Sociedá

Esti sábadu 7 d’ochobre la organización moza Darreu tien convocada una manifestación en La Felguera baxo’l lema Futuru n’Asturies “onde se va protestar pola grave situación de la mocedá asturiana que se ve obligada a emigrar pa poder vivir y los que nun emigren, trabayen n’Asturies en condiciones precaries y d’esplotación”. La marcha organizada por Darreu va salir a les 19:00 hores de la Estación d’Autobuses y cuenta col apoyu de la Corriente Sindical d’Izquierda, Andecha Astur, l’Asociación d’Inmigrantes Residentes n’Asturies y otros colectivos sociales.

Darreu busca con esta movilización “la organización de la mocedá pa poder algamar los derechos sociales básicos”, yá qu’esta “tien que ser un protagonista principal de les tresformaciones sociales d’Asturies”.

La manifestación tien l’apoyu de delles organizaciones como’l sindicatu asturianu Corriente Sindical d’Izquierda (CSI), la organización política Andecha Astur y otres organizaciones sociales como l’Asociación d’Inmigrantes Residentes n’Asturies (AIRA,) ente otres.

Ente los díes 5 y 7 d’ochobre la provincia de Trento acueye’l Forum Nazionale per le Minoranze Linguistiche que baxo’l lema ‘Comunicar la identidá’ va analizar les minoríes etnico-territoriales-llingüístiques, estableciendo una estratexa de comunicación pa elles y plantegando una revisión de les identidaes. Nel congresu, nel que van participar especialistes de diferentes comunidaes como la italiana, la eslovaca, la vasca o la galesa, l’asturianu tamien va tar presenta na participación de Próspero Morán, director d’Asturnews, que va falar de la comunicación de la identidá nos medios.Na primera xornada. nesti xueves 5, políticos locales aldericaron alrodiu de la definición de minoría llingüística y ficieron una descripción histórica y sociollingüística de les minoríes llingüístiques n’Italia.

El director d’esti periódicu, Próspero Morán va participar mañana 6 d’ochobre nun debate sobre la tresmisión de la identidá nos medios de comunicación, que se va celebrar na Sala Rosa del Palazzo della Regione de Trento y nel que tamien van tar espertos d’otros comunidaes del estáu español, como la periodista vasca María González Gorosarri o’l director d’Euskal Telebista, Bigen Zupiria.

La identidá va ser especialmente analizada nesti Forum de les minoríes llingüístiques al travies del cine, con películes como ‘Lusern’ de Lia G. Beltrami, ‘La destinazione’ de Piero Sanna o ‘Gioacchino, ricordi com’era roveda?’ de Giorgo Tomasi.

Con motivu del centenariu de la espublización de la obra de Menendez Pidal ‘El dialecto leones’, estudiu consideráu fundacional pa la filoloxía asturiana, el Seminariu de Filoloxía Asturiana de la Universidá d’Uvieu prepara un simposiu científicu, ente los díes 9 y 11 d’ochobre, coordináu pol profesor Xulio Viejo, nel qu’espertos de la propia Facultá, xunto a especialistes lleoneses, cántabros y portugueses van analizar la obra de Pidal, asina como los sos trabayos d’encuestación per Asturies que quedaren ineditos. Col envís da facer una revisión llingüística a estos cien años, el Seminariu de Filoloxía Asturiana collabora cola Universidá de Lleón que yá celebró un simposiu asomeyáu’l pasáu mes de marzu, cola participación del profesor Ramón d’Andres. Amás, a lo llargo d’esti congresu van dase a conocer unes encuestes dialectales feches por Pidal pel occidente a principios del sieglu pasáu qu’hasta agora taben inedites.

El programa previstu pa esti simposiu internacional cuenta con un actu inaugural pal próximu llunes 9 d’ochobre coles autoridaes academiques, tres del que la profesora de la Universidá d’Uvieu, Serafina García, va dar la primer comunicación que lleva por títulu ‘L’asturianu na obra de Menendez Pidal’. A la tarde del mesmu llunes, ta previsto que sía Antonio Viudas Camarasa, de la Universidá d’Estremadura, quien siga coles intervenciones falando del patrimoniu llingüísticu estremeñu, pa que depues el so compañeru d’universidá, Juan Carrasco, fale de la transición ente’l astur-lleones y el gallego-portugues. La tarde del día 9 va terminar cola intervención de la investigadora Carmen Fernández Juncal, de la Universidá de Salamanca, que va analizar la dialectoloxía en Cantabria.

El martes día 10 d’ochobre la Universidá d’Uvieu va rindir homenaxe a Ramón Menendez Pidal anantes de dar pasu a la intervención del profesor Xuan Carlos Busto Cortina que falará de la filoloxía asturiana anterior a esti eruditu. ‘El leones medieval’ de Jose Ramón Morala, de la Universidá de Lleón, ‘Dialectoloxía lleonesa actual’ d’Hector García Xil, y ‘L Mirandes: De Codialecto Pertues A Lhengua Oufecial’ por Antonio Bárbolo, de la Fundaçâo Para A Ciência E A Tecnología – Universidade De Trás-Os-Montes-Alto Douro, Portugal, van ser los ponentes del segundu día de les xornaes.

L’últimu día del simposiu internacional, el miercoles 11 d’ochobre, va presentase la obra de Pidal referida al asturianu. Tres d’esta presentación, l’espertu del Seminariu de Filoloxía Asturiana, Fernando Alvarez-Balbuena, va falar sobre la dialectoloxía asturiana nel últimu sieglu. De tarde, Alvaro Arias Cabal, de la Universidá d’Uvieu, va estudiar la lexicografía asturiana dende Xovellanos hasta anguaño, Xose Nel Comba Paz fadrá lo propio coles fontes documetnales de la llingua asturiana y el profesor Xulio Viejo Fernández, coordinador d’estos alcuentros, trazará nuna conferencia les perspectives de futuru de la Filoloxía Asturiana.

El Simposiu dedicáu a Menendez Pidal va terminar cola participación d’Ines Fernández Ordóñez, de la Universidá Autónoma de Madrid, que va repasar los oríxenes de la dialectoloxía hispánica y les sos perspectives de futuru, partiendo de Menendez Pidal y llegando a lo que sedría la dialectoloxía del sieglu XXI.

El Boletín Oficial del Principáu d’Asturies espublizaba esta mañana’l Decretu pol que se determinen los más de setecientos topónimos oficiales del conceyu de Xixón, faciendo d’esta manera que sían yá doce los conceyos que recuperen oficialmente la so toponimia tradicional. Asina, Xixón, seis meses depues d’aprobala en Plenu, súmase a Carreño, El Franco, Llanes, Gozón, Llangreu, L.lena, Villaviciosa, Sariegu, Bimenes, Cabranes y Nava que yá determinaron la so toponimia.

Na busca de terminar coles polemiques que llevantaron dalgunos topónimos como Valdornón o Cimavilla, l’Ayuntamientu xixones anunció que tol trabayu fechu nestos dos últimos años va vese espeyáu nun llibru que va recoyer, non sólo la nueva toponimia del conceyu, sinón tamien la historia de cadún de los nomes, el so orixe y la so razón de ser.

Esti sábadu 30 de setiembre va presentase una nueva agrupación de la Xunta pola Defensa de la Llingua Asturiana n’Ayande, llevando asina la reivindicación llingüística a otru conceyu más del occidente d’Asturies onde nos últimos años ta medrando enforma l’interes por llograr la oficialidá de l’asturianu. A les seis de la tarde de mañana, el filológu Fernando Álvarez-Balbuena, xunta otros militantes de l’agrupación ayandesa, va facer la so presentación oficial nel salón d’actos de la Casa Conceyu de La Puela.

Coincidiendo cola celebración del ‘Ruxidoiru’06’, organizáu pola banda gaites El Rapigueiro, la presentación de la Xunta va facer una espicha nel Cafe Centro, a partir de les diez de la nueche, cola música en directu del grupu de rock ‘Nós!!!’.

L’Academia de la Llingua Asturiana va celebrar ente los díes 23 y 25 d’ochobre les XXV Xornaes Internacionales d’Estudiu nel que, amás de los profesores asturianos habituales d’estes conferencies como Xose Lluis García Arias, Aurelio González Ovies, Miguel Ramos Corrada o Próspero Morán, director d’esti periódicu, ente otros, tamien van participar espertos internacionales como Josep María Nada Farreras, de la Universidá de Girona, Beatrice Schmid, de la Universidá de Basilea, Eloy Gómez Pellón, de la Universidá de Cantabria, o Aurelia Merlan, de la Universidá de Costanza.

Les Xornaes Internacionales d’Estudiu de l’Academia de la Llingua que cada añu se celebran nel Salón d’Actos de la Facultá de Filoloxía de la Universidá d’Uvieu van empezar el llunes 23 d’ochobre a les cuatro y media la tarde con una conferencia del profesor de la Universidá de Girona, Josep María Nada Farreras, que va versar sobre les llingües y les fronteres nel sieglu XXI. ‘La expresión de la obligación y la necesidad en los textos jurídicos asturianos medievales’, por Beatrice Schmid, ‘La Lliteratura asturiana y modernidá 1903-1924’, de Xose Ramón Iglesias Cueva, ‘Sobre el significado de las palabras y de otros signos en la vida cotidiana en un valle asturiano’, d’Eloy Gómez Pellón y ‘Las lenguas minoritarias del noroeste peninsular: concordancias y divergencias’ d’Aurelia Merlan, van ser el restu de les conferencies d’estes xornaes nes que tamien habrá abondes comunicaciones de diferentes espertos.

‘Aspeutos evolutivos del consonantismu asturianu’, por Xose Lluis García Arias, ‘La poetica de les esqueles’ d’Aurelio González Ovies, ‘Imáxenes de muyeres na poesía asturiana d’entamos del sieglu XX’ de Xose Lluis Campal, ‘Supraterritorialidá de les llingües y perímetros llingüísticos’ de Leopoldo Tolivar Alas, ‘Ente Asturies y Miranda. La recuperación de la llingua en Lleón y Zamora’ de Nicolás Bartolome Perez, ‘Eva fuera’l paraísu’ de Mar Martín Martín, ‘Narrador y personaxe na lliteratura asturiana’ de Miguel Ramos Corrada o ‘La comunicación dixital en llingua asturiana’ de Próspero Morán López, director d’Asturnews, son dalgunes de les comunicaciones que contempla’l programa de les Xornaes d’Estudiu qu’esti añu cumplen la so venticinco edición.

A toles persones que s’apunten y asistan a tales xornaes, pa les qu’hai places restrinxíes de matrícula, daráse-yos el correcpondiente certificáu acreitativu.

Tres de la segunda xornada del Debate d’Orientación Política, los grupos parlamentarios de PSOE ya Izquierda Xunida rexistraron ayeri de manera conxunta na Cámara de la Xunta Xeneral una propuesta de resolución qu’habrá de ser votada na sesión de güei cola que se solicitaba un nuevu impulsu al Plan de Normalización Social del Asturianu, faciendo especial mención al so usu nel ente públicu de conumicación (RTPA). Socialistes ya Izquierda Xunida propunxeron una serie d’iniciatives conxuntes centraes na revisión de la xestión de los espacios naturales, la ordenación del área central asturiana o l’agricultura ecolóxico, ente otres.

Na segunda xornada del Debate del Estáu de la Rexón, los temes que más foron reprochaos al gobiernu tuvieron que ver con tolo tocante a la polemica del pasáu fin de selmana na acampada ecoloxista de Caliao, prohibida pola Conseyería de Mediu Ambiente y defendida públicamente per parte d’Izquierda Xunida, asina como’l desempleu y la emigración moza. El presidente del PP, Ovidio Sánchez, intervino na sala falando de ‘dos llexislatures perdíes’, faciendo repasu pela riestra de demandes sociales pendientes de resolver pol gobiernu nos últimos años.

Precisamente’l PP presentó un total de 97 propuestes de resolución ente les que se pide, ente otres midides, que se quite l’impuestu d’hidrocarburos, una baxada del IRPF y el trespasu de les competencies que queden del Estatutu. Cola votación d’estes propuestes, el Parlamentu asturianu va poder fin a tres díes de revisión política na que l’actitú del Presdiente, Vicente Alvarez Areces, foi de siguío criticada por ‘trunfalista’ ya ‘idílica’.

La situación llingüística y la denuncia sobre los 6 militantes proderechos llingüísticos centraron l’actu inaugural de los Alcuentros de Mocedá de Cabueñes. El presidente del CMPA vindicó nel so discursu d’apertura la llibertá d’espresión y la pluralidá política “recoyíes na Constitución española”.

Feito recordó continua represión que se ta faciendo a los y les militantes de Xunta Moza por mor de les protestes cíviques que vienen desenvolviendo sobre’l gobiernu asturianu. Pa Feito “el derechu a la llibertá d’espresión ye ún de los Derechos Fundamentales afitaos na nuesa Constitución, y xunto col principiu del pluralismu políticu constitui ún de los pegoyos sobre los que se sofita’l nuestru sistema democráticu”.

Nel actu xunta a Paulino Feito participaron tamién el conceyal de Promoción Económica, José María Pérez López; la directora del Institutu Asturianu de la Mocedá, Carmen Barrera Fernández; la presidenta de la Comisión de Mocedá de la FEMP, Pilar Pérez Lapuente; el responsable de Participación y Promoción Asociativa del Conseyo de la Mocedá d’España; Javier Igareda Pañeda, y el presidente del Conseyu de Mocedá de Xixón Jordán Suárez.

Los Alcuentros de Cabueñes qu’entamen güei cuenten cola participación de 140 mozos y moces del mundu asociativu asturianu y latinoamericanu. Cabueñes ufre demientres esta selmana una perimportante actividá cultural na que destaca’l ciclu Arenes Movedices, nel que’l colectivu FiumFoto desenvolverá actividaes alrodiu la temática de los alcuentros.

Pa más información:

Conseyu de la Mocedá d’Asturies

Conseyu de la Mocedá de Xixón

Cabueñes 2006

Xunta Moza

El presidente del gobiernu asturianu, Vicente Álvarez Areces, foi l’encargáu d’abrir ayer la xornada inaugural del Debate sobre la Orientación Política Xeneral del Conseyu de Gobiernu, popularmente conocíu como Debate del Estáu de la Rexón, y fízolo prometiendo una serie d’exencies nel Impuestu de Sucesiones asina como la meyoría de los tresportes asturianos con un tranvía que conecte les ciudaes d’Uvieu, Siero y Llanera. Un Centru d’Investigación en Biomediciona, el Centru de Tecnoloxíes Llimpies de Llangreu, el Parque Tecnolóxicu de Mieres y el Centru Tecnolóxicu de la Madera de Siero, foron otros de los anuncios d’un Areces pletóricu que se felicitó por tener ‘la meyor Asturies que tuvimos nunca’.

La intervención del presidente, Vicente Álvarez Areces, tachada de ‘trunfalista’ polos sos socios de gobiernu, abría l’últimu debate de l’actual llexislatura. Tres del anunciu de que los Presupuestos rexonales van pasar de los 3800 millones, lo que supón una xubida de más del 7%, Areces comprometió una rebaxa tributaria nel Impuestu de Sucesiones que suponga la exención pa los heriedos que reciban los fíos más pequeños de 21 años asina como les persones con una discapacidá mui grande.

Pero les promeses del cabeza de gobiernu nun quedaron ehí, y na so intervención de cuasi dos hores tamien dio anuncia a un proyectu d’ordenación del territoriu pa la zona d’Uvieu, Siero y Llanera, nel que destaca un tren-tram (mediu de tresporte qu’entemez les característiques propies del ferrocarril coles del tranvía) que conecte les árees universitaries, col hospital, los centros comerciales y les árees industriales colos prinicipales núcleos de población d’estos conceyos.

Sobre l’apoyu del gobiernu del estáu español al asturianu, Areces manifestó que se va ver traducíu, ente otres coses, nel empiezu pal añu qu’entra del tramu Unquera-Llanes de l’Autovía’l Cantábricu, asina como na terminación de siete tramos más na parte occidental de la mesma.

El proyectu de desarrollu del Centru d’Investigación de Biomedicina, y tres centros financiaos con fondos mineros como son el Centru de Tecnoloxíes Llimpies de Llangreu, el Parque Tecnolóxicu de Mieres y el Centru Tecnolóxicu de la Madera en Siero, amás del aumentu de les ayudes a la mocedá y a los conceyos, foron otres de les promeses del presidente asturianu nun debate que sigue esta mañana na Xunta Xeneral del Principáu cola intervención de Noemi Martín, portavoz d’Izquierda Xunida d’Asturies.

La portavoz del grupu parlamentariu d’IX-BA, Noemí Martín, usó esta mañana’l so turnu de replica nel Debate d’Orientación Politica del Principáu pa tratar ente otros temes la política llingüística seguida pol gobiernu nesta última llexislatura. La portavoz d’IX, que reclamó mayor esfuerzu presupuestariu nesta materia y la desaparición de les ‘abondes torgues’ qu’atopa’l Plan de Normalización, desixó-y al presidente asturianu ‘la obligación de desarrollar esti plan na so totalidá’. Álvarez Areces, na so defensa, enumberó ‘los abondos apoyos’ mostraos, como la presencia de la llingua na educación, nes publicaciones y nos medios de comunicación, llabor que resumió diciendo que ‘tamos encantaos de defender la llingua’.

Les declaraciones d’Alvarez Areces en materia llingüística volvieron ser tachaes pola portavoz d’IX-BA, Noemí Martín, como ‘trunfalistes’, quien tamien pidió qu’esti debate ‘valga pa facer un balance colo bono y lo malo’ de la llexislatura. Por eso, Martín tamien alvirtió’l que so partíu va pidir responsabilidaes al so sociu de Gobiernu (PSOE) pola edición del llibru ‘Construyendo Asturias’ si ye que se demuestra que collaboraron cola mesma. ‘Somos testigos de que’l gobiernu como órganu colexáu nun tuvo nada que ver con esa espublización, pero queda por aclariar si dalguna persona tuvo dalgo que ver’, dixo Martín.

No tocante a esti tema, Areces aseguró que nun tien ‘incoveniente’ en que dalgún miembru del so Gobiernud dea desplicaciones sobre la espublización.