Uviéu pide oficialmente la normalización de la so toponimia

La Oficina de Política Llingüística de la Conseyería de Cultura recibió esti viernes 11 la solicitù formal del Ayuntamientu d’Uviéu pa que s’inicie l’espediente de revisión de la so toponimia. El conceyu qu’agospia la capital administrativa d’Asturies conviértese asina nel primeru de la so importancia en sumase a la cada vez más amplia lista d’ayuntamientos que ponen en manes de la Xunta toponímica la correción de los sos nomes de llugar.

Uviéu, el conceyu más importante que gobierna’l Partíu Popular, ye dende esti viernes 11 ún más de los que quieren ver iguaos los sos topónimos. Asina lo anunció la Oficina de Política Llingüística el mesmu día nel que se recibió nel rexistru de la Conseyería de Cultura la solicitú del consistoriu carbayón pa entamar l’espediente toponómicu del conceyu.

Una vez recibía la solicitú del Ayuntamientu que preside Gabino de Lorenzo la Xunta de Toponimia entamará l’espediente de revisión de los nomes de llugar d’Uviéu col fin de satisfaer la pitición del conceyu y una vez concluíu el so llabor unviará l’espediente resueltu al Conseyu de Gobiernu del Principáu pa la aprebación y oficialización de les denominaciones igüaes.