Sociedá

La Oficina de Política Llingüística de la Conseyería de Cultura recibió esti viernes 11 la solicitù formal del Ayuntamientu d’Uviéu pa que s’inicie l’espediente de revisión de la so toponimia. El conceyu qu’agospia la capital administrativa d’Asturies conviértese asina nel primeru de la so importancia en sumase a la cada vez más amplia lista d’ayuntamientos que ponen en manes de la Xunta toponímica la correción de los sos nomes de llugar.

Uviéu, el conceyu más importante que gobierna’l Partíu Popular, ye dende esti viernes 11 ún más de los que quieren ver iguaos los sos topónimos. Asina lo anunció la Oficina de Política Llingüística el mesmu día nel que se recibió nel rexistru de la Conseyería de Cultura la solicitú del consistoriu carbayón pa entamar l’espediente toponómicu del conceyu.

Una vez recibía la solicitú del Ayuntamientu que preside Gabino de Lorenzo la Xunta de Toponimia entamará l’espediente de revisión de los nomes de llugar d’Uviéu col fin de satisfaer la pitición del conceyu y una vez concluíu el so llabor unviará l’espediente resueltu al Conseyu de Gobiernu del Principáu pa la aprebación y oficialización de les denominaciones igüaes.

El testu de les ordenances pa la normalización del usu del asturianu nel Ayuntamientu de Xixón elaboráu pola Oficina Municipal de la Llingua y el so Conseyu Asesor nun cuenta col preste del grupu socialista que gobierna en coalición con Izquierda Xunida-Bloque por Asturies. Los representantes del PSOE nel gobiernu del conceyu manifestaron a los sos socios de pactu el so desalcuerdu con un testu qu’a xuiciu de los socialistes “implicaría la oficialidá de fechu”.

En declaraciones a Asturnews, Roberto Colunga, secretariu xeneral del Bloque por Asturies y representante na Fundación Municipal de Cultura de Xixón, amosó el so disgustu y el so desconciertu ente la negativa del PSOE n’admitir unes ordenances “que tán calcaes de les que sí admiten los sos compañeros de partíu n’otros conceyos como Uviéu y L.lena”. El grupu municipal socialista al través de la propia alcaldesa treslladó a la conceyal de llingua y cultura asturianes Carmen Rúa l’encamientu de que se camudaran dalgunos artículos d’estes ordenances p’admitiles y recordó-y que la iniciativa de la Oficina nun taba contemplada nel pactu de gobiernu.

Pal representante del Bloque nel grupu municipal d’IX-BA, Roberto Colunga, la situación agora ye “difícil d’entender, nun hai una negativa en redondo del PSOE, pero refuguen aceptar tal como tán estes ordenances que tan aprebaes pol Conseyu Asesor de la Oficina municipal. Con esta negativa de los socialistes les ordenances pal usu del asturianu n’administración del conceyu xixonés vuelven a la vía muerta onde tán desque fueron entregaes pola Oficina de la Llingua a tolos grupos municipales pal so estudiu.

La conceyala Carmen Rúa manifestó a Asturnews que la negativa de los socialistes espresada pola alcaldesa Paz Fernández Felgueroso ye “a les ordenances en xeneral,acepten lo referío a publicidá y usu del asturianu en publicaciones pero tolo que se refier al drechu de los ciudadanos a comunicase y recibir comunicación nel conceyu en llingua asturiana recházase de plano”. Al igual que’l so compañeru de grupu municipal Roberto Colunga, Rúa señaló la incoherencia de los socialistes en refugar unes ordenances que “los sos propios compañeros nel Ayuntamientu d’Uviéu nos pidieron pa presentales ellí y que tán negociando col alcalde Gabino de Lorenzo”. La conceyala encargada de la Oficina Municipal de la Llingua señaló qu’hai una entrevista solicitada cola alcaldesa pa tratar de desbloquear la situación y entamar una negociación pa buscar soluciones al empantanamientu de les ordenances.

La Xunta pola Defensa de la Llingua Asturiana valoró perpositivamente la respuesta ciudadana a la convocatoria unitaria en demanda de la oficialidá celebrada esti sábadu 5 y considérala un exemplu “del camin a siguir sumando más voluntaes” a la llucha pola reconocencia de los drechos llingüísticos del pueblu asturianu. La organización cívica fexo esta valoración nuna reunión celebrada ayer n’Uviéu na que s’alcordó tamién potenciar el trabayu de la Xunta nel Conceyu Abiertu pola Oficialidá en vista del ésitu de la so primer movilización social.

El portavos de la Xunta pola Defensa de la Llingua, Xulio Casado reconoció que delles voces dientro’l movimientu pola reivindicación llingüística “yeren pesimistes y duldaben de que la manifestación del 5-M fuere a tener l’apoyu social qu’al final se consiguió”, por eso la importante respuesta d’organizaciones y persones a la convocatoria (más de cinco mil, según les estimaciones más realistes) supón pa la Xunta “una reconocencia del trabayu desenvueltu pol Conceyu Abiertu pola Oficialidá” y la confirmación de que la plataforma unitaria “ta nel camín acertáu, y nesi ye nel qu’hai de siguir en vista del ésitu de la manifestación del sábadu”.

Otra de les valoraciones positives que fai la organización en defensa de los drechos llingüisticos “foi el fechu de que se xuntaran detrás de la mesma pancarta xente y organizaciones estremaos, en dellos casos completamente estremaos y esa ye una de les razones que nos enfota nel camín entamáu dende’l Conceyu Abiertu”. La repercusión mediática de la manifestación del sábadu, que consiguió se portada de los principales diarios impresos d’Asturies,tamién foi valorada prestosamente na reunión de la Xunta celebrada ayer.

Tocante al mensaxe dirixíu a los partíos políticos con responsabilidá na prósima reforma del estatutu que se quiso tresmitir cola movilización del 5-M, el portavoz de la Xunta pola Defensa de la Llingua resúmelu afirmando que “esos partíos tienen de tomar bona nota de qu’hai una voluntá clara y mayoritaria na sociedá asturiana que respalda la oficialidá”.

Dientro d’unos diez díes el Conceyu Abiertu pola Oficialidá va reunise pa facer la so propia valoración de la convocatoria del 5 de marzu y decidir les prósimes llinies d’acción de la plataforma. Pela so parte la so organización matriz, la Xunta trabaya ya na preparación de les cites reivindicatives del conciertu pola oficialidá del 23 d’abril y la manifestación del Día de les Lletres.

El secretariu xeneral del Bloque por Asturies, Roberto Palacios, admitió en declaraciones a Asturnews la posibilidá real de qu’una negativa radical del PSOE a incluyir una vía a la oficialidá na prósima reforma del Estatutu había llevar a la so organización a replantease la so presencia nel gobiernu autonómicu: “Ye una situación que puede dase y cuido que la base de la organización taría d’alcuerdu cone ella”. Colunga fai esta recordanza dos díes después de celebrase una masiva manifestación n’Uviéu en demanda de la reconocencia oficial pa la llingua asturiana. La respuesta unitaria de tol asturianismu a la convocatoria del 5-M supón pal secretariu del Bloque “un puntu de partida bien positivu p’avanzar na defensa de los drechos llingüísticos”.

La xuntura de los diversos sectores enfrentaos del movimientu asturianista alrodiu de la marcha convocada pol Conceyu Abiertu pola Oficialidá merez-y al Bloque por Asturies “una valoración mui positiva en cuantes representa un mensaxe claru a avanzar nel camin de la oficialidá y la llingua dexe de ser un elementu de disputa o un arma arroxadiza pa convertise nun elementu de xuntura”.

Respective a la percepción por parte de la FSA del mensaxe tresmitíu cola numberosa participación na marcha del 5-M, Roberto Colunga afirma que “cuando diez mil o siete mil persones salen a la cai desixendo dalgo cualquier partíu nel gobiernu había de tenelo bien en cuenta, ye como pa pensalo, nun se puede dar les espaldes a lo que plantega una parte importante de la sociedá”. Sicasí el secretariu xeneral del Bloque por Asturies ve con enfotu los cambios que pueden llegar a producise nun futuru prósimu:”Nun hai nengún argumentu de pesu pa oponese a la oficialidá y por eso lo normal ye que nun se mantengan eternamente posiciones cerraes en redondo que nun se sostienen soles con nengún argumentu”.

Preguntáu si podía tener consecuencies nel apoyu del Bloque al gobiernu el caltenimientu de les postures inmovilistes del PSOE na prósima reforma l’Estatutu, el representante de la organización nacionalista foi claru: “La oficialidá nun ta contemplada nel pautu de gobiernu y vamos ser lleales al alcuerdu firmáu, a la vez nun entenderíamos que’l PSOE se negase a admitir la posibilidá d’abrir una vía a la oficialidá na reforma l’Estatutu y eso podía tener consecuencies polítiques, por exemplu que nos planteáramos siguir tando nel gobiernu”, pa Colunga ye “una posibilidá que puede dase y cola que la nuestra militancia taría d’alcuerdu”.

Tocante a la valoraciòn que fai el Bloque del recién aprebáu Plan de Normalización Social, Colunga afirmó que “inda somos conscientes de les limitaciones que puede tener el plan paeznos un saltu importante na normalizaciòn del asturianu y sobre too el que se concrete en detalle cada midida del plan”. L’oxetivu pal Bloque respective al Plan “ye que se cumpla al 100 por cien nel plazu previstu d’esta lexislatura”.

Varios miles de manifestantes desafiaron esti sábadu al temporal qu’azota Asturies dende hai díes pa desixir a los partíos políticos representaos na Xunta Xeneral la inclusión de la oficialidá pa la llingua asturiana na inminente reforma l’Estatutu. La convocatoria del Conceyu Abiertu pola Oficialidá llogró xuntar alrodiu de la mesma reivindicación a tolos sectores del dividíu movimientu asturianista nuna marcha unitaria pola reconocencia de los drechos llingüísticos de los asturianofalantes.

La oficialidá ye un ‘oxetivu irrenunciable’ pal movimientu ciudadanu que llucha dende hai años pola salvaguarda de la llingua asturiana. Asina lo declaraba’l comunicáu del Conceyu Abiertu pola Oficialidá que lleó al final de la manifestación l’actor José Antonio Lobato y que sofitaben más d’ochenta organizaciones polítiques, sociales y culturales.La reivindicación hestórica del movimientu en defensa de la llingua asturiana volvía a salir a la cai en forma de manifestación masiva pa recordar a los partíos políticos responsables de la prósima reforma estaturaria “la desixencia de reconocer los derechos llingüísticos de los asturianofalantes nun marchu llegal dignu”, afirmaba’l comunicáu lleíu pol actor de la compañía Margen.

La convocatoria llogró un ampliu respaldu ciudadanu al pesar de la climatoloxía adversa y les postures qu’enfrenten a los estremaos sectores del movimientu asturianista. La cifra de manifestantes ye diversa según les fontes: alrodiu de 10.000 persones pa los organizadores y alrodiu de 2.000 según la Axencia EFE. Una cifra más averada a la realidá na que coincidíen otres fontes asitiaríase ente los 5.000 y 7.000 manifestantes, un apoyu ciudadanu que’l movimientu en defensa de la llingua asturiana nun algamaba en protestes asemeyaes dende los díes del Pautu pola Oficialidá y l’Autogobiernu entamáu pola anterior reforma estatutaria.

En dalgunos momentos de la marcha percibióse una tensión latente ente los manifestantes xuntaos pol Conceyu Abiertu y un pequeñu garrapiellu que llanzaba conseñes contra miembros de la coalición de gobiernu presentes como’l conseyeru Francisco José García Valledor o la diputada d’Izquierda Xunida Noemí Martín. Nel ambiente latía tamién el malestar de los organizadores y manifestantes énte convocatoria paralela pal mesmu día, hora y sitiu fecha pol Ensame pa la Oficialidá al través d’unos cartelos inxuriosos contra responsables del gobiernu autonómicu y l’aparición en foros de mensaxes nos que s’anunciaben “sorpreses” na manifestación. A la fin, la marcha, encabezada por una pancarta tres la que diben figures de la vida cultural asturiana como’l cantante Chus Pedro, Ramón Blanco de Los Berrones, l’actor José Antonio Lobato y políticos como Francisco José García Valledor o Jésús Iglesias, d’Izquierda Xunida, Xuan Xosé Sánchez Vicente, del Partíu Asturianista, y dellos representantes de la URAS, xunta a partíos minoritarios del ámbitu asturianista y nacionalista, trescurrió ensin incidentes.

Una visión particular de la manifestación por Quique Faes

L’Observatoriu de Política Llingüística aconceyóse esti xueves 3 n’Uviéu pa estudiar y valorar el Plan de Normalización aprobáu pol gobiernu autonómicu. La posición oficial d’esti organismu independiente va dase a conocer nun comunicáu nos prósimos díes, inda la llectura que se fai del documentu de Cultura ye positiva, según adelantró Cheni Uría, miembru d’esti grupu de trabayu: “Depués de munchos años de desconfianza énte l’actitú de los gobiernos, alcontramos esperanzador esti Plan pa facer coses concretes y qu’abre munches posibilidaes pa la normalización si realmente se lleven a cabu”, afirmó Uría. Una de les funciones del Observatoriu ye precisamente la de vixilar que les midíes del Plan s’executen y avancen.

El grupu de trabayu independiente reunióse ayer n’Uviéu pa estudiar el Plan de Normalización Social y va a dar a conocer públicamente la so valoración nos prósimos díes nun comunicáu consensuáu ente tolos miembros del Observatoriu presentes nel conceyu. Según pudo saber Asturnews, esta valoración xeneral del documentu del gobiernu ye positiva pa esti organismu independiente y abiertu nel que tán integraes distintes persones del ámbitu cultural y social asturianu, amás d’espertos como’l profesor Francisco Llera Ramo o el miembru del Comité Internacional pa la Salvaguarda de los Drechos Llingüísticos d’Asturies, el catalán Ignaci Vila.

Como elementos negativos de la situación na que se va desenvolver esti documentu d’acciones del gobiernu, l’Observatoriu señala, según afirmó Cheni Uría “la división cada vez más enquistada del movimientu reivindicativu, convertida ya nuna especie de guerra de guerrilles” y tamién el tratamientu mediáticu col que s’enfoca’l Plan “resaltando los aspectos que pueden aparentar polémicos pa esos medios y non les partes positives qu’ufierta’l plan pa superar barreres na normalización social de la llingua asturiana”.

Una de les razones nes que los miembros del Observatoriu atoparon positivu’l documentu ye, en palabres d’Uría :”el fechu de que cada acción programada cuente cola so asignación presupuestaria, lo que supón de por ello un elementu de concreción y de que va executase”. Esti organismu independiente alcordó tamién nel so conceyu siguir aconceyando periódicamente pa vixilar el cumplimientu de les midíes normalizadores conteníes nel Plan de Normalización Social 2005-2007.

La organización de la marcha pola oficialidá del cinco de marzu espera que miles de ciudadanos la apoyen cola so presencia peles cais d’Uviéu. COnvocada pol Conceyu Abiertu pola Oficialidá y sofitada por casi un cientu d’organizaciones sociales, polítiques y culturales, la manifestación tien por oxetivu encamentar a los partíos representaos na Xunta Xeneral la necesidá irrefugable de que la prósima reforma estatutaria recueya la oficialidá pal asturianu. Ente los apoyos recibíos estos díes destaca’l de l’Academia de la Llingua.

El respaldu de la institución llingüística a la marcha del 5-M féxose esplícitu cola presencia del académicu Carlos Lastra na rueda de prensa de llamáu a la participación ciudadana nesta convocatoria pola oficialidá. Ye la primer vez que l’Academia apoya d’una manera tan clara una manifestación asemeyada. Carlos Lastra lleó una carta na que la institución manifestaba’l so respaldu a la marcha del Conceyu Abiernu pola Oficialidá y espresaba’l so deséu de qu’algame un gran ésitu de participación. La marcha cuenta tamien col sofitu de figures resaltables de la vida pública asturiana como’l ciclista Chechu Rubiera, la escritora Carmen Gómez Ojeda o el cantante Victor Manuel.

El portavoz de la Xunta pola Defensa la Llingua nel Conceyu Abiertu, Xulio Casado, aprovechò la rueda de prensa pa desmarcar a la organización de la convocatoria parelela fecha pol llamáu Ensame pola Oficialidá pal mesmu día, sitiu y hora. Unos díes enantes el CAO emitiera un comunicáu nel que denunciaba esta convocatoria non autorizada y los cartelos ofensibles nos que se publicitaba.

La Conseyería de Cultura destina 30.000 euros pa la promoción de la música n’asturianu al través de subvenciones a la edición fonográfica y 20.000 euros empobinaos a la produccion d’actividaes cinematográfiques. La convocatoria vien a sumase a les publicaes estos últimos díes nel campu de la creación en castellano y de la lliteratura en llingua asturiana y gallegu-asturianu.

Les ayudes a la edición fonográfica destínense a proyectos musicales nos que la presencia del asturianu o del gallegu-asturianu seya d’a lo menos un 80% nes pieces rexistraes y nos que se valorará la calidá artística, interés cultural y social, y la corrección llingüística de los testos. Pa estes actividaes el total consignáu nos presupuestos de la Conseyería ye de trenta mil euros.

Tocante a les ayudes económiques dirixíes a particulares y asociaciones ensin ánimu de lucru pa la realización d’actividaes cinematográfiques y de videu, de calter creativu, valoraránse los proyectos teniendo en cuenta l’usu vehicularde la llingua en tola obra y na so presentación esterna, amás de la so correción idiomática, calidá artística y interés social. Queden escluyíes d’esta llinia d’ayudes les producciones que nun incorporen a costa fecha l’usu predominante de la llingua o que contengan únicamente música, como nel casu de los video-clips. El total d’estes ayudes a la creación cinematográfica ye de venti mil euros, a cargu de los Presupuestos Xenerales del Principáu.

La presidenta de l’Academia de la Llingua Ana Cano reivindicó el trabayu y les competencies propies de la másima institución llingüística asturiana en materia de toponimia nel actu de presentación del mapa d’Asturies y los sos conceyos. Aludiendo a los llabores de l’actual Xunta de Toponimia Cano foi clara: “nenguna otra institución pue atribuyise, suplantar o amenorgar les competencies que la llei da a l’Academia” afirmó.

La presentación del mapa publicáu pola institución foi énte too una recordanza de la xera desenvuelta pola Academia dende los sos inicios en materia de recuperación toponímica y un avisu contra cualaquier intentu de cuestionar la so autoridá normativa nesti asuntu. Nun discursu cargáu de referencies temporales y documentales desque se formó en 1985 la primer Xunta de Toponimia, Ana Cano apoyóse nes diverses disposiciones llegales que señalen les competencies de l’Academia, pa xustificar l’abandonu del actual grupu de trabayu que lleva a cabu les xeres de recuperación toponímica.

Faciendo membranza de los anteriores intentos d’emprimar esti llabor per parte de los distintos gobiernos autonómicos afirmó: “a lo llargo d’estos venti años y munches hores de trabayu nin un solu topónimu del Principáu, nin unu solu, llogró aportar al Conseyu de Gobiernu de turnu p’algamar el preste que riquía pa ser oficial”.

Nun tonu más contundente y emocional, l’ex presidente García Arias -que declaró falar a títulu personal y en calidá de la so esperiencia en toles xuntes frustraes- quiso llamar l’atención sobro los verdaderos motivos, al so xuiciu, que puen facer zapicar l’actual Xunta: “nun se trata de meres discrepancies alrodiu de los topónimos”, manifestó rotundu: “puede tar tratándose de crear una estructura paralela a l’Academia, una Anti-Academia de la Llingua”. Ensin entrar a valorar la capacidá de los espertos en filoloxía de la Xunta de Toponimia García Arias cuestionó el que nun se tenga en cuenta l’autoridá de criteriu de l’Academia y tol llabor desenvueltu pola institución nesti campu.

En referencia a los responsables de la Conseyería de Cultura foi especialmente duru col xefe de la Oficina de Política Llingüística al que calificó de “fondamente deslleal” y de la so designación pal cargu dixo que “nun podía falase de diálogu poniendo como interlocutor a una persona qu’una de les partes nun considera idóneu pa dialogar”. Siempre falando a títulu personal, García Arias tamién tuvo palabres pa la conseyera Ana Rosa Migoya a la que encamentó “reflexonar y estremar lo que ye normalización y normativización” y qu’en materia d’esto último la única institución competente yera l’Academia.

La comparecencia de los académicos nun abarrotáu salón d’actos de Cajastur vien a escenificar un nuevu episodiu del desalcuentru frontal que la institución llingüística y la Conseyería de Cultura caltienen dende l’empiezu de la lexislatura del gobiernu presidíu por Areces y frutu del pautu algamáu colos sos socios d’Izquierda Xunida y Bloque por Asturies. La confrontación produzse nun momentu nel que l’executivu autonómicu acaba aprebar el so Plan de Normalización -refugáu pola Academia- y ta a puntu de dar validez oficial a les primeres revisiones toponímiques de los conceyos.

El boletín oficial de l’Academia de la Llingua, Lletres Asturianes, llega al so númberu 88 con una nueva entrega na que resalten los trabayos comparativos de Paquita Suárez Coalla alrodiu de les asemeyances ente l’español nos Estaos Uníos y l’asturianu, y otru de Moisés Selfa sobro los procesos de normativización de la nuestra llingua y del catalán. Como ye avezao, na revista nun falten referencies y documentación a propósitu de l’actualidá sociollingüística d’Asturies.

El númberu 88 de la revista académica ábrese con un editorial nel que la institución fai membranza de les recomendaciones del Comité Internacional pa la Salvaguarda de los Drechos Llingüísticos n’Asturies, ente elles la desixencia de la oficialidá y piésllase nel so capítulu d’anuncies cola publicación de los documentos elaboraos pola Academia alrodiu d’estes recomendaciones. Otros fechos como’l posicionamientu de la institución énte la reforma estatutaria o énte’l Plan de Normalización de la Llingua Gallega, no que cinca a les sos pretensiones na nuestra comunidá, apaecen documentaos nesti apartáu.

Polo que respeta a los conteníos estrictamente filolóxicos, tien de destacase l’artículu ‘Llingües marxinaes: lliteratura y clase social. La esperiencia común de los hispanos nos Estaos Uníos y de los asturianos n’España’ de la profesora de la Universidá pública de Nueva York Paquita Suárez Coalla. Tamién l’estudiu comparáu de Moisés Selfa Sastre: ‘La autoridad lingüística y normativa: la funciónde la Academia de la Llingua Asturiana y de l’Institut d’Estudis Catalans’.

El conteníu del últimu Lletres complétase con trabayos de Xosé Lluis García Arias, Xosé Miguel Suárez Fernández, Esperanza Mariño Dávila y Rafael Domínguez Valdés, ente otros. Les tradicionales secciones de notes y anuncies, y de reseña de publicaciones n’asturianu rematen esta nueva entrega de la revista académica.