Sociedá

El portavoz d’Izquierda Asturiana (IAS), Ignaciu Llope, volvió a denunciar ayeri ‘l’engañu y decepción’ que supón el gobiernu d’izquierda ente l’empiezu de les emisiones de la TPA ensin denguna presencia de la llingua asturiana na so programación. ‘Inclumple nuevamente de forma flagrante l’alcuerdu d’IX y PSOE y supón un pasu firme hacia la muerte de la nuestra llingua’, afirmó Llope, que recordó que nel pactu firmáu nel añu 2003 alcordábase l’apueste por ‘un ente públicu modernu tecnicamente, comprometíu cola realidá cultural y llingüística d’Asturies’.

Nel pactu de gobiernu firmáu en 2003 pola FSA ya IX-BA roblábase un ‘impulsu de la llingua asturiana nos medios de comunicación apoyando un usu rigurosu y normalizador’ y un prometedor ‘diseñu y usu activu del futuru Ente de comunicació nesi sen’.

Según Llope, ‘dende que’l pasáu vienres la TPA empezare les sos emisiones de forma regular, la presencia del asturianu foi nula, lo que vien a confirmar los piores presaxos, confirmando que la burlla del escacarexáu pactu de la izquierda plural algama dimensiones astronómiques’.

Pal portavoz d’IAS esti fechu amuesa que ‘si dalguien tenía dalguna duda de la voluntá normalizadora de los responsables de la RTPA y del gobiernu del PSOE-IX-BA yá quedó espeyada’. ‘Esta televisión pagámosla tolos asturianos colos nuestros impuestos, incluyíos los que falamos n’asturianu’, afirmó Llope, que tachó esta actitú de ‘tomadura de pelo, una ironía que’l lema sía ‘Reflexu d’Asturies’ cuando polo que tamos viendo namás que se dedica a reflexar una Asturies monollingüe, ensin personalidá, una Asturies que sólo esiste na cabeza de los responsables de la FSA’.

El pasáu sábadu día 10 de xunu los militantes d’Izquierda Asturiana (IAS) en Xixón escoyeron la so nueva executiva local de cara al procesu electoral de mayu de 2007. Pablo Rodríguez Alonso sigue al cargu de la portavocía d’IAS, mentes que la secretaría de la organización ye pa Yolanda González. Carlos Fernández como responsable de les mocedaes del partíu (MIAS), y los vocales Xurde Lluis González, Paula Montes y Daniel Toribios, completen la nueva executiva d’un partíu que nos últimos meses vio aumentada de forma considerable la so militancia na villa xixonesa.

Ente los obxetivos de l’agrupación xixonesa d’Izquierda Asturiana ta’l constituyise en referencia asturianista y d’izquierda nel conceyu de Xixón. Y pa ello planteguen la ellaboración d’una llista pa concurrir a los comiciones locales de 2007, cola intención d’ufiertar una alternativa asturianista, d’izquierda y verde nel conceyu.

Los interesaos en conocer l’euskera tienen dende’l pasáu mes de mayu una nueva ferramienta pa sofitar el so aprendizaxe: un portal n’Internet col nome de Ikasbil. El portal foi desenvueltu por HABE, organización pala promoción del aprendizaxe del Euskera como segunda llingua.

La dispersión de la xente qu’adeprende un idioma tan difícil como l’euskera (pola so diferencia coles llingües romániques o angloxermániques mayoritaries n’Europa) ye un handicap que xuntar a les dificultaes propies del idioma. Y por mor d’ello xurde esta iniciativa que quier sofitar el trabayu de los “euskaltegis” (centros pala enseñanza del euskera). El portal qu’agora entama ufierta gratuitamente más d’ocho mil items (testos, audiu, vídeos, etc..) catalogaos d’alcuerdu con criterios educativos (nivel de conocimientu del idioma, posibilidaes de dedicación al aprendizaxe, etc..).

El plenu de la Xunta Xeneral del Principáu volvió a debatir ayeri la necesidá d’una reforma estatutaria nesta llexislatura, tres de refugar, colos votos a la contra de los parllamentarios de PSOE y IX-BA, una proposición non de llei presentada nel pasáu mes d’avientu pol Partíu Popular pa echar el frenu a les “inxerencies del Bloque Nacionalista Gallegu nel occidente d’Asturies”. PSOE y IX-BA aprovecharon el debate pa pidi-y al PP la so implicación na reforma del Estatutu, considerando qu’ésta “ye la meyor forma de defender la integridá d’Asturies”.

El plenu de la Xunta Xeneral debatió ayeri una iniciativa parllamentariapresentada por Ovidio Sánchez en nome del so partíu’l pasáu mes d’avientu cola que se buscaba frenar les “inxerencies” del Bloque Nacionalista Gallegu nes comarques más occidentales d’Asturies. Na defensa de la so proposición non de llei, el parllamentariu popular Marcial González acusó al Gobiernu asturianu de “nun respoder con firmeza la soberanía del territoriu del Principáu”, a lo que’l portavoz del PSOE na Xunta Xeneral, Fernando Lastra dio respuesta asegurando que, pesie a que “la iniciativa del BNG ye desafortunada”, tampoco hai qu’afalar “una discusión que nun existe”.

Nel debate celebráu ayeri na Xunta, parllamentarios del Partíu Socialista y d’Izquierda Xunida-Bloque por Asturies aprovecharon pa pidi-y al PP la so implicación na reforma del Estatutu d’Autonomía asturianu, cosa que los populares volvieron a rechazar como vienen faciendo dende los últimos meses.

Énte la negativa de los populares, Fernando Lastra, portavoz del grupu socialista, señaló que’l PP “tien d’implicase con rigor y seriedá nuna reforma estatutaria dende dientro porque ye la responsabilidá de tolos grupos”.

Pela so parte, la portavoz d’Izquierda Xunida, Paloma Uría, cuestionó l’actitú de los populares asegurando que “ye raro que tean tan interesaos nel estatutu gallegu y nun quieran saber nada del asturianu”. En clara referencia a la iniciativa debatida ayeri nel Parllamentu, Uría afirmó que “‘l meyor instrumentu pa defender la integridá d’Asturies ye, precisamente, la reforma del nuestru estatutu”.

El Club de Prensa Asturiana de La Nueva España acueye esta tarde a partir de les ocho una charra titulada ‘Diez años d’una aventura asturianista’, cola que se remembra’l decimu aniversariu de la revista ‘Asturies, memoria encesa d’un país’. Esta revista, recuperadora de tou tipu de documentos, informaciones y noticies hestóriques rellacionaes con Asturies, va ser esta tarde presentada pol antropólogu y academicu de la llingua asturiana, Roberto González-Quevedo.

Editada pola Fundación Belenos, que collabora na celebración d’esti actu, ‘Asturies, memoria encesa d’un país’ lleva diez años averando a los asturianos a la conocencia de la hestoria propia, de les sos tradiciones y vezos, asina como a la reconstrucción de la memoria del pueblu asturianu.

Nel actu de presentación d’esta tarde van participar los miembros del conseyu de redacción d’esta revista Ignaciu Llope, psiquiatra, escritor y portavoz de partíu Izquierda Asturiana, asina como Xose Nel Riesgo, xeógrafu y escritor tamien.

La Sociedá pal Desarrollu de les Comarques Mineres, SA (SODECO) va celebrar el prósimu día 15 de xunu l’actu d’entrega de los XII Premios Sodeco a Proyectos Empresariales que nesta edición foron pa les empreses Rematex y Grupu Rioglass. Nel actu d’entrega tarán presentes Graciano Torre, conseyeru d’Industria y Emplegu del Principáu d’Asturies, Mª Jesús Álvarez, presidenta de la Xunta Xeneral, Marciano Barreñada, alcalde de Llaviana, Audilio González, presidente de SODECO y Felisa Barreiro, directora xeneral de SODECO.

La empresa reconocida col premiu a meyor proyectu empresarial nesta undecima edición foi la empresa Rematex (Planta de tratamientu y valorización de residuos de construcción y demolición). Pela so parte, el Grupu Rioglass recibió’l premiu al Impulsu Industrial nes Cuenques.

El premiu a proyectos empresariales ta dotáu con 36000 euros que deberán destinase a la puesta en marcha del proyectu.
Nes doce ediciones celebraes hasta la fecha, presentáronse un total de 273 proyectos que representen una inversión de 49,6 millones d’euros y una previsión de creación de 1.469 emplegos.

Esta duodecima edición de los Premios SODECO ta patrocinada pol Grupo Thyssenkrupp Industrial, Rioglass Astur, S.A., Banco Herrero, La Caixa, Grupo Duro Felguera, Cámara de Comercio de Oviedo, Banco Popular y Cajastur.

La Dirección Nacional d’Izquierda Asturiana (IAS) decidió na so última reunión ordinaria’l poner en marcha una dinámica de trabayu, siguiendo’l mandatu del VI Alcuentru Nacional que celebraren el pasáu mes de xineru, de cara a preparar les sos candidatures pa les elecciones autonómiques y locales que van tener llugar nel mes de mayu del añu qu’entra.

Pa ello, dende la Dirección Nacional d’Izquierda Asturiana acordóse la creación d’una comisión electoral coordinada por Carlos Fernández Fuentes y presidida pol Secretariu d’Acción Política, que va cuntar con representantes de les distintes agrupaciones d’IAS.

Tala comisión, tien previsto trabayar nos prósimes meses de branu ellaborando les llinies básiques de los programes autonómicos y municipales que la formación presentará a les elecciones del 2007, diinamizando d’esta manera los procesos d’ellaboración de les llistes y d’elección de los representantes nes mesmes.

Tres d’ello, Izquierda Asturiana va aniciar una ronda de contactos con axentes sociales, colectivos y formaciones polítiques que presenten coincidencies coles llinies programátiques del partíu, de cara a estudiar posibles alcuerdos, asina como pa recoyer les sos aportaciones.

El Campeón del Mundu de Formula 1 2005, Fernando Alonso, visita esti miércoles el so país al qu’aportó ayeri pela nuechi cola so moza, la cantante de El Sueño de Morfeo, Raquel del Rosario. Fernando Alonso tien que colar bien ceo pa Silverstone, Inglaterra, onde va correr otra prueba del campeonatu de Formula 1 esti domingu.

El pilotu asturianu y la cantante canaria aportaron a Asturies aprovechando l’últimu día que-yos queda llibre enantes d’entamar otra vuelta les sos respectives actividaes profesionales: Fernando n’Inglaterra pa correr en Silverston y Raquel del Rosario pa tornar colos sos collacios de Xixón y Uviéu colos que forma’l grupu, qu’actúa en Valldolid na Plaza Mayor, mañana a les 22 hores.

L’asociación cultural Furmitentu convoca’l primer Concursu de Vocabularios Tradicionales de Zamora, una iniciativa cola que quieren guardar el patrimoniu llingüísticu, desarrollando y dignificando la fala tradicional de les comarques zamoranes. Al concursu pueden presentase vocabularios ineditos que tegan un mínimu de sesenta terminos de los qu’hai que dar la so definición.

Amás del castellán, en dalgunes comarques de Zamora tán vivos el gallego-portugues y l’asturlliones. L’asociación Furmientu, que nació ente l’ausencia d’iniciatives per parte de les instituciones zamoranes a favor del so patrimoniu llingüísticu, entiende que ye precisamente l’asturiana la que ta en mayor grau d’abandonu. Por ello, el llabor de Furmientu ta basáu na conservación, dignificación y desarrollu de les variedaes usaes nes comarques del occidente de Zamora, como son el sanabres o l’alistano.

Cola fin d’afalar a los zamoranos nel amor pola so cultura, Furmientu convoca agora esti concursu de recopilación de vocabularios tradicionales nel que se va valorar mesmo’l númberu de vocablos recoyíos como la zona de la vengan, yá que, por exemplu, consideráse más meritorio recoyer cien palabres de la fala tradicional de Tierra de Campos que doscientes de la de Sanabria.

De la mesma manera, va tenese en cuenta la información complementaria que se dea, como frases qu’amuesen el so usu popular, información sobre la so vixencia, la descripción d’estructures llingüístiques propies de la fala o una rellación de nomes de la toponimia local.

Furmientu

El conseyeru de Mediu Ambiente, Francisco González Buendía, anunció acciones xuciales contra’l PP, mesmo per parte del Principáu que pela del personal de la guardería rural, por “llevantar falsos testimonios”, al acusar d’irregularidaes na xestión del Plan del llobu. Los populares, sin embargu, solicitaron na mañana d’ayeri l’acción de la Fiscalía “nos probaos graos de corrupción y sospeches más que segures de delitu per parte d’estos departamentos”.

Buendía anunciaba ayeri que tanto’l Principáu, en defensa del “bon nome de l’Alministración Pública”, asina como les persones que se vieron afectaes poles “mentires” de los populares, que tacharon a los miembros de la guardería rural de ser personal de confianza de los socialistes, razón pola tán ocupando los sos cargos, van emprender acciones llegales nos tribunales de xusticia.

El popular Peláez manifestare na mañana d’ayeri les “irregularidaes, los probaos graos de corrupción y sospeches más que segures de delitu per parte d’estos departamentos que coinciden coles quexes de los ganaderos y de la Guardería del Principáu nesta llexislatura”, razón pola que pidió la intervención de la Fiscalía.

Na so defensa, Buendía desplicó que les persones a les que se refería Peláez, “una ye coordinador xeneral de la guardia y l’otru’l responsable xeneral d’espacios naturales, lo que los capacita p’actuar per toa Asturies”.

Los pastores avisen del incumplimientu del plan de xestión de Mediu Ambiente