Sociedá

Les xornaes “Llingua, clase y sociedá” qu’organiza’l Seminariu d’Historia Contemporánea de la Universidá d’Uviéu preséntense esti miércoles 1 nel Club Prensa Asturiana cola presencia de los coordinadores del congresu, Rubén Vega y Xulio Viejo. El seminariu va celebrase del 27 al 30 de marzu na Facultá de Xeografía y Hestoria con participación d’especialistes provenientes de diverses universidaes.

Les xornaes van centrase en debatir les relaciones hestóriques y de calter sociollingüísticu ente’l movimientu obreru y la izquierda asturiana respective a la realidá cultural propia del país. El tratamientu dau pol pensamientu marxista a la diversidá nacional y llingüística, los movimientos del poder nel estáu español tocante al centru y la periferia o el bagaxe ideolóxicu del asturianismu son otros de los asuntos que van tratase nes xornaes, xunto a la visión de realidaes nacionales prósimes como les de Galicia o el País Vascu.

La cuota d’inscripción pal seminariu ye de 30 euros y ha facese una tresferencia nel númberu de cuenta 2048 0077 5 2 034003587 de caxAstur, Teatinos-Uviéu, faciendo constar la referencia “Seminariu Llingua, clase y sociedá”. Ha unviase’l resguardu bancariu d’ingresu a la Secretaría del Seminariu antes del 24 de marzu del 2006, axuntando col boletín d’inscripción, la fotocopia’l DNI. Les señes de la Secretaría del Seminariu “Llingua, clase y sociedᔠson : Seminariu d’Historia Contemporánea, Facultá d’Historia y Xeografía , Universidá d’Uviéu, c/Teniente Alfonso Martínez, s/n, 33011 Uviéu.

El coordinador local d’Izquierda Xunida d’Avilés y primer teniente d’alcalde nel consistoriu José Fernando Díaz Rañón retruca a les declaraciones feches pol alcalde socialista Santiago Rodríguez Vega tocantes a la llingua asturiana. Nes sos declaraciones el rexidor avilesín afirmaba que la cuestión llingüística nunca fuera motivu de tensión nel equipu municipal con IX, un estremu que desmiente Rañón.

En manifestaciones al mesmu mediu onde Rodríguez Vega faló, el responsable local d’Izquierda Xunida afirma que l’asturiano fue en múltipls ocasiones motivu de discrepancia colos socialistes y tocante a la política llingüística entamada polos socios de gobiernu d’IX, Díaz Rañón manifiesta que «choca colo que consideramos necesario». Tocante a les tensiones por esa materia nel senu del equipu municipal, el primer teniente d’alcalde dixo: “claro que les hubo y munches, lo que pasa ye que nun salieron a la lluz”.

José Fernando Díaz Rañón contestaba asina a les palabres del alcalde Santiago Rodríguez Vega publicaes nel diariu El Comercio del domingu 27 nes qu’ente otros asuntos declaraba que pidir la oficialidá yera “forzar sentimientos que nun son reales n’Asturies”.

La organización rexonal de Nuevas Generaciones de Castiella y Lleón acaba de poner en marcha una campaña contra los idiomes cooficiales del estáu na que s’afirma que la xente mozo de la comunidá vecina ta dicriminao nel so accesu a la función pública “por mor de la so llingua”. La campaña sofítase nun cartelu nel qu’un rapaz pon la oreya con xestu d’estrañeza al llau de la llienda: ¿Ho entens?” (“¿entiéndeslo?” en catalán).

Nel documentu que desenvuelve’l planteamientu de la campaña entamada poles mocedaes del PP afírmase qe “los ciudadanos castellanos y lleoneses tenemos vedáu l’accesu a puestos na función pública nes comunidaes que cuenten con llingua propia” y que, poro, “tamos discriminaos nel accesu a la función pública, non namás nes comunidaes que tienen llingua propia sinón en tol territoriu nacional”. La razón d’esa supuesta discriminación xeneralizada ye que, según afirmen los autores del documentu, vense “obligaos a competir con aspirantes qu’ostenten una esperiencia acumulada en puestos a los que los castellanos y lleoneses tienen vedáu l’accesu por mor de la so llingua”.

Al pesar de que na comunidá de Castiella y Lleón se falen, amás del castellano, otres dos llingües propies, como l’astur-lleonés y el gallego, Nueves Xeneraciones nun recueye en dayures la so campaña esti fechu y plantéase como una campaña de sofitu a la recoyida de firmes contra’l nuevu estatutu catalán entamada en tol estáu pol Partido Popular (PP).

Contra la “imposición” de la lengua cooficial Los autores del Manifiesto reclaman que para acceder a los puestos de la administración pública “únicamente sea exigible y valorable el conocimiento de la lengua española”; que en las comunidades con lengua propia “sea la administración contratante la que asuma la enseñanza de dicha lengua”; “que se respete el derecho de los trabajadores de la administración pública a expresarse en sus funciones internas en lengua española, sin imponerles la obligación del uso de ninguna lengua cooficial”.

El pasáu vienres 24 de febreru presentóse na Casa Cultura de L’Entregu, el Conceyu Abiertu pola Oficialidá, una organización qu’axunta asociaciones culturales, sociales,sindicales y polítiques pa trabayar en comuña por consiguir que l’Estatutu d’Autonomía d’Asturies reconoza al asturiano como llingua oficial.

Nel actu tuvieron presentes persones d’estremaos ámbitos de la cultura, como ye’l casu de los profesores Severino Antuña y Pablo Xuan Manzano, los músicos Chus Pedro Suárez y Manolo Peñayos, el director teatral Roberto Corte, y los escritores Chechu García, Xulio Arbesú, Xurde Álvarez, Henrique Facuriella, Pablo Rodríguez Medina y Vanessa Gutiérrez.

Precisamente va ser esti conceyu del Nalón el qu’acueya l’entamu de la Caravana pola Oficialidá que va tener llugar el prósimu sábadu día 4, col envís d’informar y concienciar a los ciudadanos de la necesidá de la oficialidá de la llingua asturiana, que ye un patrimoniu de tolos asturianos al qu’hai que dar la dignidá que merez.

Echa a andar la ‘Caravana pola Oficialidá’

El sábadu día 4 de marzu va echar a andar nel conceyu de Samartín del Rei Aurelio la Caravana pola Oficialidá, una iniciativa del CAO que tien intención de recorrer Asturies afondando na implicación de la ciudadanía na reivindicación llingüística. Los actos van entamar dende pela mañana, con una caravana de coches que van recorrer el valle del Nalón dende La Felguera hasta La Pola informando ente los ciudadanos de la necesidá d’oficialidá pa la llingua asturiana, y remátase con un actu nel Teatru Municipal de L’Entregu con un actu nel que van participar los grupos Tuenda y Nuberu, ente otros.

Ta previsto qu’a les once la mañana del sábadu día 4 de marzu una caravana de vehículos aconceyaos a tala fin na Estación d’Autobuses de La Felguera eche andar recorriendo les principales localidaes del valle informando ente los ciudadanos de la necesidá d’oficialidá pa la llingua asturiana na prósima reforma del Estatutu d’Autonomía.

L’actu central de la caravana va tener llugar a les siete la tarde del sábadu nel Teatru Municipal de Samartín del Rei Aurelio, en L’Entregu, con un programa d’actuaciones nel que van participar la Banda de Gaites Rei Aurelio; dalgunos escritores del grupu Reciella Malory; el grupu folclóricu y etnográficu “L’Esperteyu”; el coru d’escolinos “Y los del Bosquín” dirixíu pol cantante Carlos Rubiera; el monologuista Cellero; y que va rematar cola actuación de los grupos Tuenda y Nuberu.

L’alcalde d’Avilés Santiago Rodríguez Vega sumóse esti domingu 26 a les declaraciones públiques de cabezaleros socialistes contra la reconocencia oficial de los derechos llingüísticos asturianos. Nuna entrevista concedida al diariu El Comercio el rexidor avilesín afirma que la desixencia de la oficialidá ye “forzar sentimientos de la sociedá asturiana y crear situaciones que nun son reales”.

Rodríguez Vega manifiesta el so enfotu en qu’Izquierda Xunida nun “faga caballu de batalla” de la reivindicación del asturiano como llingua oficial nel procesu de negociación del nuevu Estatutu ya que, al so entender: “nun se pueden forzar posiciones” y, pal alcalde d’Avilés: “Izquierda Unida tien derechu a manifestar la so opinión y los socialistas tenemos la nuestra, que respuende a que nun hai un sentimientu na sociedá asturiana nel sentíu d’esixencia d’oficialidá del asturianu, qu’hai que respetalo y promocionalo, pero nun hai que forzar sentimientos y situaciones que nun esisten”, afirma na entrevista.

Va unos díes Santiago Rodríguez Vega ya amosara la so posición poco favorable a la llingua asturiana cuando declaró al semanariu Les Noticies que la política llingüística nun yera una prioridá de la so acción de gobiernu al frente del Ayuntamientu d’Avilés, onde caltién el conceyu col sofitu d’Izquierda Xunida.

El Bloque por Asturies amosóse sorprendíu y afirma ver con esmolición la propuesta llanzada pol cabezaleru d’Izquierda Xunida Jesús Iglesias na qu’apostaba pola inclusión d’una oficialidá ensin obligatoriedá, una fórmula que los socios nacionalistes de la coalición tildaron de “vegoñante”. Iglesias tamién emponderó l’últimu informe de la FSA sobre la reforma estatutaria, al que calificó de “acertáu”

Díes después de que la parlamentaria d’Izquierda Xunida Paloma Uría garantizase al Conceyu Abiertu pola Oficialidá el compromisu de la so formación cola oficialidá, el másimu responsable políticu de la coalición n’Asturies, Jesús Iglesias espurría una propuesta pa inxertar una fórmula nel nuevu estatutu que favoreciese los derechos llingüísticos de los astur-falantes ensin qu’ello significare el conocimientu obligatoriu n’Adminstración.

La reacción per parte del Bloque por Asturies nun se fizo esperar y nel so retruque a Iglesias, los nacionalistes llegaron acusar a los sos socios de coalición electoral d’utilizar “los mesmos argumentos falaces” que la FSA al falar de imposición y obligatoriedá.

La celebración esti llunes 21 del Día Internacional de la Llingua Materna pola UNESCO dio pie al organismu mundial pa llanzar un mensaxe pol peligru d’estinción nel que s’alcuentren anguaño más de la mitá de los idiomes del mundu. La UNESCO asitia al asturiano-lleonés, xunto al aragonés, el gaélico irlandés y el bretón, como les llingües más amenazaes d’estinción del continente européu.

El director xeneral del organismu mundial, Koichiri Matsura, dio a conocer datos que confirmen una intensificación nel procesu de desaparición de les llingües. Según les sos propies palabres: “en promedio, desaparez una llingua cada dos selmanes”, dixo’l cabezaleru de la UNESCO, en París, citando el informe “Hacia las sociedades del conocimiento”, publicáu en payares de 2005.

Los datos remanaos pola UNESCO caltienen que nun futuru cercanu van desaparecer 700 idiomes nel continente americanu, 200 n’Africa, 80 n’Asia y 40 n’Europa. Ente les llingües que s’alcuentren en riesgu d’estinción tán la provenzal (occitanu) y bretona (Francia); asturiana-lleonesa y aragonesa (España); gaélica (Irlanda), y mataco y guarayo (Bolivia), ente otres.

L’informe sobre Los europeos y les sos llingües dau a conocer esti martes 21 pol Eurobarómetro de la Comisión Europea escaez la esistencia de la llingua asturiana y caltién datos como que’l 89 por cientu de la población del estáu tien l’español como llingua materna. L’informe inclúi por vez primera al gallego, obviáu hasta esti documentu.

L’Eurobarómetro defende’l multillingüismu del continente européu y encamienta a que nun futuru prósimu tolos ciudadanos de la Unión puedan falar polo menos dos llingües, incluída la materna. Tocante a la realidá llingüística del estáu español l’informe caltién amás del datu de que’l 89 por cientu de los ciudadanos tienen el castellano como primer llingua (nueve de cada diez ciudadanos), cifra nun 9 por cientu a los falantes de catalán, nun 5% a los de gallego y nun 1% a los d’euskera.

El Conceyu Abiertu pola Oficialidá caltuvo en díes pasaos entrambes reuniones cola dirección del Bloque por Asturies y col grupu parlamentariu d’Izquierda Xunida-BA dientro la ronda periódica de contactos de la plataforma con organizaciones polítiques y sociales. Na reunión el CAO tresmitió a la coalición d’izquierdes la necesidá d’unificar idees nes declaraciones públiques de responsables políticos y diversificar en personaxes públicos estos posicionamientos.

Izquierda Xunida-Bloque, pel so llau, afaló al Conceyu na reunión que caltuvieron col grupu parlamentariu de la coalición a aumentar la presión social na cai pa influir nel movimientu de postures polítiques anguaño contraries a la oficialidá. Nel aconceyamientu que caltuvieron cola diputada d’IX-BA, Paloma Uría y Gustavo García, coordinador del Bloque na Xunta Xeneral, la coalición d’izquierdes comprometióse a facer de ponte ente el CAO y los grupos parlamentarios del PSOE y el PP.

Según desplicó a Asturnews, el portavoz del Conceyu Abiertu pola Oficialidá, Fernando Ornosa, dende va unes selmanes la plataforma tenta que los reciban los grupos socialista y popular, ensin algamar hasta agora nenguna respuesta positiva nesi sen. Tampoco algamó hasta la fecha el CAO dala respuesta de la dirección de la FSA pa comprometer una reunión.

Dotramiente nel aconceyamientu que’l Conceyu caltuvo cola dirección nacional del Bloque por Asturies, nuna reunión na que tuvieron presentes el so portavoz nacional Rafael Palacios y el conceyal por L.lena , Agripino García, la formación nacionalista reafirmó el so compromisu cola oficialidá y la so promesa firme d’abandonar cualquier lligazón con organizaciones polítiques que firmaren una reforma estatutaria ensin el reconocimientu cooficial del asturiano y del gallego-asturiano. Esta rutura diba ser con consecuencies de futuru, según aseguraron los miembros de la dirección del Bloque al CAO y aplicable a los sos actuales socios d’Izquierda Xunida si llegaren a aceptar un estatutu ensin oficialidá.

La reiteración del compromisu pa desixir el reconocimientu llegal plenu de los derechos llingüísticos na reforma estatutaria fue clara tanto per parte del Bloque por Asturies como d’Izquierda Xunida, según aseguró a Asturnews Fernando Ornosa. El portavoz del CAO anunció la intención de la plataforma de redactar una moción ‘estándar’ pa presentar nos 78 conceyos d’Asturies y na que se pide a la Xunta Xeneral y al Gobiernu del Principáu la inclusión de la oficialidá nel estatutu. Izquierda Xunida y el Bloque comprometiéronse cola plataforma a actuar como introductores d’estes mociones nos conceyos onde tienen la posibilidá de facelo. La primera d’estes mociones podía rexistrase nel conceyu de L.lena, onde’l Bloque por Asturies cuenta con tres conceyales.