El CAO pídi-y a IX coordinación y diversificación nes sos posiciones públiques sobre la oficialidá

El Conceyu Abiertu pola Oficialidá caltuvo en díes pasaos entrambes reuniones cola dirección del Bloque por Asturies y col grupu parlamentariu d’Izquierda Xunida-BA dientro la ronda periódica de contactos de la plataforma con organizaciones polítiques y sociales. Na reunión el CAO tresmitió a la coalición d’izquierdes la necesidá d’unificar idees nes declaraciones públiques de responsables políticos y diversificar en personaxes públicos estos posicionamientos.

Izquierda Xunida-Bloque, pel so llau, afaló al Conceyu na reunión que caltuvieron col grupu parlamentariu de la coalición a aumentar la presión social na cai pa influir nel movimientu de postures polítiques anguaño contraries a la oficialidá. Nel aconceyamientu que caltuvieron cola diputada d’IX-BA, Paloma Uría y Gustavo García, coordinador del Bloque na Xunta Xeneral, la coalición d’izquierdes comprometióse a facer de ponte ente el CAO y los grupos parlamentarios del PSOE y el PP.

Según desplicó a Asturnews, el portavoz del Conceyu Abiertu pola Oficialidá, Fernando Ornosa, dende va unes selmanes la plataforma tenta que los reciban los grupos socialista y popular, ensin algamar hasta agora nenguna respuesta positiva nesi sen. Tampoco algamó hasta la fecha el CAO dala respuesta de la dirección de la FSA pa comprometer una reunión.

Dotramiente nel aconceyamientu que’l Conceyu caltuvo cola dirección nacional del Bloque por Asturies, nuna reunión na que tuvieron presentes el so portavoz nacional Rafael Palacios y el conceyal por L.lena , Agripino García, la formación nacionalista reafirmó el so compromisu cola oficialidá y la so promesa firme d’abandonar cualquier lligazón con organizaciones polítiques que firmaren una reforma estatutaria ensin el reconocimientu cooficial del asturiano y del gallego-asturiano. Esta rutura diba ser con consecuencies de futuru, según aseguraron los miembros de la dirección del Bloque al CAO y aplicable a los sos actuales socios d’Izquierda Xunida si llegaren a aceptar un estatutu ensin oficialidá.

La reiteración del compromisu pa desixir el reconocimientu llegal plenu de los derechos llingüísticos na reforma estatutaria fue clara tanto per parte del Bloque por Asturies como d’Izquierda Xunida, según aseguró a Asturnews Fernando Ornosa. El portavoz del CAO anunció la intención de la plataforma de redactar una moción ‘estándar’ pa presentar nos 78 conceyos d’Asturies y na que se pide a la Xunta Xeneral y al Gobiernu del Principáu la inclusión de la oficialidá nel estatutu. Izquierda Xunida y el Bloque comprometiéronse cola plataforma a actuar como introductores d’estes mociones nos conceyos onde tienen la posibilidá de facelo. La primera d’estes mociones podía rexistrase nel conceyu de L.lena, onde’l Bloque por Asturies cuenta con tres conceyales.