuatro parlamentarios d’Izquierda Xunida-Bloque por Asturies sofitaríen la declaración del asturianu como llingua coficial na renovación del Estatutu, una cifra enforma insuficiente -frente a los 41 diputaos de PSOE y PP- pa llevar alantre la oficialidá y que condiciona la capacidá de presión que tendrán nes negociaciones los socios de los socialistes nel Gobiernu’l Principáu.

Archivu. Migoya avanza que los socialistes opondránse a incluyir la coficialidá na reforma del Estatutu

La cultura abaratóse un 0,9 por cientu n’Asturies a lo llargo de 2004. L’Institutu Nacional d’Estadística (INE) constata que les tarifes de productos y servicios culturales contuvieron l’aumentu xeneralizáu de los precios nel Principáu -que medraron un 3,1 por cientu-, pesie al emburrión que les tarifes de la cultura sufrieron por mor de la campaña de navidá: N’avientu, aumentaron un 1,2 por cientu.

Esi foi, de fechu, l’únicu aumentu destacáu rexistráu n’Asturies el mes pasáu, lo que denota que los comerciantes gravaron especialmente los productos culturales en previsión de mayores compres nel periodu navidiegu. Con calter xeneral, los precios mantuviéronse casi inalterables n’avientu con respecto al mes anterior, yá que baxaron sólo una décima.

En contraste con eses cifres, el sector del ociu y la cultura revelóse como’l que más contuvo l’aumento de los precios n’Asturies a lo llargo del añu pasáu, una décima penriba de les comunicaciones -cuyes tarifes baxaron un 0,8 por cientu en 2004- y nel estremu opuestu a les bebíes alcohóliques, el tabacu, la vivienda y la hostelería, que rexistraron los mayores incrementos.

Con respecto al conxuntu d’España, los precios de la cultura reduxéronse más n’Asturies qu’en tol Estáu, yá que les tarifes nesta estaya baxaron nel global de toles comunidaes autónomes sólo una décima en tol añu pasáu, frente al 0,9 por cientu estimáu nel Principáu.

Datos íntegros na web del Institutu Nacional d’Estadística

Una nueva plataforma cívica pa vixilar la marcha de la política llingüística n’Asturies. Un grupu de ciudadanos representativos de parte de la cultura y la política, promovíu por persones ayenes al Gobiernu autonómicu pero dispuestes a collaborar con él, prepara la constitución d’un ‘Observatoriu de Política Llingüística’ que podría echar a andar antes de febreru.

La iniciativa sal de persones que, tando fuera del organigrama de l’Alministración autonómica, mantienen una vinculación -en términos de “llealtá”- col Gobiernu asturianu y amuésense dispuestes tanto a presionar al Executivu pa que desendolque la política llingüística prevista, como a ufrir el so conseyu nesta materia.

Según fontes presentes nos trabayos de constitución del nuevu collectivu, que prevé presentase formalmente nun plazu aprosimáu d’una selmana, l’observatoriu’ tará integráu por “xente preocupao pola marcha de la política llingüística” y naz col envís de ser lo más plural posible, polo que se plantega recabar la participación d’un númberu ampliu d’entidaes diverses.

La creación del ‘observatoriu’ produzse nun momentu d’especial efervescencia y de desalcuentros dientro l’abanicu asturianista: A la rellación distante que mantienen los responsables de l’Academia de la Llingua y la Oficina de Política Llingüística’l Principáu hai que-y sumar la coesistencia d’a lo menos cuatro collectivos en defensa del idioma, la veterana Xunta pola Defensa de la Llingua, el Conceyu Abiertu pola Oficialidá, l’asociación ‘Oficialidá’ y l’Ensame pa la Oficialidá de la Llingua d’Asturies, estos tres últimos creaos en 2004.

Esta mesma selmana escenificóse un nuevu episodiu de choque de criterios, al asoleyar l’Academia de la Llingua, nel so boletín, la ruptura de “toa collaboración” col selmanariu ‘Les Noticies’, la única publicación durable en papel que vien editándose dafechu en llingua asturiana.

Nun hai intención de retrucar. El director del selmanariu ‘Les Noticies’, la única publicación periódica durable en papel que vien editándose en llingua asturiana, declara la so “perplexidá” énte la desautorización de l’Academia de la Llingua -que ruempe toa collaboración col diariu acusándolu de “galleguista” y faltu de rigor-, pero avanza que nun habrá rempuesta qu’alimente una posible engarradiella.

Asina, Ramón Lluis Bande, responsable de redacción de ‘Les Noticies’, emplegó’l dichu “dos nun se peguen si ún nun quier” y aseguró güei que’l periódicu que dirixe “nun tien nada que decir” al duru testu asoleyáu pola Academia y precisó que “la simple esistencia” d’esi comunicáu cáusa-y perplexidá.

Y esa sensación d’ablucamientu ye más fonda, según Bande, pola falta de previsión o antecedente dalu que-yos ficiere barruntar a los responsables del selmanariu un pronunciamientu como’l que manifiesta l’Academia nel so boletín del mes d’avientu, distribuyíu por corréu ordinariu depués de la festividá de Reis Magos.

‘Les Noticies’ edítase dende l’añu 1996 con periodicidá selmanal, frutu de la iniciativa personal del empresariu Inaciu Iglesias y en collaboración mercantil col diariu ‘El Comercio’, en cuyos talleres s’imprime la publicación. Na so páxina web, el selmanariu en llingua asturiana declara una tirada de 7.500 exemplares y asegura que llega a 20.000 llectores.

Archivu. L’Academia de la Llingua ruempe toa collaboración col selmanariu ‘Les Noticies’ pola so llinia “galleguista”