Sociedá

El Defensor del Pueblu Européu Nikiforos Diamandouros robló’l pasáu 30 de payares un alcuerdu col embaxador español na Unión Europea, Carlos Bastarreche, que va permitir que los ciudadanos de les comunidaes con llingua cooficial puedan presentar les sos reclamaciones a esti órganu de la Unión Europea nos sos idiomes maternos.

Esti alcuerdu axústase a les práctiques de la institución europea adoptaes pol Conseyu de Ministros de la UE en xunu de 2005, nes que se recueye’l derechu de la ciudadanía a emplegar, nel marcu de les sos comunicaciones coles instituciones europees, cualesquier de les llingües cooficiales dalcuerdu colo establecío na Constitución española de 1978.
El testu prevé que’l Gobiernu español entame un órganu pa facese responsable de les traduciones presentaes nestes llingües. Esti órganu, amás, fadrá la traducción de la respuesta del Defensor del Pueblu Européu a la llingua escoyida polos ciudadanos na so reclamación.

L’alcuerdu entamará a tener validez nel intre nel que les autoridaes españoles creen la institución encargada de les traduccones. El Defensor del Pueblu Européu investiga les reclamaciones venceyaes a la mala alministración na aición de les instituciones y órganos de la UE, pero nun pue ocupase de reclamaciones relacionaes coles alministraciones estatales o de les alministraciones de los territorios que componen los Estaos miembro de la Unión Europea.

Les reclamaciones a esta institución comunitaria pueden presentales los ciudadanos de la UE o los residentes nel territoriu de la Unión, asina como empreses, asociaciones o otres entidaes con dominiliu na Unión.

Defensor del Pueblu Européu

La coalición ente la Unión Renovadora Asturiana y el Partíu Asturiana presentó esti sábadu a Sergio Marqués, expresidente d’Asturies, y a Xuan Xosé Sánchez Vicente, exdiputáu de la Xunta Xeneral, como cabeces de llista d’Unión Asturianista.

Unión Asturinista ye’l resultáu de les conversaciones, y tiempu de trabayu conxuntu, de los dos partíos del centru-derecha asturianista.
Nés últimes elecciones autonómiques, mayu de 2003, la Unión Renovadora Asturiana algamó 15,621 votos y el Partíu Asturianista 8,823 votos, nun algamando nenguna de les dos fuerces la representación parlamentaria.

La Unión Renovadora Asturiana ye’l partíu creáu por Sergio Marqués depués de la salida de Sergio Marqués del Partíu Popular, por diferencies de criteriu. Nes elecciones de 1999 algamó tres diputaos autonómicos y 83 conceyales. En 2003, última convocatoria autonómica, URAS algamó 17,162 votos, perdiendo tolos sos diputaos y el númberu de representantes nes cases conceyu baxó hasta los 29 conceyales que tien actualmente.

El Partíu Asturianista, presidíu por Xuan Xosé Sánchez Vicente creóse en 1985 cola fin de reformar l’Estatutu d’Autonomía pa qu’Asturies fuere reconocida como nacionalidá histórica y la llingua asturiana declarada oficial, asina como equiparar el nivel competencial al de les comunidaes del artículu 151 de la Constitución española.
En 1991 el PAS presentóse xunta la UNA (Unidá Nacionalista Astur) algamando d’esti pactu’l primer diputáu asturianista, y seyes conceyales en cinco conceyos. En 1995, amás de mantener l’escañu de Xuán Xosé Sánchez Vicente, el PAS frutu d’un pactu col PP algamaría l’alcaldía del conceyu de Nava. Nes elecciones de 1999 el PAS perdió’l so representante na Xunta Xeneral.

Los actos del II Alcuentru d’Escritores n’Asturianu Occidental entamaron el sábadu pasáu cola presentación de los alcuentros alcuentros entamaos pola Xunta pola Defensa de la L.lingua Asturiana nel Occidente, cola collaboración del Ayuntamientu de Cangas y de la Conseyería de Cultura per parte de Ramón d’Andres, Xefe de la Oficina de Política Llingüística y delles autoridaes municipales del conceyu de Cangas. Los actos desenrolláronse nel Teatru Toreno de la villa de Cangas.

El sábadu pela mañana la xornada cuntó coles conferencies de Fernando Álvarez-Balbuena “¿Yía normal escribir na variedá occidental de la l.lingua? Propuesta d’unas pautas ortográficas integradoras ya suplementarias a la normativa oficial” y “Nel principiu fue’l cuentu” de Vicente García-Oliva.

La tarde completóse cola llectura de la ponencia “La deturpación de la l.lingua en Cuentos del Sil, ou el «llïones» (sic) cumo artefactu políticu ya identitariu” del llingüísta lleones Hector García Xil, una reflexón sobre l’usu del asturlleones, a xuiciu del autor incorreutu, per parte de dalgunos grupos culturales en Lleón. La tarde siguió con “L’aventura d’El Cudoxu” del escritor d’orixe lleones Francisco Xabiel González-Banfi y “Tradición oral ya l.literatura” pol etnógrafu Naciu’i‘Riguilón.

Ún de los actos más emotivos d’esti II Alcuentru foi l’Homenaxe al escritor Basilio Garrido, un actu presentáu por Ernesto García del Castillo “Neto”, col que’l coleutivu d’escritores quixo facer alcordanza y reconocencia a la curtia pero interesante obra del autor cangues. Nel actu, miembros de la Oficina de Política Llingüística y del conceyu de Cangas amosaron la intención d’espublizar la obra completa de Garrido bien llueu.

La xornada del sábadu completóse con un Conciertu acústicu de la mano de Pedru Pereira y Rafa Lorenzo y con un ‘’Filandón – Fiesta asturiana de nueite’’, nel que se cuntó cola participación de músicos del país como Xose ‘Ambás’ y Diego Pangua.

La segunda xornada d’esti Alcuentru d’Escritores n’Asturianu Occidental desenrollóse coles comunicaciones “Del.las notas alredor de la tradición oral de Cangas del Narcea” pol etnógrafu Berto Álvarez Peña, “L’artesanía popular cumo elementu pa la criación artística” pol estudiosu de l’artesanía Vitorino García y la ponencia “L’otru sendeiru de la nueite” de la mano d’Iris Díaz Trancho.

El pieslle de l’Alcuentru vieno dau pola mesa redonda “Tradición oral, cultura popular ya territoriu na l.literatura n’asturianu occidental”, moderada por Fernando Álvarez-Balbuena y cola participación de Vicente García Oliva, Xose María Rodríguez, Ignaciu Llope, Xose Ambás, Xuan Bello y Nicolás Bartolome Perez. Anque nun yera’l tema plantegáu, la mesa redonda convirtióse nuna apasionada discusión sobre cuestiones ortográfiques del asturianu occidental en rellación col estándar, magar del primer comentariu de Xose María Rodríguez, qu’espuso la idea de que ‘l’asturianu occidental peligra pol estándar’. Los demás participantes de la mesa rebatieron esta idea y espresaron la ‘necesidá del estándar como ferramienta d’usu común’ y ‘la necesidá de meyorar la educación inicial nel dialeutu occidental nes escueles d’esta fastera d’Asturies, meyorando la formación de los maestros nesi sen’.

Los actos cuntaron cola presencia d’autores de toles fasteres d’Asturies y Lleón. Escritores como Mª Esther García, Roberto González-Quevedo y Xuan Santori ente otros munchos.

La Secretaria de Mocedá de Comisiones Obreres entama un cursu sobre’l procesu de normalización de la llingua asturiana. El cursu, que desarrollaráse alrodiu la llectura t reflexón de “Reivindicación llingüística: unes reflexones” del profesor Ramón d’Andrés. Asina mesmo trabayaráse con más materiales filolóxicos y políticos sobre la normalización social del asturianu.
El cursu de 20 hores de duración, celebraráse los díes 11, 15, 18, 19, 20 y 21 d’avientu na sede de la Unión Comarcal de Comsiones Obreres del Nalón en La Felguera. Organiza: Secretaría de la Mocedá de CCOO de Asturies.

Les inscripciones pueden facese na Secretaría de Mocedá de Comisiones Obreres d’Asturies nel teléfonu 985 966 030
Los conteníos del cursu son:

• Cuestiones básiques sobre la llingua asturiana. Llingua, fala y dialectu. Isogloses. Dominio llingúístico asturianu. Númberu de falantes y vitalidá.
• El procesu de recuperación de la llingua asturiana. Normativización y noramlización. Una pequeña historia. Propuestes, problemas, enzancos.
• Aspectos de la normativización del asturianu. L`asturianu estándar. Les variantes. L`amestáu. La corrección llingúística. Lliteratura y medios de comunicación.
• Llingua y nacionalismo. Lligua y clase social. El racismo llingüístico.
• El problema eo-naviegu. La situación del asturianu fuera d`Asturies.
• Argumentos en contra y a favor de la oficialidá del asturianu. Perspectives de futuru.

Oxetivos

• Conocer la historia de la llingua asturiana y la so descripción oxetiva como fenómeno llingüísticu.
• Comprender aspectos básicos de la situación social y llegal del idioma asturianu, como son: minorización, normalización, normativización, diglosia, oficialidá, cooficialidá, estándar llingüísticu, variantes.
• Tomar conciencia de la situación de peligru d`estinción qu`atraviesa la llingua asturiana y de la necesidá d`apreciar midíes pa tornar esa situación.
• Ser quien a argumentar con xacíu y con datos énte los prejuicios derivaos del racismu llingüísticu.
• Identificar les postures y les situaciones discriminatories pa la lllingua asturiana nos diversos ámbitos de la vida social.
• Valorar la importancia de la corrección llingüística nel procesu de dignificación de la llingua asturiana.

Nun comunicáu de prensa de l’agrupación mierense d’Izquierda Asturiana el conceyu manteníu ente l’Alcalde de Mieres, Ramón d’Andrés y Xuan Bello sedría un “llaváu de cara ente les prósimes elecciones”. Faustino Zapico señaló que la presencia de Xuan Bello y Ramón d’Andrés pa presenta-y “la idega” a Luis María García, alcalde de Mieres, responde a “una operación cosmética consistente nuna tomadura de pelo a la ciudadanía y un llaváu de cara conxuntu”.
Pa Zapico resulta “paradóxicu y especialmente sangrante qu’a los pocos díes de que los trabayadores de los servicios de normalización criticaren la permala xestión del Serviciu de Normalización Llingüística en Mieres aterricen en Mieres d’Andrés y Bello p’allabar el ‘compromisu’ col asturianu del ayuntamientu mierense”

Según Zapico, anque al entamu de la llexislatura hubiere promeses de normalización llingüística, el gobiernu de coalición asturianu desenvuelve una política llingüística d”espicha y autobombu”. Zapico recordó que “en Mieres nun se tán desenvolviendo midíes normalizadores reales y l’asturianu nun se ta normalizando; nun ye una llingua normal, que s’alcuentre n’igualdá de condiciones col castellanu y l’alcalde habría saber que nengún foru o premiu lliterariu pue tapecer esa realidá”

Sicasí Zapico quiso dexar claru que “dende IAS van sofitar cualesquier iniciativa que suponga una potenciación de la lliteratura asturiana y el conocmientu y reconocimientu de los escritores na nuesa llingua”.

La Fundación Caveda y Nava va distinguir como patronu d’honor al futbolista Enrique Castro «Quini» nuna ceremonia que va realizase nel monesteriu de Santa María de Valdediós (Villaviciosa) el sábadu 2 d’avientu a les 18:00 hores. Cola concesión d’esti títulu a una de les figures mítiques del fútbol asturianu, la fundación quier reconocer el claru sentimientu asturianista de «Quini», asina como facer rescamplar la incidencia social y cultural del deporte, nel que’l futbolista asturianu amuesa una trayectoria llarga y d’éxitu. Enrique Castro comparte esta distinción con personalidaes de los ámbitos eclesiásticu y políticu como Gabino Díaz Merchán, Hugo Morán o Pilar Fernández Pardo. L’actual delegáu ye’l primer patronu d’honor que vien del tarrén del deporte y simboliza la comunión ente la esfera de la cultura y la normalización social del asturianu.

Tres del actu de nomamientu, va presentase’l llibru «Al pie de la lletra», nel que se recueyen opiniones de xente estremao a favor de la llingua asturiana. El volume axunta textos de 320 persones, qu’emitieron el so xuiciu a lo llargo de los últimos trenta años. Depués, el presidente de la Fundación, Inaciu Iglesias, va facer un análisis de la situación que vive anguaño l’asturianu. Un contextu qu’a Iglesias parez-y «abondo interesante» y asegura que «más pronto que tarde va dase la posibilidá real de resolver el desaxuste xurídicu que supón la non oficialidá del asturianu».

Pa zarrar les actividaes programaes nel monesteriu de Valdediós va intervenir Xabier Arzoz, expertu en política llingüística de Navarra, que va falar sobre les experiencies de la Comunidá Foral en materia de normalización. Los patronos de la Fundación Caveda y Nava pretenden, con esta charla, deprender d’otros modelos cola fin de tenelos en cuenta a la hora de trabayar n’Asturies pol usu y la conocencia del idioma del país.

Anque’l nomamientu de «Quini» como patronu d’honor va ser l’actu central de la xornada, les actividaes van entamar a les 17:00 hores cola reunión del patronatu de la Fundación y l’homenaxe a Xosé Caveda y Nava énte la casa natal del escritor na cai del Agua de Villaviciosa.

El Serviciu de Normalización Llingüística d’Avilés entama la campaña “Equí tas en casa” cola que se van entregar carteles n’asturianu nos establecimientos hosteleros del conceyu.
La campaña tien por aciu algamar la rotulación n’asturianu de les diferentes estancies de los establecimientos hosteleros avilesinos. Pa facilitar esta xera amás de los carteles indicadores el Serviciu de Normalización Llingüística d’Aviles ufrirá sofitu nes traducciones cola fin de que les cartes y menús tamién tean n’asturianu.

Los promotores de la campaña nel Conceyu d’Avilés camienten que l’asturianu ha ser tamién una referencia de calidá pa los clientes y turistes

El Xefe del Serviciu de Normalización Llingüística, Ramón d’Andrés, aconceyó esta selmana col alcalde de Mieres, Luis María García, y col escritor Xuan Bello cola fin de presentar un Foru d’Escritores n’Asturianu que valga pal despegue de la lliteratura asturiana asina como pa la profesionalización de los y les escritores n’asturianu.
Mieres apaez como la sede más afayadiza pa esti Foru según los aconceyaos pola so vinculación cola lliteratura y el sofitu de la villa a los valores lliterarios. Les funciones del foru d’escritor seríen favorecer la difusión de la lliteratura n’asturianu y contribuyir a sensibilizar a la sociedá colos escritores y les sos obres. La iniciativa de facer esti Foru sal d’un grupu de 12 escritores n’asturianos y tendría nun entamu’l sofitu del alcalde de Mieres y del Xefe del Serviciu de Normalización Llingüística.

Sobre los problemes de continuación del Serviciu de Normalización de Mieres los participantes nel conceyu dixeron que los problemes debíense más a xeres alministratives que a problemes económicos. Asegurando la continuidá nel futuru d’esti Serviciu

Nun actu de refuga de la simbolixía fascista nes cais d’Asturies les Mocedaes d’Izquierda Asturiana embalaron al Coronel Tejeiro como forma d’espeyar el deséu de la retirada de los monumentos y señales del réxime que dirixere Franco. Durante l’actu del 24 de payares los militantes de la organización xuvenil repartieron exemplares de la “Guía pa un Uviéu llibre de simboloxía franquista”, documentu nel que recueyen bona parte de los elementos que la organización propón retirar desplicando amás del so asitiamientu, el so significáu y los sos principales protagonistes, al tiempu que se fai una contestualización histórica de caún d’ellos.

P’acabar l’actu lleóse un comunicáu nel que la organización xuvenil venceyada a Izquierda Asturiana facía una reflexón sobre los ataques del franquismu a la cultura y los derechos ciudadanos, asina como a los intentos de destrucción de cualesquier identidá que nun fuera la de so.
Dende MIAS consideráse que “a lo cabero los tiempos venimos careciendo d’un nuevu surdimientu de movimientos fascistes, qu’ente otres munches repudiables aiciones, vindiquen los fechos y los restos d’esi tiempu tan murniu p’Asturies y pal restu l’Estáu, y qu’inda son bien visibles anguaño nes nueses cais” sicasí reconocen un mayor esmolecimientu social pola recuperación de la dignidá del bandu perdedor del 39 “y honrar la memoria de los millones de persones que vieron dende entós tapecida la so hestoria”.

Pa la organización xuvenil “esta llucha pola ‘memoria hestórica’ de la que tanto se fala güei conlleva necesariamente la retirada de monumentos, plaques y otres parafernalies que siguen nel llugar onde se punxeron va décades, que siguen rindiendo homenaxe a aquellos que derrocaron poles armes un réxime lexítimu, dexando millones de calabres pel camín, somorguiándonos na solombra ya imponiéndonos l’escaezu”. L’actu de MIAS tuvo crítiques hacia la política del Gobiernu español no tocante a la recuperación de la memoria. Pa MIAS el Gobiernu de Rodríguez Zapatero cola aprobación de la Llei de Memoria Histórica supón “un mediu camín que nun satisfái a naide y que como vien siendo norma nes politiques de Zapatero, tien l’únicu oxetivu d’anestesiar, de tapar boques. Pero la nuesa y munches otres, tienen güei más ganes de glayar que nunca”. Dende la entidá xuvenil consideren que la retirada de la simboloxía franquista ye dalgo inescusable y que “l’únicu llugar afayadizu pa estos oxetos ye un muséu de la memoria hestórica onde se faiga’l xustu y más riguruso recuerdu de los fechos d’esa dómina”

El conceyal de la URAS, ya históricu militante nacionalista, Xicu Xabel Díaz, presentó una moción al Plenu Municipal del Conceyu de Villaviciosa na que se solicitaba que la Xunta Xeneral del Principáu d’Asturies incluyera la Oficialidá de la llingua asturiana na prósima reforma del Estatutu d’Autonomía. La moción aprebada polos conceyales del Partíu Popular y URAS, tuvo l’abstención de los ediles del PSOE. La moción fala d’entamar un debate sobre l’asturianu basándose “na realidá de la llingua y na so non obligatoriedá”.
La moción aprobada pola corporación municipal de La Villa tien, al mesmu tiempu, la fin de reconocer los derechos de los asturianu-falantes nel conceyu. Pa esta fin l’Ayuntamientu de Villaviciosa facilitará a los y les ciudadanes los diversos trámites municipales na llingua qu’estos escueyan.